Uumanen na Biblia so Bilay

ANTOY akatulong ed biin taga diad Pilipinas pian nitunday alablabas a kakainum to tan magmaliw a maliket so pamilya to? Akin et nagmaliw ya makaaron ministro so sakey a karatista ya taga-Australia? Basaen tayoy istorya da.

“Ag-itan Nauman ed Sanlabi Labat.”​—CARMEN ALEGRE

TAON NA INKIANAK: 1949

BANSA: PILIPINAS

APALABAS: MAINUM

ISTORYAY BILAY KO: Nianak ak ed San Fernando, sakey a baley ed Camarines Sur. Balet abayag ak a nanayam ed Antipolo, Rizal. Nen balon sabi ak diman, marendeen ni man ya nipalandey a baley tan dakel ni ray kakiewan. Matalag so manaakar-akar no labi la. Natan balet, baleg lan syudad so Antipolo tan dakel lay totoo.

Ag-abayag, akabat kod Antipolo si Benjamin, tan asabi panaon et nankasal kami. Mairap manayay walay asawa. Pian nalingwanan ko ray problemak, naninum ak lan naninum. Inmaliway ugalik, lalo lay panagtratok ed asawak tan ed ananak ko. Misyosyodot ak tan anggapoy pasensiak ed sikara. Agko rerespetoey asawak. Kanian, aliwan maliket so bilay na pamilya mi.

NO PANON YA INUMAN NA BIBLIA SO BILAY KO: Say ayrok a si Editha et Tasi nen Jehova, tan imbaga ton maabig no manpaiyaral kamin sanasawa na Biblia ed saray Tasi. Inmabuloy kami ta iilaloan min makatulong itan pian onliket so bilay na pamilya mi.

Diad panaaral mi na Biblia, dakel so naamtaan mi ya mararakep. Tan say agusgustoan ko et amay walad Apocalipsis 21:4. Parad saramay manbilay ed paraison dalin diad uley na Panarian na Dios, ibabaga na satan a bersikulo ya ‘punasen na Dios so amin a lua ed kamataan da, tan anggapo lay ipapatey, tan anggapo met lay panermen tan pannangis tan ot-ot.’ Labay kon sakey ak ed saray makaawat ed saratan ya bendisyon.

Atalosan ko ya kaukolan kon umanen so ugalik tan kagagawak. Siempre, ag-itan nauman ed sanlabi labat, balet nitundak lanlamang so kakainum ko. Naaralan ko met so magmaliw ya maaro tan mapasensia ed pamilyak. Ontan met, naaral kon respetoen so asawak tan mikooperad sikato bilang ulo na pamilya mi.

Sanen mimiaral kami la nen Benjamin ed Kingdom Hall, mandinayew kami. Sakey  ni, anggapod sikaray mansusugal, oniinum na alabas, tan patas so trato rad balang sakey. Rerespetoen day amin. Kombinsido kamin nalmo mi tuan relihyon.​—Juan 13:34, 35.

MARAKEP IRAN RESULTA: Baleg so angumanan na pamilya mi. Nagmaliw a maliket so panamaley mi nen Benjamin, tan labalabay min ipulong ed arum so Biblia. Saray duaran anak min lalaki tan kaasawaan da et manaaral met lay Biblia. Komon ta nasabi panaon et nakaiba mi la ran manlingkor ed si Jehova. Talagan saya so sankarakepan a klase na bilay.

“Anggapoy Aatrasan Ko.”​—MICHAEL BLUNSDEN

TAON NA INKIANAK: 1967

BANSA: AUSTRALIA

APALABAS: KARATISTA

ISTORYAY BILAY KO: Binmaleg ak ed Albury, ya marakdakep tan mayaman a syudad na New South Wales. Matalag so krimen ed Albury tan kabkabat iyan mareen a lugar.

Mainaway bilay mi. Anggano nandiborsyo iray ateng mi nen pitoy taon ko, sineguro dan niiiter ed sikamin sanaagi so amin ya kaukolan mi. Pinan-eskuela da ak ed sankarakepan ya private school ed lugar mi. Labay nen tatay ko ya magmaliw ak ya negosyante ka-graduate ko. Balet mas interesado ak ed sports, tan maong ak ya cyclist tan karatista. Nantrabaho ak ed repair shop na luluganan, kanian dakel so panaon kod sports.

Ilalastog koy laman ko ta agko napapaulyanan. No maminsan et anggapoy aatrasan ko. Labalabay kon patolan da ak ta amtak ya sarasarag ko ra. Balet lapud amta na karate master ko ya siga ak, binilibilin to ak ya kontrolen koy sarilik tan mandeen ak. Naynay ton ipapanonot ya importante so katutulok tan katooran.

