Tongtongan Nipaakar ed Saray Topic Diad Biblia​—Kasin si Jesus so Dios?

LABALABAY na Saray Tasi nen Jehova so mitongtong nipaakar ed Biblia. Kasin wala ray nononoten mon tepet nipaakar ed Biblia? Kasin walay labay mon naamtaan ed saray papanisiaan odino paraan na panagdayew na saray Tasi nen Jehova? No wala, itepet mo labat itan ed sikara. Maliket iran mangebat ed satan.

Nabasam dia so alimbawa no panon ya itotongtong na saray Tasi nen Jehova iray topic ed Biblia. Imadyin mon walay Tasi a say ngaran to et Karen a linmad abung na biin say ngaran to et Samantha.

Akin Tua ya Agkayo Manisiad si Jesus?

Samantha: Akin tua ’may ibabaga na pastor min saray Tasi nen Jehova et agmanisiad si Jesus?

Karen: Andi, manisia kamid si Jesus. Diad katuaan to et bibidbiren min say panisiad si Jesus et importante parad kilalaban.

Samantha: E, ta ontan met so papanisiaan ko.

Karen: Marakep ta ontan met so papanisiaan mo. Siak manaya si Karen. Sika ey?

Samantha: Siak si Samantha.

Karen: Maliket ak ta akabat ta ka. Seguro Samantha, iisipen mon ‘No saray Tasi nen Jehova et manisiad si Jesus, akin et ibabagay arum ya agkami manisiad sikato?’

Samantha: E, ’atan lanti pankelawan, antoy tua a?

Karen: Diad tua et balbaleg so pananisia mid si Jesus, balet agmi papanisiaay amin ya ibabaga na totoo nipaakar ed sikato.

Samantha: Anto iratan bilang ey?

Karen: Singa bilang, ibabagay arum ya si Jesus et sakey labat a maong a too.

Samantha: Anggan siak met, agko panisiaan itan.

Karen: E, maabig sirin no ontan. Sakey ni, agmi met papanisiaan iray bangat ya misumlangan ed imbagan mismo nen Jesus nipaakar ed relasyon tod Ama.

Samantha: Antoy labay mon ibaga?

Karen: Ibabangat na dakel a relihyon a si Jesus so Dios. Anganko ontan met so ibabangat dad sikayo.

Samantha: E, ibabagay pastor mi ya say Dios tan si Jesus et saksakey.

Karen: Balet, manisia ka kasin say sankaabigan a paraan pian naaralan moy katuaan ed si Jesus et say pangusisad saray imbaga to nipaakar ed inkasikato?

Samantha: On.

Antoy Imbaga nen Jesus?

Karen: Maabig no basaen ta’y sakey a bersikulod Biblia a walad Juan 6:38. Imanom pay inkuan nen Jesus: “Linmeksab ak manlapud tawen pian gawaen ko so linawa na samay angibaki ed siak, aliwan say linawak.” Natan, no si  Jesus so Dios, agta mairap a talosan iyan bersikulo?

Samantha: Anto labay mon ibaga?

Karen: Abasa ta ya imbaga nen Jesus ya sikatoy linma dia aliwan pian gawaen so dilin linawa to.

Samantha: On, sikatoy linma diad dalin pian gawaen so linawa na Samay angibaki ed sikato.

Karen: No bilang ta si Jesus so Dios, siopay angibakid sikato ey? Tan akin ya inunor nen Jesus so linawa na samay angibakid sikato?

Samantha: Natatalosan koy labay mon ibaga. Balet ’atan labat kasi paneknek ya aliwan si Jesus so Dios?

Karen: Nia ni ay so imbaga nen Jesus ed sananey a pankanawnawa. Ontan met lan lamang so imbaga tod onsublay a kapitulo na Juan. Labay mon sika met so manbasa na Juan 7:16?

Samantha: Ok. “Inmebat si Jesus ed sikara tan inkuan to: ‘Say ibabangat ko et agmanlalapud siak, noagta manlalapud samay angibaki ed siak.’”

Karen: Salamat. Diad satan a bersikulon binasam, kasin imbangat nen Jesus so dilin ideya to?

Samantha: Andi, say imbangat to et agnanlapud sikato noagta nanlapud Samay angibakid sikato.

Karen: Susto. Pero nayarin nitepet mo: ‘Siopay angibakid si Jesus? Tan siopay nanlapuan na katuaan ya imbangat to?’ Agta Sikatoy mas atagtagey nen say si Jesus? Di ba, mas atagey imay mangibabaki nen samay ibabaki?

Samantha: On ya tua awa! Natan ko labat abasa ’tan.

Karen: Nengneng mo met iyay imbaga nen Jesus diad Juan 14:28: “Nadngel yo ya imbagak ed sikayon, Onla ak la tan ompawil ak ed sikayo. No inaro yo ak, manliket kayo ta onla ak ed Ama, lapud say Ama et babaleg nen say siak.” Base ed sayan bersikulo, panoy impangipasen nen Jesus ed sarili to komparad Ama?

Samantha: Imbaga ton say Ama et babaleg nen say sikato. Kanian seguro, impasen ton mas atagey so Dios nen say sikato.

Karen: Duga. Nia ni kaaruman ya prueba. Imanom pay imbaga nen Jesus ed saray disipulo ton nabasad Mateo 28:18. Oniay nabasa: “Amin a pakauley ed tawen tan diad dalin so niiter la ed siak.” Kasin imbaga nen Jesus a dati lan walad sikato so amin a pakauley?

Samantha: Andi, say kuan to et inter itan ed sikato.

