Sayan magasin ya babasaen yo et ginmapon niimprinta nen Hulyo 1879. Dakel lay anguman manlapu lad saman, ontan met ed sayan magasin. (Nengnengen iray litrato.) Onggapo ed sayan isyu, wala ni ray arum a pananguman ed format na Say Panag-bantayan. Antoy balo ed sayan isyu?

Diad dakel a bansa, ondarakel iray totoon makakaala na impormasyon diad Internet tan mas mainomay itan parad sikara. Sakey click labat ed mouse et makala la ran tampol na saray impormasyon a naromog labat ed Internet. Dakel met la ray nabasad online a libro, magasin, tan dyaryo.

Lapud dakel lay malabay a manbasad online, inuman mi so disenyo na Web site a www.pr418.com pian mas makaingganyo tan mainomay ya usaren. Saray man-browse ed sayan site et makabasad saray publikasyon ya niimprinta ed masulok a 430 a lenguahe. Balet, manlapud sayan bulan, saray onlad satan a Web site et makabasa met na saray apilin artikulo a ni-publish lad saray publikasyon mi.

Lapud dakel lan artikulo so nabasad online, manlapud sayan isyu, say publikon edisyon na Say Panag-bantayan et walaan labat na 16 a pahina. Diad kaplesan, say Panag-bantayan et ipa-publish ed 204 a lenguahe. Lapud daiset lay pahina na sayan magasin, posible lan ipatalos iyad mas dakel a lenguahe.

Iilaloan mi a lapud sayan pananguman et mas dakel a totoo so makabasa na manangisalbay bilay a mensahe na Biblia. Determinado kamin itultuloy so pangiter na dakel ya impormasyon a pakaaralan—diad sayan magasin tan diad online—pian nagunggonaan iray dakel a manbabasa ya manrerespetod Biblia tan malabay a makaamta no anton talagay ibabangat to.

Saray Manangipalapag