NO PANON YA INUMAN NA BIBLIA SO BILAY KO: Nen nanaral ak na Biblia, naamtaan kon kabusol nen Jehova so maruksa. (Salmo 11:5) Nen unaan, irarason kon aliwan bayulente so karate noagta sports labat itan. Parad siak, saray prinsipyo tan estandarte na satan et miparad ibabangat na Biblia. Maan-anos imay sanasawan Tasi ya angiyaral ed siak. Agda ak pinilit ya itunday karate. Tan siansian inyaralan da ak na Biblia.

Sanen ondadakel lay amtak ed Biblia tan onaapit ak lad si Jehova, kalkalnan  manguuman so panmoriak. Pandinayewan ko so ehemplo na Anak nen Jehova, si Jesus. Anggano makapanyari si Jesus, agbalot akilaban. Pinannonot ak ya maong na samay imbaga to ya walad Mateo 26:52: “Amin iramay mangusar na espada et ompatey ed espada.”

Legan kon nakakabat si Jehova, lalok ya naaaro tan narerespeto. Naliliketan ak no iisipen kon say Nanggawa ed sikatayo, anta marundunong tan makapanyari et inaro to ak. Balibalin naamtaan ya anggano napapaermen koy Jehova odino say pakaliknak et mair-irap tan labay ko lay onsuko, siansia nin agto ak paulyanan basta gawaen koy anggaay nayarian ko. Pinalemew toy liknaan ko ed impormisa ton: “Siak, si Jehova a Dios mo, a mangitagey na kawanan a limam, a kuan ko ed sika, Agka antakot; tulongan to ka.” (Isaias 41:13) Nen naamtaan kon ontan so panangaro tod siak, lalon binmiskeg so linawak.

Amtak ya mair-irap kon ikbanay karate. Balet amtak met ya napaliket koy Jehova, tan kombinsido ak ya agnaparaan na anggan anton sakripisyo so panlingkor ed sikato. Dugarugad siak imay abasak ya imbaga nen Jesus a walad Mateo 6:24: “Anggapo so nayarin manpaaripen ed duaran katawan.” Naamtaan ko ya imposiblin panbansagen so panlingkor ed si Jehova tan pan-karate, ta magmaliw lamet ya prayuridad koy karate. Kaukolan ak lan manpili no siopay panlingkoran ko.

Aliwan mainomay ya lingwanay karate. Lalabanan koy liknaan ko. Tua, maliket ak ta napapaliket koy Jehova. Balet singak tratraidorey karate master ko. Parad saray walad martial arts, say pantraidor et agnaperdonan kasalanan. Kanian mas pipilien na arum so manbikkel nen say ompaway ya kababaing.

Anggapoy lupan niyarap kod karate master ko. Imbes ya manpatanir ak, basta ak labat agnampanengneng ed sikato tan ed arum ni ran kaibak. Amtak ya dugay ginawak sanen tinundaan koy karate. Balet, nakokonsiensia ak ta agko impaliwawa iray balon papanisiaan ko, tan asayang koy pankanawnawan ibaga itan ed arum. Say pakaliknak et kagapogapok ni labat ya nanlingkor ed si Jehova, apaermen ko la. Makapabelat iya na liknaan. Aminpigak ya sinalin manpikasi ed sikato, balet nauunaan ak na panakakis.

Anganko walay maabig ya naimano nen Jehova ed siak, ta inusar to ray agagi ed kongregasyon pian suportaan ak. Agaylay panangaro, panagligliwa, tan pikakaaro ra. Akatulong met ed siak imay abasak ed Biblia nipaakar ed si David tan Bat-seba. Anggano akagawa na ambelat a kasalanan si David, pinerdona nen Jehova sanen nagbabawin maong. No nonodnonoten ko iya, nababalanse so panag-isip kod saray kalilingoan ko.

MARAKEP IRAN RESULTA: Nen agak ni manaaral na Biblia, anggapoy pibabalik ed arum, sarilik labat so nononoten ko. Balet diad tulong nen Jehova tan na magangganan asawak, ya pitoy taon ko lan kaibad bilay, nagmaliw ak ya mas makasi. Pribilehyo min inyaralan na Biblia so dakel, pati saray grabe situasyon da. No nanenengneng kon manguuman so kabibilay na arum lapud panangaro nen Jehova, agnaparaan so liket ko na anggan anton pan-champion ed karate.

