Tepet na Saray Manbabasa . . .

Siopay Nanlapuan na Samay “Bitewen”?

▪ Akanengneng ka lay belen odino palabas nipaakar ed taloran ari, o makabat a lalaki ya ombibisitad kapangiyanak a si Jesus, ya akarukol ed atotong? Unong ed istorya, angusar so Dios na bitewen pian igiya rad kuwadra na ayep diad Betlehem. Memoryado ni ingen na dakel ya ugugaw so ngaran na saraman ya taloran ari​—Melchor, Gaspar, tan Baltasar. Balet kasin satan ya kabkabat ya istorya et parehod ibabaga na Biblia? Andi. Dakel so aliwa ed satan ya istorya.

Unona, siopa iraman ya lalaki? Diad orihinal ya Griego, ag-ira tinukoy na Biblia ya arari odino makabat a lalaki. Tinawag ira ya mago odino astrologo. Mapatnag ya saraya et manhuhula ya ibabase dad saray bitewen. Ag-ibabaga na Biblia so kangaranan da tan no pigara iran binmisita.

Komadua, kapigan binmisita iraman ya lalaki? Aliwan sanen kapangiyanak ya wala nid atotong si Jesus. Panon tayon makaseguro? Ibabaga na managsulat na Ebanghelyo a si Mateo: “Kaloob da ed abung et anengneng da so ugaw a kaiba nen Maria ya ina to.” (Mateo 2:11) Imanoen ya anggapo lad atotong si Jesus noagta wala la rad sakey ya abung. Sakey ni, nayarin pigaran bulan ni so impanbiahe na saray astrologo manlapud Bukig. Kanian kasabi da diman, say ugaw ya Jesus et aliwa lan kapangiyanak.

Komatlo, siopay nanlapuan na “bitewen” ya angigiya ed saray astrologo? Say maslak ya ibabangat na saray lider na relihyon et nanlapud Dios iman ya “bitewen.” Tua kasi itan? Tandaan, ag-intonton ya tampol na bitewen iray astrologo ed Betlehem. Inggiya to ni rad Arin Herodes diad Jerusalem. Naamtaan na satan ya maimon tan makapanyarin managpatey ed saratan ya astrologo so inkianak nen Jesus tan awalaan laingen na rason pian busolen so ugaw a magmaliw ya “ari na saray Judio.” (Mateo 2:2) Imbaga nen Herodes ed sikara ya ompawil irad sikato pian ipakabat no iner so eksakton kawalaan na ugaw, tan nankunwarin labay to met ya igalang. Insan la intonton na “bitewen” iray astrologo ed si Jose tan Maria. Kanian say gawaen na saray astrologo et mangipeligrod bilay na ugaw no agmibali so Dios. Maong labat ta sinmalet so Dios. Agaylay pasnok nen Herodes nen agpinmawil iray astrologo kanian impapatey toy amin ya ugugaw a lalakin mantaon na duara a paleksab ed Betlehem tan diad amin a distrito na satan.​—Mateo 2:16.

Diad saginonor et tinukoy nen Jehova si Jesus ya “Ana’ko, say inad-arok, ya inabobonan ko.” (Mateo 3:17) Isipen pa: Kasin say maaro tan matunong ya Ama et mamili na saray paganon astrologo​—a manguusar na magic ya isesebel ed Ganggan to​—pian magmaliw ya mensahero to? (Deuteronomio 18:10) Kasin mangusar na bitewen pian igiya irad sankapeligroan tan makapanyarin managpatey ed saman a lugar, ya walay awit dan mensahen seguradon mamasanok ed si Herodes? Insan usaren to met kasi itan ya bitewen tan saray astrologo pian ipaamta no iner so kawalaan na anak ton anggapoy laban?

Diad pangiyilustra: Imbaki na maomaong a komander na militar so sankamaongan ya sundalo to ed sakey a mapeligron misyon diad teritoryo na kalaban. Kasin ipaamta tod kalaban no iner so kawalaan na satan a sundalo? Siempre andi! Ontan met, imbaki nen Jehova so Anak to ed sayan mapeligron mundo. Ipaamta to kasi ed mauges ya Arin Herodes no iner so kawalaan na Anak To, ya bilang ugaw et agto nidepensay sarili to? Andin balot!

Siopa sirin so nanlapuan na “bitewen,” odino saman ya singa bitewen? Siopa ta so manunaan a malabay ya ompatey so ugaw nin Jesus, pian agla ombaleg tan agto nasumpal so misyon tod dalin? Siopay manpupursigin mangibalang ed totoo tan mangikakayat na katilaan, kaugsan, tan panagpatey? Imbaga mismo nen Jesus no siopa imay “matila tan ama na tila,” samay sakey ya “managpatey manlapu la ed gapo”​—si Satanas a Diablo.​—Juan 8:44.