Onapit ed Dumerengel na Pikakasi

DAKEL so mangibabagan manisia rad Dios, balet agda nipaliwawa no akin a manisia ra. Agda met amta no akin ya mauges so maslak a relihyon odino no akin ya aabuloyan na Dios so paniirap. Basta labat ira manpipikasi ed Dios ya agda kabat.

Balet diad tua et sarag mo pay onapit ed Dios. No nakabat moy Dios, ombiskeg so pananisiam tan sikatoy lalom ya naaro tan napabli. Say tuan pananisia et base ed ebidensya. (Hebreos 11:1) No naamtaan moy katuaan nipaakar ed Dios, sikatoy nakabat mo tan napitongtongan mon singa kaaro. Nengnengen tayo ray eksperiensya na saramay datin manpipikasi anggano agda seguradon walay Dios.

▪ Si Patricia, ya abitla ed unonan artikulo. “Aminsan, apantongtongan mi na saray kabarkadak so relihyon. Imbagak ed sikara ya tinaynanan kod abung so daddyk ya atiesta, tan samay katongtong dan Tasi nen Jehova. ‘Ompan duga ray Tasi nen Jehova,’ so kuan na sakey ed saray kaarok.

“‘Anto kasi no onla tayod aral da pian naamtaan tayo?’ so inkuan ni na sakey ed sikara. Kanian linma kami. Anggano manaalangan kami, intultuloy na arum ed sikami so akiaral ta makaaro iray Tasi.

Sakey ya Simba, walay arengel kon akapanguman ed siak. Impaliwawa na espiker no akin a maniirap so totoo. Dati et agko amta ya say too et ginawa ya perpekto tan ginmapo so kasalanan tan patey ed sakey a too insan kinmayat ed amin ya totoo. Impaliwawa met na espiker no akin ya kaukolan so impatey nen Jesus pian nipawil so abalang na inmunan too. * (Roma 5:12, 18, 19) Diman ko labat la alinewan. Say kuan kod sarilik, ‘Wala manayan tuay Dios ya mangaarod sikatayo.’ Intultuloy kon inaral so Biblia tan ag-abayag, naamtaan kon sarag ko manayay manpikasi ed sakey ya tuan persona.”

▪ Si Allan, ya abitla met ed unonan artikulo. “Aminsan, nampulong ed sikami iray Tasi nen Jehova, tan pinaloob ira nen asawak ta interesado ed imbaga ran pambilay ya andi-angga  diad dalin. Asyodotan ak. Intagar koy asawak ed kusina tan imbagak ed sikato, ‘Agka paloloko. Agmo bastabasta papanisiaay ibabaga ra!’

“‘E, di arap mo ra pian napruebaan mon aliwa ra,’ so kuan to.

“Anggapo lanlamang so nidepensak. Balet maomaong ira tan inikdan da ak na libron nipaakar ed nanlapuan na bilay. Malinlinew tan dakel so ebidensyan imbaga na libro, kanian nandesisyon ak ya kabaten a lalo so Dios. Nampaiyaral ak ed sakey a Tasi, tan ag-abayag et naamtaan kon duma so ibabaga na Biblia ed saray papanisiaan ko nipaakar ed relihyon. Akabat koy Jehova, tan impapuso lay pikakasik ed sikato. Wala ray kagagawak ya kaukolan kon umanen, kanian impikasik itan. Segurado ak ya inebatan nen Jehova iray pikakasik.”

▪ Si Andrew ya taga-England. “Anggano awet ak lad papanisiaan ko tan interesado ak ed science, panisiaan koy ebolusyon ta ibabaga na arum ya tua itan. Agak manisiad Dios lapud saray mauges a nagagawa.

 “Balet no arum, iisipen ko: ‘No walay Dios, labay kon amtaen no akin ya oniay nagagawa. Akin et onggragrabe so krimen tan guerra?’ No naiirapan ak, manpipikasi ak no maminsan, balet agko amta no siopay pitotongtongan ko.

