Onapit ed Dios

“Papawil Mo Kami Pa”

Kasin dati kan manlilingkor ed si Jehova? Naisip mo la kasin manlingkor lamet ed sikato balet ta agka segurado no awaten to ka ni? Ipangasim ya basaen a maong iyan artikulo tan samay onsublay. Talagan imparaan iya parad sika.

“NAMPIKASI ak ed si Jehova ya abuloyan to ak ya ompawil tan perdonaen to ak komon lapud asakitan ko.” Satan so inkuan na sakey a biin tinaynan toy Kristianon panagbilay ya imbangat ed sikato manlapud inkaugaw to. Kasin sikatoy nakakasian mo? Kasin iisipen mon: ‘Anto kasi liknaan na Dios ed saramay datin nanlingkor ed sikato? Nononoten to ra kasi? Labay to ra kasin ompawil?’ Pian naebatan iratan ya tepet, usisaen tayo ray salitan insulat nen Jeremias. Seguradon mamaliket ed pusom iray ebat.​—Basaen so Jeremias 31:18-20.

Imanoen pay situasyon nen insulat nen Jeremias iratan ya salita. Nen 740 B.C.E., pigaran dekada antis na panaon nen Jeremias, inabuloyan nen Jehova ya sakopen tan awiten na saray Asiryano so samploran tribu a panarian na Israel. * Satan ya trahedya et inyabuloy na Dios pian nadisiplina ray totoo to lapud panggagawa dad grabe iran kasalanan, tan agda dedengelen so paulit-ulit ya pasakbay na saray propeta. (2 Arari 17:5-18) Kasin anguman iray totoo lapud irap ya naeksperiensya ra bilang aripen nen nisian irad Dios da tan arawdawi rad ayaman da? Nilingwanan la ra kasi nen Jehova? Kasin awaten to ra lamet?

“Nagbabawi Ak”

Legan na inkaaripen da, amoria na saray totoo so kasalanan da tan nagbabawi ra. Anengneng nen Jehova so impapuson pagbabawi ra. Imanoen no panon ya deneskribe nen Jehova so inkiwas tan liknaan na saray inaripen ya Israelita, a tinukoy bilang Efraim.

“Andi duaruwa a siak nadngel ko la si Efraim a mantagleey,” so kuan nen Jehova. (Bersikulo 18) Arengel to ray Israelita legan dan ibabalikas so ermen dad resulta na kasalanan da. Unong ed sakey ya iskolar, nayarin say labay ya ibaga na salitan “mantagleey” et “manggiwgiw odino manyugayog.” Singa ra bangar ya anak a lapud magbabawin maong et manpeyeng legan ton iisipen iray irap ya nasasagmak to, tan naiiliw to lay datin kabibilay to diad abung da. (Lucas 15:11-17) Antoy ibabaga na saray Israelita?

“Dinusa mo ak, a singa sakey a kilaw na baka ya agnailuam ed pako.” (Bersikulo 18) Inamin na saray totoo ya manepeg labat iran nadisiplina. Ta diad tua et singa ra agni-nipasal ya kilaw a baka. Nayarin say labay ya ibaga na sayan panangikompara et singa ra baka ya agkomon “naturok na panagsunson no agnanrebelde lapud awit to,” so inkuan na sakey a reperensya.

“Papawilen mo ak, et siak nipawil ak naani; ta sika si Jehova a Dios ko.” (Bersikulo 18) Nampaabeba  ra tan tinmawag irad Dios. Niyarawi ra lapud makasalanan iran kagagawa, balet natan et mikakasi iran tulongan to ran makapawil ed sikato. Oniay inkuan na sakey a patalos: “Papawil mo kami pa . . . Katawan a Dios mi.”​—Maung a Balita.

“Nagbabawi ak . . . binmaing ak, on, agulo ak ni.” (Bersikulo 19) Magbabawi iray totoo lapud nankasalanan ira. Inamin day kasalanan da. Singa da tatapoktapokey pagew da lapud abaingan tan nipaabeba ra.​—Lucas 15:18, 19, 21.

Magbabawi iray Israelita. Maer-ermen ira, impatua day kasalanan dad Dios, tan tinaynan da lay mauges ya kagagawa ra. Kasin nakasian iray Dios? Papawilen to ni ra kasi?

“Petepeteg Wala Naani Panangasik ed Sikato”

Walay espisyal ya relasyon nen Jehova ed saray Israelita. Inkuan to: “Siak so ama na Israel, et si Efraim a sikato so panguloan ya anako.” (Jeremias 31:9) Agkasi perdonaen na maaron ama so sakey ya anak ya agaylay pagbabawi to? Imanoen pay impangibalikas nen Jehova na liknaan to a singa sakey ya Ama ed totoo to.

“Si Efraim ta so inadarok ya anako? Sikato ta so pinabpablik ya anak? Ta siansia a nansalita ak na sumpa ed sikato, siak sinononot ak ni a makanonot ed sikato.” (Bersikulo 20) Maar-aro irayan salita! Singa mapekder balet maaron ateng, apilitan so Dios ya mansalita “sumpa” ed ananak to, paulit-ulit to ran pinasakbayan ed mauges a kagagawa da. Nen talagan ag-ira ondengel, pinaulyanan to ran nadakep​—singa inabuloyan to ran ontaynan. Balet anggano kaukolan to ran dusaen, agto ra nilingwanan. Agton balot nagawaan itan. Agnalingwanan na sakey a maaron ama iray anak to. Anto sirin so alikna nen Jehova nen anengneng toy tuan pagbabawi na ananak to?

“Say pusok mailiw ed sikato; petepeteg wala naani panangasik ed sikato.” (Bersikulo 20) Masyadoy paniliw nen Jehova ed saray anak to. Atenyeg so puso to ed tuan pagbabawi ra, tan agaylay pampilalek ton ompawil irad sikato. Singa samay ama ed parabolo na managdarak ya anak, “naabagey” nen Jehova iray anak to tan taltalaranan toy ipawil da.​—Lucas 15:20.

“Pinapawil To Ak nen Jehova!”

Natalosan tayo so maaron panangabagey tan panangasi nen Jehova diad saray salita na Jeremias 31:18-20. Aglilingwanan nen Jehova iramay datin manlilingkor ed sikato. Panon to no labay day ompawil ed sikato? Say Dios et ‘akaparaan a mamerdona.’ (Salmo 86:5) Agton balot ipulisay iramay magbabawin onaasingger ed sikato. (Salmo 51:17) Imbes, malikeliket to ran aawaten.​—Lucas 15:22-24.

Samay biin abitlad gapo et nanggaway paraan pian makapawil ed si Jehova, linma ed sakey a kongregasyon na Saray Tasi nen Jehova ed lugar da. Nen unaan et sikatoy mannenegatibo. “Say pakaliknak et anggapoy kanak,” so inkuan to. Balet ta pinaseseg na saray elder ed kongregasyon tan tinulongan dan napabiskeg lamet so espiritualidad to. Agaylay pisasalamat to tan inkuan ton, “Makapalikliket ta pinapawil to ak nen Jehova!”

No dati kan manlilingkor ed si Jehova tan iisipen mo lay ompawil ed sikato, imbitaan mi kan ombisita ed asingger ya kongregasyon na Saray Tasi nen Jehova. Tandaan mo ya abageyen tan kasian nen Jehova iramay magbabawin mangibagad sikato ya, “Papawil mo kami pa.”

[Paimano ed leksab]