AGKON balot nalingwanan imay kabuasan na Agosto 22, 2005. Lunes ed saman tan mangaalmusal kamin sankapamilya. Walay baleg a tumor kod utek tan 50-50 so bilay ko. Indaulo nen asawak a si Krishna so pikakasi, insan ak nansalita.

“Manpaopera ak. Iparaan yo lay sarili yo no antoy nagawgawa. Inayos ko lay ponpon ko, no bilang agko la ya nilabas. Diad sikayo ran manlilingkor ed si Jehova, panangasi yon agkayo onsusuko. Sikayo balet ya agni manlilingkor ed sikato, panangasi yon paiyaralan kayoy Biblia tan mila kayod Kingdom Hall, pian naamtaan yoy papanisiaan ko ya nasabi panaon et manayam ya andi-angga diad paraison dalin iray manlilingkor ed tuan Dios tan anggapo lay mansakit.”

Antis kon istoryaen so resulta na operasyon ko, istoryaen ko ni so nipaakar ed pamilyak tan no panon kon akabat so tuan Dios.

Manaayam so pamilyak ed baleg ya abung diad nipalandey a syudad na Durban, South Africa. Pian makasabi ed gate na abung mi, mantakayan ka ni na 125 ya steps. Matanaman so gilig na dalan ya paarap ed gate. Diad biek na gate et walay templo nen baik, ya napnoy litrato tan imahen na dirios na Hindu. Say kuan nen baik et “ugaw a templo” (mandir kī baccā diad Hindi) ak kuno tan niyanak ak lapud saray dirios ya dadayewen mi. Diad petek na sayan templo et walay masilesileng ya ambalangan takayan paarap ed puerta. Baleg so abung mi, walay hallway to, maawang ya kusina, pitoran kuarto, tan sakey nin kuarto diad paway. Duamplo tan pito kamin amin ya manaayam ditan, kaibay lakik tan baik, say tatay ko, taloran agagi ton lalaki, say bolirek dan bii, tan saray pamilya da.

Aliwan mainomay so pangasikaso ed onian kabaleg a pamilya. Balet lapud saniiba kami, marakep tan maliket so ulopan mi. Saray apatiran manugang, kaiba lay nanay ko a si Gargee Devi, so mankikimey ed abung. Mansusublayan iran manluto tan manlinis. Say ulo na pamilya et si lakik, tan sikatoy akauley ed panangan na interon pamilya. Kada Mierkoles, mititindaan ira di lakik tan baik tan mabetbet mi ran tatalaranan diad silong na kakiewan. No nabantag min sinmabi la ra, lumbaan min onepas ed takayan pian ibaan iran manlibit ed angkabaleg ya baskit da.

Diad hardin mi, wala ray ataragey ya kiew na palmira a panuubongan na saray siwit. Banbantayan mi ran ontiktikyab tan sankarengel mi uni ra. Lanang ya onyuyurong si baik ed arapan na puerta tan iistoryaan to kami, ya singa aaligen day uni na saray siwit. Dakel ya talagay agko nalingwanan ed saman ya abung! Maneelekan, manaakisan, manggagalaw, maniimisan, maniiteran kami​—malikeliket kamin pamilya. Say sankaimportantian ed amin, ditan mi akabat so  Amalsa ed sikatayo, si Jehova, tan say Anak ton si Jesu-Kristo.

Antis min akabat si Jehova, Hindu kami tan inagew-agew ya walay ritual mi. Lanang met ya wala ray angkabaleg ya selebrasyon mi, tan dakel so iimbitaan min mandayew ed nanduruman dios tan diosa. No maminsan legan na selebrasyon et nalemay si baik tan mitongtong ed saray espiritu. Tan diad eksakton pegley-labi, mangiyaapay kami na ayep pian nakuyong iray espiritu. Kabkabat met si lakik ya matulong ed saray panagpaalagey tan panangasikaso ed public schools tan templo na Hindu.

Nen 1972, nansakit si lakik tan inatey. Kayari pigaran bulan, si auntik Indervathey a kabat ed ngaran ya Jane et angawat na Watchtower tan Awake! ed duaran Tasi nen Jehova. Nakokonsiensia ta agto ra pinaloob ed abung. Agkami mitotongtong ed Saray Tasi. Balet nen pinmawil ira, pinaloob ira nen auntik tan imbaga tod sikaray problema tod si uncle ko ya buanges. Binagaan na saray kakaabay tan kakanayon si auntik ya idiborsyo to lay uncle ko. Et impaliwawa na Saray Tasi so panmoria na Dios nipaakar ed panangasawa. (Mateo 19:6) Apabilib si auntik ed bilin na Biblia tan ed pormisa na satan ya maliket a bilay diad dalin. * Anguman so nonot to tan agto tinaynan si uncle ko. Sikatoy nampaiyaral na Biblia ed Saray Tasi. Legan iran manaaral ed sala, midedengel iray arum ya manugang ed kuarto ra.