[Blurb ed pahina 14]

“Naliliketan ak no iisipen kon say Nanggawa ed sikatayo, anta marundunong tan makapanyari et inaro to ak.”

 [Kahon/Litrato ed pahina 15]

“Salamat ed Sayan Balibalin Serye!”

Kasin agustoan mo irayay eksperiensya ed pahina 12-14? Duara labat iraya ed masulok a 50 istorya ya im-publish na Watchtower/Panag-bantayan manlapu la nen Agosto 2008. Say seryen “Uumanen na Biblia so Bilay” et paborito na dakel. Akin et labalabay da iya?

Nandurumay istoryad bilay na saray totoo ed sarayan artikulo. Antis dan akabat si Jehova a Dios, marakep met so bilay na arum ed sikara, balet ta anggapoy direksion. Saray arum et irap dan nilabanay pagmaliw ya misasanok, panagdruga, odino alabas a kakainum. Pigarad sikara so binmaleg ed pamilyan Tasi balet walay panaon ya tinmundan nandayew ed si Jehova. Ipapanengneng na sarayan eksperiensya ya posiblin makapanguman so sakey pian napaliket so Dios. Tan lanang a maabig so resulta. Antoy epekto na sarayan istorya ed arum?

Imbaga na sakey a bii no panon ya akatulong so artikulo na Pebrero 1, 2009 ed saray kaiba ton priso.

▪ Inkuan to: “Natatalosan na dakel ed saray kaibak ya priso so liknaan na saramay angistoryay bilay da ed sayan artikulo. Epektibon maong iray litrato ra ‘nensaman’ tan ‘natan,’ tan saray impormasyon nipaakar ed sikara. Dakel ed saray kaibak a priso et ontan met so bilay da. Sanen abasa na duaran priso irayan istorya, nampaiyaral ira na Biblia.”​—C. W.

Agusgustoan na arum iray apalabas ya eksperiensya ed sayan serye. Alimbawa, nabasa ed isyu na Abril 1, 2011, so eksperiensya nen Guadalupe Villarreal, ya datin bakla balet ta anguman pian makapanlingkor ed si Jehova. Niay duara ed dakel a sulat na saray akabasa ed sayan istorya.

▪ “Baleg so epekto ed siak na eksperiensya nen Guadalupe. Talagan makapadinayew a nanengneng no panon ya nauman na panangaro ed si Jehova tan na Salita to so sakey a too!”​—L. F.

▪ “Nensaman, anggan siopa et pupulongan ko, pati saray bakla-tomboy. Balet natan, singa agko la ra papansinen tan papaliisan ko ni ra ingen. Dugaruga iyan artikulo ed siak. Akatulong iya pian naalig koy pangipapasen nen Jehova ed sikara, bilang potensyal a managdayew to.”​—M. K.

Say sakey nin eksperiensya ya agusgustoan na dakel et samay istorya nen Victoria Tong diad isyu na Agosto 1, 2011. Ditan et inistorya to so aliwliwan impanugaw to. Inamin ton mairap a panisiaan a sikatoy inaro nen Jehova, anggano abayag lan manlilingkor. Tan imbaga to met no antoy kalkalnan akakombinse ed sikato. Oniay imbaga na arum ed saray akabasa na istorya to.

▪ “Tinmanek ed pusok so eksperiensya nen Victoria. Dinmalan ak ed dakel a trahedya. Lanang kon lalabanan so negatibon panag-isip, anggano pigay taon ak lan bautismadon Tasi. Lapud eksperiensya nen Victoria, labay kon gawaey anggaay nayarian ko pian nanengneng no anto ray positibon naiimano nen Jehova ed siak.”​—M. M.

▪ “Nen kalangweran ak ni, nansagpotan kon tundaay inkaadik ed pornograpiya. Balet diad agano ni, apawil ko lamet. Nampatulong ak ed saray elder tan alabanan koy kakapuyan ko. Impasegurod siak na saray elder ya inaro ak na Dios tan walay panangasi tod siak. Balet no maminsan, say pakaliknak et singa anggapoy kanak, tan singano imposiblin naaro ak nen Jehova. Akatulong ed siak so eksperiensya nen Victoria. Atalosan ko la natan ya no iisipen kon agak naperdona na Dios, singak ibabagan kulang so imbagat na Anak to pian nasakbongan iray kasalanan ko. Kinatlik iyan artikulo pian naynay kon nabasa tan nodnonoten kada no naliliknak ya anggapoy kanak. Salamat ed sayan balibalin serye!”​—L. K.