Akin et Agnaeka-ekal so Kurapsion?
“Say too et uuleyan toy kapara ton too ed pakasakitan to.”—ECLESIASTES 8:9, NW.
AGTAYO niyamot ya ontan so nagagawa ed uley na too. Atan so sengegan na dakel ya irap. Nensaman ni et sasalien la na arum a totoo a gawaen ya patas so panagtrato ed amin, balet naaamper ira na inkaagum tan kurapsion. Akin kasi? Akin et agnaeka-ekal so kurapsion? Lapud sarayay taloran makaderal ya impluensya.
1. Impluensya na kasalanan.
Ibabaga na Biblia ya amin tayo et “uuleyan na kasalanan.” (Roma 3:9, Maung a Balita) Say kasalanan et singa agnatambal ya sakit a “manaayam” ed sikatayo. Diad loob na nilibon taon, singa arin “nanuley” ed too so kasalanan. Akatatak so “ganggan” na satan ed sikatayo. Lapud kasalanan, nagmaliw a makasarili so dakel odino uunaen day manpayaman o magmaliw ya maimpluensya anggano walay naagrabiado ra.—Roma 5:21; 7:17, 20, 23, 25.
2. Impluensya na mauges a mundo.
Say interon mundo et napnoy agum tan siblet. Kanian, nairapan so arum ya onsubad agus, a singa panangibaga. Lapud ambisyon, puros atagey a posisyon so iyuulo ra. Tan anggano sobsobra la, anap ni ran anap na kuarta. Makapaermen ta sarag day mantila odino mansaol pian labat naalay labay da. Imbes ya kontraen iyan mauges ya impluensya, ‘tinumbok da ray dakel a totoo a manggagawa na mauges.’—Exodo 23:2.
3. Impluensya nen Satanas a Diablo.
Si Satanas a rebelden anghel so “mamapalikdo ed interon mundo.” (Apocalipsis 12:9) Panlikliketan ton kontrolen iray totoo. Amta ton labalabay na totoo so mainawan bilay kanian tutuksoen to ran manpayaman anggad punton mansaol la ra.
Kasin say labay ton ibaga et singa tayo robot ya unor-unor labat ed si Satanas? Naamtaan tayo so ebat ed sayay onsublay ya artikulo.