Ag-abayag, akila met lad panagaral na Biblia so amin ya manugang. Ibabaga nen auntik Jane so nanaaralan to tan mabetbet dan ibabasa ed sikami so libron Listening to the Great Teacher. * Nen naamtaan na saray uncle ko ya manaaral iray auntik na Biblia, ag-ira inmabuloy. Pinoolan na sakey ya uncle ko so amin ya literatura mi, tan pati say Biblia. Iningal-ingalan tan sinasakitan da kami sanen akiaral kami. Aliwan onman balet si tatay ko; agto kamin balot binawalan ya kabaten si Jehova. Tan agtinmundan akiaral so apatiran manugang kanian lalo dan naaroy Jehovan Dios.

Nen 1974, abautismoan si auntik Jane bilang sakey ya Tasi nen Jehova, tan sinmublay met lay nanay ko tan arum ni ran auntik. Asabi panaon, tinundaan la nen baik iray ritual na Hindu. Diad loob na pigay taon, miluluyos ak labat ya onatendid saray Kristianon pantitipon. Aminsan, diad sakey a kombension na Saray Tasi nen Jehova, tinepetan ak na sakey a Tasi a manngaran na Shameela Rampersad, “Kapigan ka manpabautismo ey?” “Anggapoy mangiyaaral na Biblia ed siak,” so kuan ko. Kanian inyaralan to ak. Diad sinmublay ya kombension  nen Disyembre 16, 1977, abautismoan ak. Ag-abayag, 18 ed saray 27 ya kapamilyak so abautismoan. Balet sanen operaan ak, siansia nin Hindu si tatay kon si Sonny Deva.

Akatulong na baleg ed siak so walad Filipos 4:6, 7, lalo la nen naamtaan kon walay baleg a tumor kod utek. Oniay inkuan na satan ya teksto: “Agyo pampapagaan so antokaman, noagta diad amin a bengatla et ipaamta yo ed Dios iray kerew yo diad panamegley na pikakasi tan masimoon a pikekerew tekep na pisasalamat; tan say deen na Dios a palumbasan toy amin a kanonotan so manbantay ed saray puso tan nonot yo diad panamegley nen Kristo Jesus.” Mairap ya kontroley ‘paga’ lalo la ta imbaga dad siak ya nayarin ompatey ak ed anggan anton oras. Nen unaan, akis ak lan akis, insan ak nampikasi ed si Jehova. Manlapu lad saman, aliknak so “deen na Dios a palumbasan toy amin a kanonotan.”

Singa bebembenan nen Jehova so kawanan a limak, tan aliknak ya agto ak pinaulyanan. (Isaias 41:13) Tinulongan to ak pian makpel kon nipaliwawad saray doktor so desisyon kon unorey ganggan na Biblia ya arawian so dala. (Gawa 15:28, 29) Say resulta et inmabuloy iray doktor ko ya agak saksakay dala. Kayari to, imbaga na doktor ya successful so operasyon tan nakal so interon tumor. Imbaga to met ya natan labat akanengneng na pasyenten maples ya inmabig kayari na komplikadon operasyon ed utek.

Kalabas na taloran simba, akapangiyaral ak la na Biblia anggano wala ak nid dukolan. Kayari pitoran simba, sarag ko lay manmaneho, manpulong, tan miaral. Pisalsalamatan koy tulong na saray kaagian kon angibad siak ed panagpulong. Walan walay kaibak tan sineguro dan akasempet ak. Akatulong ed maples ya inyabig ko so indengel ed saray audio recording na Biblia tan pannodnonot ko ed espiritual iran bengatla.

Malikeliket ak met ta kayari operasyon ko, nampaiyaral na Biblia si tatay ko ed saray Tasi. Abautismoan ira sanen 73 da, tan makulikuli ran manlilingkor natan ed si Jehova. Natan, masulok ya 40 a kakanayon ko so kaiba min manlilingkor ed si Jehova. Anggano nandeperensya so kawigin matak tan sinakaban na metal so ulok, aalagaren koy panaon sano gawaen la nen Jehova ya “balo so amin a bengatla” diad Paraison dalin.​—Apocalipsis 21:3-5.

Bendisyon ed siak so maaron asawak ya manlilingkor bilang elder ed kongregasyon, tan say magangganan marikit ko a si Clerista ya kakkaibak pian nituloy koy pampulong a full-time. Benendisyonan nen Jehova iyan pansasagpot ko. Atulongan koy dakel ya iyaaralan ko na Biblia pian nalikna day pakayari na Salitay Dios ed bilay da. Natan, indedika la na masulok ya 30 ed sikara so bilay dad Dios tan nampabautismo.

Pilpilaleken koy panaon sano iliktar itayo nen Jehovan Dios ed sayan mundon atabek na irap, tan gawaen ton paraiso so interon dalin.