Antoy reaksion mo no narerengel moy petsan Disyembre 21, 2012, ya unong ed kalendaryo na saray Maya et walay nagawan pananguman ed interon mundo? Depende ed iilaloan mo, ompan nainawaan, nadismaya, o baliwala labat itan ed sika. Kasin sakey lamet iyan palpak a prediksion ed isabi na anggaay mundo?

Panon to balet imay “anggaan na mundo” ya ibabaga na Biblia? (Mateo 24:3, King James Version) Nandurumay reaksion na totoo. Wala ray natatakot ompan napoolay mundo, interesadoy arum ed saray nagawa, wala met iray onsasawa lan makakarengel ya magano lan onsabi anggaan. Kasin nibase irayan reaksion ed katuaan odino imahinasyon labat?

Ompan nabigla ka no naamtaan moy talagan ibabaga na Biblia nipaakar ed anggaan na mundo. Aglabat ibabaga na Biblia iray rason no akin a labay tayo lan onsabi anggaan, naamtaan tayo met ditan a nayarin wala ray nadismaya no singa mabayag nin onsabi itan. Labay min ipaamta ed sikayo so ebat na Biblia ed saray tepet nipaakar ed anggaay mundo.

EBAT NA BIBLIA: “Malet so impangiletneg [na Dios ed] mundo diad saray pundasyon to, et agbalot nagalaw.”—SALMO 104:5, Maung a Balita.

Agderalen na apoy odino na anggan anton bengatla so dalin. Imbes, ibabangat na Biblia a sayan planeta et panayaman na totoo ya andi-angga. Oniay ibabaga na Salmo 37:29: “Say matunong tawiren to so dalin tan manayam diman lawas.”—Salmo 115:16; Isaias 45:18.

Kayarin pinalsa na Dios so dalin, inkuan ton satan et ‘maong a tuloy,’ tan ontan nin siansiay nalilikna to. (Genesis 1:31) Agto planon deralen itan. Imbes, insipan ton ekalen to “iramay manederal ed dalin” tan protektaan to itan pian agpermanentin naderal.—Apocalipsis 11:18.

Balet ompan nanonotan mo imay walad 2 Pedro 3:7. Oniay nabasa: “Say katawenan tan say dalin a wala natan et nigana ed apoy.” Agta ipapanengneng na satan a say dalin et napoolan? Diad tua, no maminsan et uusaren na Biblia iray terminon “katawenan,” “dalin,” tan “apoy” bilang simbolo na sakey a bengatla. Singa bilang, sanen imbaga na Salmo 66:4 ya, “Amin a dalin dakmomoan da ka, tan kantaan da ka,” inusar toy “dalin” pian mangisimbolod totoo.

Nanengneng ed konteksto na 2 Pedro 3:7 ya say katawenan, dalin, tan apoy a nabasa ditan et simbolo labat. Diad bersikulo 5 tan 6 nanengneng ya mipara itan ed agawad agew nen Noe. Ditan et nabasa tayo ya aderal so mundo nensaman, balet ta nansiansia so planeta tayo. Imbes, say “dalin” ya atukoy ya aderal ed Delap et saray mauges a totoo. Dineral met na satan so “katawenan,” odino saray totoon manguuley. (Genesis 6:11) Ontan met, impropesiya na 2 Pedro 3:7 so permanentin kaderal na saray mauges a totoo tan kurap a gobierno.

EBAT NA BIBLIA: “Say mundo tan say pilalek na satan et agmansiansia, balet samay manggagawa na linawa na Dios et mansiansia ed andi-anggaan.”—1 JUAN 2:17.

Say “mundo” ya naderal et aliwan sayan planeta, noagta saray totoo ed mundo a say panagbilay da et kontra ed labay na Dios. No panon ya eekalen na sakey a surgeon so tumor a makakanser  pian nisalbay pasyente, ekalen met na Dios iray mauges, pian talagan panliketan na maong a totoo so bilay ed dalin. (Salmo 37:9) Kanian say “anggaan na mundo” sirin et maabig a bengatla.

Say ontan a positibon panagnonot ed “anggaan na mundo” et nanengneng met ed arum a bersion na Biblia ya say impangipatalos ed satan a salita et “say kasampotan na sistema na bengabengatla” odino “anggaay panaon.” (Mateo 24:3, MB) Lapud wala ray totoon makaliktar tan sayan mundo et agnaderal, agta manepeg labat ya walay balon sisteman onsublay? Say ebat na Biblia et on, ta abitla ditan so “onsabin mundo.”—Lucas 18:30.