Karen: No si Jesus so Dios, akin et kaukolan nin ikdan na kaaruman ya pakauley, tan siopay angiter na satan ed sikato?

Samantha: Nonoten ko nin maong ’tan.

Siopay Pitotongtongan To?

Karen: Wala ni sakey ya mairap a talosan no ipasen tayon si Jesus so Dios.

Samantha: Anto ’tan ey?

Karen: Atan imay nabasa tayon agawa sanen abautismoan si Jesus. Pibasam pay ibabaga na Lucas 3:21, 22.

Samantha: “Sanen abautismoan ya amin iramay totoo, abautismoan met si Jesus, tan sanen sikatoy manpipikasi et alukasan so tawen tan dinmapo ed sikato so masanton espiritu a singa nengneng na malapati, tan walay nadngel a boses manlapud tawen: ‘Sika so Ana’ko, say inad-arok; sika so inabobonan ko.’”

Karen: Unong ed binasam, antoy gagawaen nen Jesus legan a sikatoy babautismoan?

Samantha: Manpipikasi.

Karen: Susto. Balet nayarin isipen mo, ‘No si Jesus so Dios, siopay pampipikasian to ey?’

Samantha: Ay on ya tua awa. Itepet ko pa ’tan ed pastor mi.

Karen: Likud nid satan, kaimwas nen Jesus ed danum, walay nadngel a boses manlapud tawen. Naimanom no antoy imbaga To?

Samantha: Kuan na boses ya si Jesus et Anak To ya inad-aro To, tan inabobonan To.

Karen: Duga ka. No si Jesus so Dios, siopa imay nansalita manlapud tawen?

Samantha: Agko nin balot naisip ’tan a.

 Akin ya “Ama” tan “Anak”?

Karen: Nia ni sananey a kaukolan ta’n ikonsidera: Abasa ta nen niman ya tinukoy nen Jesus so Dios bilang Ama ton walad tawen. Tan sanen sikatoy abautismoan, walay boses manlapud tawen ya anawag ed sikaton say Ana’ko. Diad katuaan to, deneskribe nen Jesus so sarili to bilang Anak na Dios. Natan, no ibangat mod siak ya mankapareho so duaran membro na sakey ya pamilya, antoy usaren mon alimbawa?

Samantha: Nayari pa lagin sanagi.

Karen: Duga ka, ompan kambal ni ingen. Balet tinawag nen Jesus so Dios ya Ama tan say sarili to ya Anak. Parad sika, anto kasi labay ya ibaga nen Jesus?

Samantha: Natatalosan ko lay labay mon ibaga. Tinukoy nen Jesus ya samay sakey et mas matatken tan mas malaknab so autoridad to nen say samay sakey.

Karen: Susto. Natan, imadyin mo pa ya: Inusar ta niman so sanagi odino kambal pian iyalimbawa so panpareho na duaran indibidual ed pamilya. No talagan si Jesus so Dios, agta bilang sakey a Maong a Managbangat et ontan met ya ilustrasyon so usaren to​—odino mangusar na mas marakep ni ingen?

Samantha: Siempre.

Karen: Balet, inusar toy salitan “Ama” tan “Anak” pian deskribiey relasyon tod Dios.

Samantha: Marakep tay imbagam a.

Antoy Imbaga na Saray Papatumbok nen Jesus Nensaman?

Karen: Antis ak ya onalis, wala ni labay kon pantongtongan ta. Anggan pigaran minuto labat.

Samantha: E, sarag to pa.

Karen: No talagan si Jesus so Dios, agta nailaloan tayon ontan met so ibangat na saray papatumbok to?

Samantha: On.

Karen: Balet anggapoy nabasa tayod Biblia ya ontan so imbangat da. Imbes, nengneng mo pa yay imbaga na sakey ed saray inmunan patumbok nen Jesus ya si apostol Pablo. Diad Filipos 2:9, imbaga to no antoy ginawa na Dios kayari impatey tan inkioli nen Jesus: “Sikatoy [si Jesus] intandoro na Dios ed mas atagey a posisyon tan maaron inikdan to na ngaran ya atagey nen say arum niran ngaran.” Base ed sayan bersikulo, antoy ginawa na Dios parad si Jesus?

Samantha: Unong ed satan et intandoro na Dios si Jesus ed mas atagey a posisyon.

Karen: On. Balet no si Jesus et kapareho na Dios antis na impatey to tan sanen inmoli et nitandoro ed mas atagey ya posisyon, ompaway ya mas atagtagey so posisyon to nen say Dios. Posible kasi itan?

Samantha: Ay andi.

Karen: Duga ka. Kanian, base ed saray nantongtongan ta, kasin ibabangat na Biblia a si Jesus so Dios?

Samantha: Singa andi. Ibabaga na Biblia a sikatoy Anak na Dios.

Karen: On, susto. Balet labay kon ipaamtad sika ya baleg so respeto mi ran Tasi nen Jehova ed si Jesus. Manisia kamin say impatey to bilang Mesias so rason pian nilaban so amin a matoor a totoo.

Samantha: Manisia ak met ed satan.

Karen: Marakep sirin no ontan. Balet nayarin isipen mo, ‘Panon tayon nipanengneng so pisasalamat tayod si Jesus diad impangiter toy bilay to parad sikatayo?’ *

Samantha: Antam, nononoten ko met ’tan.

Karen: Diad ipawil ko et pantongtongan ta no antoy ibabangat na Biblia nipaakar ed satan. Ompawil ak dia next week, diad onia lanlamang ya agew tan oras, komon ta wadia ka.

Samantha: On, sige pawil ka labat dia.

Karen: Ilaloan mo ta ompawil ak.

[Paimano ed leksab]