Onapit ed Dios

Sano Mamerdona so Dios, Kasin Lingwanan To met La?

SAY ebat et on. Oniay insipan nen Jehova ed saramay aabobonan to: “Perdonaen ko naani inkauges da, tan agko la naani nonoten so kasalanan da.” (Jeremias 31:34) Ipapaseguro sirin nen Jehova ed sikatayo ya no perdonaen to ray magbabawin nankasalanan, lingwanan to la ray kasalanan da. Balet labay ton ibaga kasi ya agla nanonotan na Amalsa na maaw-awang ya uniberso iray kasalanan ya pinerdona to? Pian natalosan tayo no panon ya peperdonaen tan lilingwanan na Dios so kasalanan, makatulong iray salita nen Ezequiel.​—Basaen so Ezequiel 18:19-22.

Inusar nen Jehova si propetan Ezequiel pian ipakabat so panangukom to sumpad agmatoor ya Juda tan Jerusalem. Tinaynan na bansa so panagdayew ed si Jehova tan pinano day dalin na kaugsan. Impasakbay nen Jehova ya deralen na saray taga Babilonia so Jerusalem. Balet anggan sanen ipapakabat nen Jehova itan ya panangukom, wala met so ipapasabi ton mensahe ya mangiter na ilalo. Balang sakey et makapampili tan balang sakey et ebatan toy sarili ton desisyon.​—Bersikulo 19, 20.

Panon to sirin no tinmunda lay sakey ed panggagaway mauges, tan manggagawa lay duga? Inkuan nen Jehova: “No say marelmeng pagbabawien to ray amin a kasalanan to a ginawa to, tan sumpalen to ray amin a panontonan ko, tan gawaen to so nikatunongan tan kaptekan, sikato so manbilay naani ya ag-onlaron, agnaani ompatey.” (Bersikulo 21) On, ‘akaparaan a mamerdona’ si Jehova ed nankasalanan ya tinmunda lan manggaway mauges, a mangipanengneng ya talagan magbabawi.​—Salmo 86:5.

Panon to ray kasalanan ya ginawa to ey? “Anggapo ed saray impakalukso to a ginawa to so nanonotan a sumpa ed sikato,” so impaliwawa nen Jehova. (Bersikulo 22) Imanoen ya saray kasalanan na sakey a magbabawi et agla nanonotan a sumpa ed sikato. Akin ya importante iya?

Diad Biblia, say Hebreon salita ya nipatalos a “nonoten” et aliwa labat ya pannonot ed apalabas. Oniay imbaga na sakey a reperensya nipaakar ed satan a salita: “Diad tua et mabetbet ya walay ipapatnag ton kiwas odino uusaren ya kaiba na saray salitan mangipapatnag na kiwas.” Kanian, nayarin say labay ya ibaga na “pannonot” et “ikiwas.” Sirin, no ibaga nen Jehova ed sakey a magbabawi ya ‘anggapo ed saray impakalukso to so nanonotan a sumpa ed sikato,’ labay ton ibaga et agto la onkiwas ya sumpa ed satan ya indibidual lapud saraman a kasalanan to, agto la tetelen o dusaen. *

Makapatenyeg na liknaan so impaneskribe na saray salitan nabasad Ezequiel 18:21, 22 nipaakar ed sigpot ya panamerdona na Dios. No perdonaen nen Jehova iray kasalanan tayo, agto la iratan singilen ed sikatayo diad arapen. Imbes, ibantak to lad benegan to iray kasalanan na toon magbabawi. (Isaias 38:17) Singa to buburalen so rekord na saraman ya kasalanan.​—Gawa 3:19.

Lapud agtayo perpekto, kaukolan tayoy panangasi na Dios. Diad tua, paulit-ulit tayon mankakasalanan. (Roma 3:23) Balet labay nen Jehova ya naamtaan tayo ya no talagan magbabawi tayo, sikatoy akaparaan ya mamerdona. Tan no sikatoy mamerdona, lingwanan to met la​—agto lan balot pawilen iray kasalanan tayo pian tetelen odino dusaen itayo. Talagan makapaligliwa itan! Agka kasi napakiwas ya onapit ed Dios lapud panangasi to?

Suhestion a Basaen ed Biblia Legay Hulyo:

▪ Ezequiel 6-20

[Paimano ed leksab]