Tinawag nen Jesus itan a “pamasimbalo ed amin a bengatla.” Diad satan a panaon, ipawil toy orihinal a gagala na Dios parad totoo. (Mateo 19:28) Panliketan tayo lad satan so

• Paraison dalin a walaay kareenan tan maaligwas a panagbilay.—Isaias 35:1; Miqueas 4:4.
• Trabahon makagunggona tan makapenek.—Isaias 65:21-23.
• Pakatambal na amin a sakit.—Isaias 33:24.
• Ipawil ed inkatobonbalo.—Job 33:25.
• Kioli na saray inatey.—Juan 5:28, 29.

No gawaen tayoy “linawa na Dios”—saray kakaukolanen tod sikatayo, agtayo nepeg a takotan so anggaan na mundo. Imbes, tatalaranan tayo lay isabi na satan.

EBAT NA BIBLIA: “Sano nanenengneng yo a nagagawa la irayan bengatla, amtaen yo ya asingger lay panarian na Dios.”—LUCAS 21:31.

Diad libron The Last Days Are Here Again, insulat nen Professor Richard Kyle a “say biglan pananguman, tan saray panggugulo na totoo so rason no akin ya wala ray mangibabagan onsabi lay anggaan na mundo.” Lalo la no saray nagagawa et mairap ya ipaliwawa.

Saramay propetan angipasakbay ed anggaan na mundo et agmangipapaliwawa ed agnatalosan iran ebento ya agawa ed panaon da. Imbes, tinulongan ira na Dios ya isulat iray ebento a pakapatnagan a seguradon mangangga so mundo. Imanoen so pigarad saratan a propesiya tan nengnengen no talagan nagagawa la iratan ed panaon tayo.

•   Guerra, eras, yegyeg, idarakel na graben sakit.—Mateo 24:7; Lucas 21:11.
• Idarakel na krimen.—Mateo 24:12.
• Panederal na totoo ed dalin.—Apocalipsis 11:18.
• Pangaaro na totoo ed sarili da, kuarta, tan likeliket imbes a say Dios.—2 Timoteo 3:2, 4.
• Pakakabuyak na pamilya.—2 Timoteo 3:2, 3.
• Agpangim-imano na totoo ed ebidensya ya asingger lay anggaan.—Mateo 24:37-39.
• Panangipulong ed maong a balita na Panarian na Dios diad interon mundo.—Mateo 24:14.

Singa ed imbaga nen Jesus, no nanengneng tayo la “irayan amin a bengatla,” amta tayon say anggaan na mundo et asingger la. (Mateo 24:33) Parad saray Tasi nen Jehova, mabiskeg so ebidensya ya asingger lay anggaan, tan ipupulong da itan ed 236 a bansa.

EBAT NA BIBLIA: “Sano ibabaga ran: ‘Kareenan tan kaligenan!’ et tampol ya onsabi ed sikara so biglan kadederal a singa pampapasakit na biin malukon; tan ag-iran balot makaliktar.”—1 TESALONICA 5:3.

Inkompara na Biblia so kaderal na mundo ed pampasakit na malukon—segurado tan ag-iilaloan so isabi na satan. Say panaon antis na anggaan et nikompara met ed panaglukon. No nalikna ton onsasakit lan onsasakit so eges to, amta ton asingger lay pananak to. Nayarin ibaga na doktor so petsa na pananak to; balet anggano linmampas lad satan a petsa, seguradon sikatoy mananak. Ontan met, anggano agsinmabi anggaan ed panaon ya iilaloan na arum, siansia nin paneknekan na saray nagagawa ya manbibilay tayo lad “kaunoran iran agew.”—2 Timoteo 3:1.

Nayarin nitepet yo, ‘No mapatpatnag ya asingger tayo lad anggaan, akin et ag-iya naiimano na dakel a totoo?’ Nabasad Biblia ya no kapigan asingger lay anggaan, dakel so mangibaliwala ed saray ebidensya. Imbes ya bidbiren dan wala ray nagagawan baleg a pananguman ed kaunoran iran agew, ibaga ran: “Pareho nin siansia so amin a bengatla manlapu la nen apalsa  so mundo.” (2 Pedro 3:3, 4) Anta mapatpatnag la lanti iray tanda na kaunoran ya agew, dakel ni agmanisia ed saratan.—Mateo 24:38, 39.

Apantongtongan ed sayan artikulo so pigara labat ya ebidensya ed Biblia ya asingger lay anggaan. * Kasin labay moy makaamta na kaaruman ya impormasyon? Sarag mon kontaken iray Tasi nen Jehova parad libren panagaral ed Biblia. Nayarin iyaralan da kay Biblia diad abung mo, telepono, odino diad arum a pasen a kombenientid sika. Say kaukolan labat et say panaon mo, tan seguradon minabang ka.