“Insan, walay angiter ed asawak na melag ya babasaen ya im-publish na Saray Tasi nen Jehova. Say title to et: Kasin Sayan Mundo so Makaliktar? Satan a mismo imay tepet ya lanang kon iisipen. Nen abasak itan, imbagak ed sarilik, ‘Makatulong kasi so pangamtad ebat na Biblia?’ Ag-abayag, sanen manbabakasyon ak, walay angiter ed siak na libron The Bible​—God’s Word or Man’s? * Nen naamtaan kon agmanaya mankontraan so Biblia tan science, mas labay ko laingen ya aralen so Biblia. Kanian nampaiyaral ak ed sakey a Tasi. Atalosan koy linawa nen Jehova tan sikatoy akabat ko bilang tuan persona, ya sarag kon pitongtongan diad pikakasi.”

▪ Si Jan, biin taga-London tan pinabaleg ya Protestante. “Lapud pankunkunwari na relihyon tan graben kairapan, adismaya ak ed relihyon. Agko met la intuloy so man-kolehyo. Ginawak ya anapan so pangansion tan pan-gitara. Insan, akabat koy Pat. Sikatoy Katoliko tan kaparak ya adismaya ed relihyon.

“Nanayam kamid inabandonan abung kaiba ray arum nin nan-drop ed eskuelaan ya interesadod sananey a relihyon. Anggano lablabi la, agkami onsasawan pantongtongan so kabaliksan na bilay. Tua, agkami manisia nen Pat ed Dios, balet iisipen min walay ‘puersan angiter na bilay.’

“Sanen inmalis kami ed norte na England pian mananap na trabaho bilang musikero, niyanak so panguloan mi. Sakey ya labi, nansakit so anako, tan agko naam-amtaan ya manpipikasi ak la manaya ed Dios ya agko panisiaan. Anggad sinmabi punton tinmabang lay aroan mi nen Pat, kanian inalak so anako tan tinmaynan kami. Nampikasi ak lamet, agla pigan walay ondengel ed siak. Ontan met manayay ginawa nen Pat.

“Diad saman a mismon agew, tinmoktok so duaran Tasi ed panaayaman nen Pat tan imbasa dad sikato iray pigaran praktikal ya simbawa na Biblia. Tinawagan ak nen Pat tan tinepet to no labay koy milan manpaiyaral na Biblia ed saray Tasi. Diad panaaral mi, naamtaan min pian napaliket so Dios, kaukolan ya gawaen a legal so panaamong mi. Singa mair-irap iman ya gawaen ta maproblemay relasyon mi.

“Labay min naaral ni iray kasumpalan na saray propesiya ed Biblia, no akin a walay kairapan, tan no antoy kabaliksan na Panarian na Dios. Kalkalna min alinewan ya talagan mangiyaansakit so Dios tan labay min gawaen so ganggan to. Nampakasal kami. Akatulong so karunongan na Salitay Dios pian maong so pamabaleg mid taloran anak mi. Seguradon dinengel nen Jehova iray pikakasi mi.”

Aral Mo ray Ebidensya

Singa saray minilyon nin arum, saray abitla ed sayan artikulo et ag-apalikdo na palson relihyon tan naamtaan da no akin ya aabuloyan na Dios so paniirap. Naimanom ta ya say suston pikakabat ed Biblia so akakombinse ed sikaran amin ya talagan ondedengel si Jehova ed saray pikakasi?

Labay mon aralen iray ebidensya no kasin walay Dios? Maliket iray Tasi nen Jehova ya ontulong ed sika pian naamtaan moy katuaan nipaakar ed si Jehova tan no panon kan onapit ed ‘Dumerengel na pikakasi.’​—Salmo 65:2.

[Saray paimano ed leksab]

[Blurb ed pahina 10]

“Atalosan koy linawa nen Jehova tan sikatoy akabat ko bilang tuan persona, ya sarag kon pitongtongan diad pikakasi”

[Litrato ed pahina 9]

Say tuan pananisia et base ed ebidensya tan pampilalek ya naamtaan so katuaan nipaakar ed Dios