ANGGANO sipor tayo lan makasalanan tan maksil so impluensya na mundo tan nen Satanas, sarag tayon labanan iratan! Panon? Diad iyapit ed Dios tan diad panumbok ed epektibon prinsipyo na Salita to, say Biblia. Nengnengen tayoy duaran alimbawa.

PRINSIPYO NA BIBLIA: “Agyo aaligey panagbilay na sankamundoan.”​—Roma 12:2, MB.

Tuan eksperiensya: Si Guilherme et mayaman a negosyante ed Brazil. Inamin ton mairap so magmaliw ya matua. Imbaga to: “Mainomay ya naalig na negosyante so panagsaol na arum ta grabe so pressure odino kompetisyon ed kompanya. Ipapasen na dakel ya normal labat so mangiter tan mangawat na pasuksok. No negosyante ka tan baleg so puonan mo, makapatuksoy mansaol.”

 Anggaman ontan, alabanan nen Guilherme iyan tukso. Imbaga to: “Anggano parte la na negosyo so panagsaol, sarag tayo nin siansiay magmaliw a matua. Kaukolay pakpel. Atulongan ak na Biblia pian nanengneng ya maabig so nagawaan na pagmaliw a matua. Say matuan too et walaay malinis a konsiensia, deen na nonot, tan respeto ed sarili. Tan sikatoy maong ya ehemplo ed arum.”

PRINSIPYO NA BIBLIA: “Saramay manpipirawat ya onyaman et napelag ed tukso tan patit tan dakel ya andi-kabaliksan tan makapasakit a pilpilalek, a mangilelereg ed totoo diad kadederal tan kabagbag. Ta say panangaro ed kuarta et lamot na amin a makaderal a bengatla.”​—1 Timoteo 6:9, 10.

Tuan eksperiensya: Si André so akanggawa ed sakey a kompanya ya mani-install na security system. Kliyente to so sakey a baleg ya soccer club. Aminsan, kayari na galaw, linma si André ed administration offices tan impanengneng toy invoice na babayaran dad sikato. Busy ni ed saman so financial department ya manbibilang na kuartan nanlapud ticket offices. Lapud lablabi la, nanapuran nambayar so supervisor ed saray supplier, kaiba lay André.

Inistorya nen André: “Nen wala ak lad dalan, abilang kon sobray imbayar na supervisor ed siak. Amtak ya agto amta no siopad sikami so naikdan toy sobra. Balet amtak met ya kaskasian ta saraan toy kuartan nababalang! Kanian pinmawil ak. Akiletletan ak ed saray ompapaway ya fans tan impawil koy kuarta. Agmakapanisia may supervisor ta natan labat agawan walay angipawil na kuarta ed sikato.”

Imbaga ni nen André: “Nirespeto ak na supervisor lapud saman. Kalabas na pigaran taon, siak labat lay supplier ya wala ni kontrata to ed club. Misalsalamat ak ta diad impanumbok kod atagey a prinsipyo na Biblia, maong so reputasyon ko.”

Makapalikliket a naamtaan ya diad tulong na Dios et nalabanan tayo iray mauges ya impluensya. Balet, agtayo sarag a bukor ya panampoten so kurapsion. Masyadon mairap parad too ya solusyonan iyan bukor. Kasin say labay ton ibaga et agbalot manampot so kurapsion? Nengnengen tayoy marakdakep ya ebat na Biblia ed sayay onsublay ya artikulo.