Labay mo kasin naamtaan so katuaan nipaakar ed Dios—say personalidad to, saray labay to tan agto labay? Impaamta nen Jehova a Dios ed sikatayo so amin a katuaan nipaakar ed sikato diad Salita to, say Biblia. Balet aliwan amin a makabasa ed Biblia et makatalos ed katuaan. Akin? Lapud say pakatalos ed katuaan et sakey a pribilehyo, ag-itan niiter ed amin. Imanoen tayo pay imbaga nen Jesus nipaakar ed saya.—Basaen so Mateo 11:25.

Oniay nabasad gapo na satan a bersikulo: “Diad saman et imbaga nen Jesus.” Kanian say ontumbok ya ibaga nen Jesus et reaksion tod samay kakkayarin agawa. Nampasnokan to ray totoon agdinmengel a nanlapud taloran syudad na Galilea ya angipanengnengan toy makapanyari iran milagro. (Mateo 11:20-24) Nayarin nitepet yo: ‘Anta anengneng da la lanti milagron ginawa nen Jesus akin et agni ra manisia ed katuaan ya ipupulong to?’ Say rason na agda indengel et lapud anawet so puso ra.—Mateo 13:10-15.

Amta nen Jesus a pian natalosan iray katuaan a walad Biblia, kaukolan so duaran bengatla: Tulong na Dios tan puson akaparaan a mangawat. Imbaga nen Jesus: “Idayew ta ka ed arap na totoo, Ama, a Katawan na tawen tan dalin, lapud inyamot mo irayan bengatla ed saray marunong tan mautek balet imparungtal mo iraya ed saray ugugaw.” Natatalosan yo ta la no akin a say pakaamta na katuaan a walad Biblia et sakey a pribilehyo? Si Jehova so walaan na kanepegan a mangipaamtay katuaan, lapud sikatoy “Katawan na tawen tan dalin.” Balet anggapoy pipilien na Dios a pangipaamtaay katuaan, lukas iya ed amin. Antoy pangibabasiyan na Dios akin et ipapaamta toy katuaan ed arum balet ta diad arum et andi?

Labalabay nen Jehova iray mapaabeba, balet ta kabusol to ray mapaatagey. (Santiago 4:6) Iyaamot toy katuaan ed saray “marunong tan mautek”—saray matalino tan de-aral ed mundo ya lapud mapaatagey tan matalek irad sarili da et agda iisipen a kaukolan day tulong na Dios. (1 Corinto 1:19-21) Balet ta ipapaamta to so katuaan ed saray “ugugaw”—totoon onaasingger ed sikato a walaan na puson akaparaan a mangawat tan mapaabeba. (Mateo 18:1-4; 1 Corinto 1:26-28) Anengneng a mismo nen Jesus iyan duaran klase na totoo. Ag-atalosan na saray mapaatagey tan edukadon lider na relihyon so mensahe nen Jesus, balet ta atalosan itan na saray managsigay. (Mateo 4:18-22; 23:1-5; Gawa 4:13) Wala met iray mayaman tan de-aral a totoon angipanengneng na tuan kapaabebaan tan nagmaliw a papatumbok nen Jesus.—Lucas 19:1, 2, 8; Gawa 22:1-3.

Pawilen tayo ’may tepet diad gapo na sayan artikulo: Labay mo kasin naamtaan so katuaan nipaakar ed Dios? No ontan, maliket kan makaamta ya agpipilien na Dios iramay matalino ed sayan mundo. Imbes, labalabay to iramay nayarin memelmelagen na saray matalino. No maong so motibom tan mapaabeba kan manaral na Salita na Dios, nayarin sakey ka ed saray pangiteran nen Jehova na importantin regalo—say pakatalos ed katuaan nipaakar ed sikato. Satan a pakatalos et mangarum na liket ed bilay mo natan, tan nayarin naawat moy “peteg a bilay”—bilay ya andi-angga ed balon mundo ya insipan na Dios ya asingsingger la. *—1 Timoteo 6:12, 19; 2 Pedro 3:13.