Nianak ak ed Moundsville, sakey a mareen a baley ed abay na Ohio River diad bandad norte na West Virginia, U.S.A. Komadua ak ed apatiran ananak. Talora kamin lalaki kanian singa agla ondedeen so abung mi. Makuli tan matua iray atateng ko tan maaro rad saray totoo. Agkami mayaman, balet ta walad sikami iray manunan kaukolan mi. Lapud Tasi nen Jehova iray atateng mi, ugugaw kami ni labat et ginawa da lay anggaay nayarian dan ibangat ed sikami so Biblia.

Nen tinedyer ak la, kalkalnan niyarawi so pusok ed saray katuaan ya imbangat ed siak. Agak la segurado no kasin say pambilay unong ed saray ganggan na Biblia et talagan makapaliket. Inisip kon magmaliw ak a talagan maliket no nagawaan koy amin a labay ko. Agnambayag, agak la oonlad Kingdom Hall. Nagmaliw met a rebelyoso so duarad saray agagik. Ginawa la na saray atateng mi so anggaay nayarian da pian tulongan kami, balet ta agmi ra dinengel.

Agko naisip a say panggawa na amin a labay ko et manresultad dakel a problema. Aminsan, nen pasempet ak manlapud eskuelaan, inikdan ak na kaarok na sigarilyo tan inawat ko itan. Manlapud saman, inggapok lan gawaen so arum nin mauges ya bisyo. Nagmaliw ak lan adik, buanges, tan imoral lay kabibilay ko. Diad tinmumbok iran taon, kalkalna ak met ya angusar na mas mabiskeg iran druga tan naaripen ak na saratan. Lapud grabe lay inkaadik ko, nanlako ak na saray druga pian nasuportaay bisyok.

No kapigan ko ibabaliwalay konsiensiak, diman to ak mas papanonotan ya aliway gagawaen ko. Balet parad siak atrasado lan amin, tan agla nipawil so dati. Anggaman wadtan iray kakaarok, oonla kamid saray party tan concert, lanang kon nalilikna a bukbukor ko tan maer-ermen ak. Wala ray panaon a nanononotan ko no panon kamaong iray atateng ko, tan pankelawan ko no akin et agko ra tinulok.

Parad siak, singa agak la makapanguman, balet aliwan ontan so iisipen na arum. Nen taon 2000, inimbitaan ak na atateng kon onlad kombension na Saray Tasi nen Jehova. Apilitan ak ya linma, balet abigla ak ta wadman met iramay duaran agagik.

Legan na kombension, anonotan ko ya nen imbeneg a taon et nambantay ak diman na concert. Anengneng koy baleg ya pandumaan tan talagan atenyeg so pusok. Diad saman ya concert, atakatak so basura tan maasewek lapud sigarilyo. Saramay nambantay et anggapoy pibabali da, tan makapaermen so lyrics na saray musika. Balet diad kombension et maliket iray totoo tan in-welcome da ak anggano pigay taon ko la ran ag-anengneng. Malinlinis so lugar, tan say arengelan ko ditan et makapaliket. Pankelawan ko no akin et agko inunor so ibabangat na Biblia anta marakep manaya.—Isaias 48:17, 18.

Lapud naeksperiensya mid kombension, kayarin tampol na satan, siak tan saray duaran agagik et amawil ed Kristianon kongregasyon. Inawat min talo so panagaral na Biblia.

Akatulong a maong ed siak imay tekston nabasad Santiago 4:8 a kuan ton, “Onapit kayo ed Dios, tan sikatoy onapit ed sikayo.” Naamtaan ko a no labay koy onapit ed Dios, kaukolan kon umaney kabibilay ko. Kaukolan ko met ya itunday panguusar koy tabako, druga, tan alabas a kakainum.—2 Corinto 7:1.

Agak la akiulop ed saray datin kakaarok tan say akiulopan ko la et saray mandadayew ed si Jehova. Baleg so naitulong na samay elder na saray Tasi ya angiyaral ed siak. Ontatawag tan onsasamar a lanang ed abung mi pian komustaen to ak. Anggad natan, sikatoy sakey ed saray maapit a kakaarok.

Nen taon 2001, abautismoan ak bilang sakey a Tasi nen Jehova kaibay duaran agagik. Talagan malikeliket iray atateng mi tan samay matoor ya agi mi nen nanuulop lamet so pamilya mi a mandayew ed si Jehova.

Dati et iisipen kon istrikto iray ganggan na Biblia, balet natan et amtak lan proteksion iratan. Atulongan ak na Biblia ya itunda so panguusar tan panlalako na druga tan mas responsable ak la natan.

Nagmaliw ak a kabiangan na Saray Tasi nen Jehova diad interon mundo. Walay tuan aroan na sarayan totoo ed sakey tan sakey, tan nankakasakey iran mandadayew ed Dios. (Juan 13:34, 35) Ditan ko met nalmo so espisyal a bendisyon—say inad-arok ya asawa, si Adrianne. Malikeliket kamin manlilingkor a saniba ed Amalsa.

Imbes a manbilay parad sarilik labat, manbuboluntir ak la natan bilang full-time a ministro, a manbabangat ed totoo no panon met iran nabendisyonan lapud Salita na Dios. Diad sayan kimey ko alikna so agnaparaan a liket. Talagan nibagak ya inuman na Biblia so bilay ko. Bulos ak la natan.