KASIN iisipen mon anggapo lay nagawaan ed kurapsion tan aglan balot nasolusyonan? Natural labat itan ya nalikna. Nensaman ni et sinali la na totoo so nanduruman klase na gobierno. Balet agda naeka-ekal so kurapsion. Nasabi kasi panaon ya anggapo lay mansaol?

Balibali ebat na Biblia! Ibabaga na satan ya agmanbayag et ekalen na Dios so kurapsion. Panon ton gawaen itan? Panamegley na Panarian to, say gobierno ed tawen ya manlinis ed dalin. Saya imay Panarian ya imbangat nen Jesus ya ipikasi na papatumbok to. Diad satan ya pikakasi, imbaga nen Jesus: “Onsabi la komoy panarian mo; nagawa komon ed tapew na dalin so linawam.”​—Mateo 6:10, MB.

Oniay imbaga na Biblia nipaakar ed si Jesu-Kristo ya Ari na satan a Panarian: “Iyaagel to ray mairap-bilay ya  ontatawag ed sikato, saray walad pankaukolan tan saray napapaulyan. Maabagey ed saray makapuy tan saray mairap-bilay; ilalaban toy bilay da ray walad pankaukolan. Iyaagel to rad kalalames tan kakairapan da.” (Salmo 72:12-14, MB) Nanengneng ed saya a kaskasian nen Jesus iray nabibiktima na kurapsion tan solusyonan toy paniirap da! Agta makapalikliket iya?

Sano onsabi lay Panarian na Dios, ekalen na sayan makasi tan makapanyarin manuley so kurapsion. Panon? Diad pangekal ed taloran sengegan na kurapsion.

Diad kaplesan, kaukolan tayo nin amin ya labanan so tendensian mankasalanan, a sengegan na pagmaliw ya makasarili. (Roma 7:21-23) Balet, wala nin siansia iray totoon malabay a manggaway duga. Manisia ran inatey si Jesus pian nadondon itayo tan lapud satan et naperdona iray kasalanan. * (1 Juan 1:7, 9) Pisalsalamatan na saratan a totoo so baleg a panangaro na Dios, a singa nabasa tayo ed Juan 3:16: “Ontan lay panangaro na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”

Walay makapalikliket ya gawaen na Dios parad saray matoor a totoo. Diad arapen, paandien to so amin a kasalanan, gawaen ton perpekto tan matunong so amin a totoo. (Isaias 26:9; 2 Pedro 3:13) Lapud anggapo lay kasalanan, anggapo met lay kurapsion. Diad Panarian na Dios, saray matoor a totoo et agla naaripen na kurapsion.

Makapaermen ta igagagala na dakel natan ya biktimaen so arum. Aanamoten da ray mairap-bilay tan susugsogan da ray arum ya mansaol met. Oniay bilin na Biblia ed sikara: “Saray makasalanan a totoo et ibeneg da komon so kabibilay da tan umanen day panagnonot da.” No magbabawi ira, ipopormisa na Biblia ya say Dios et “sipaparaan a mamerdona.”​—Isaias 55:7, MB.

Balet no mipaawetan ira, anggapo lay nagawaan na Dios noag say deralen ira. Diad panamegley na Panarian na Dios, nasumpal so impormisa na Biblia: “Manilalo kad si Jehova tan mansiansia kad dalan to . . . Sano naderal iray mauges, nanengneng mo itan.” * (Salmo 37:34, NW) No naandi la ray agmagbabawin mauges, agla nabiktima na kurapsion iray matoor ya mandadayew ed Dios.

Say sankagrabian a nankasalanan et si Satanas a Diablo. Misalsalamat tayo ta magano lan patundaen nen Jehova si Satanas tan agto la abuloyan ya mangimpluensya ed totoo. Agmanbayag, deralen la na Dios si Satanas. Aglan balot nasugsogan na sayan mauges a Diablo so totoo ya mansaol.

Ompano ibaga tayon kugkugip labat ’tay pangekal na Dios ed amin a kurapsion. Nayarin isipen tayo, ‘Sarag kasi na Dios ya gawaen itan? No on, akin et agto ni ginawa?’ Marakep iratan a tepet, tan walay balibalin ebat na Biblia ed satan. * Maabig no amtaen mon mismoy ibabangat na Biblia ya diad arapen et anggapo lay kurapsion.