Kasin manisia kad pormisa na Biblia ya kioli? * Talagan marakdakep so ilalon nakaiba lamet iray inaro tayod bilay ya inatey. Balet, kasin realistiko iyan ilalo? Pian naebatan itan, ikonsidera tayoy alimbawa na saray apostol nen Jesu-Kristo.

Talagan anisia iray apostol ed kioli. Akin? Lapud duaran rason. Unona, say ilalo da et manunan akabased sayan katuaan: Si Jesus mismo et apaoli. Anengneng na saray apostol—tan “masulok a limanlasus ya agagi diad sakey a pankanawnawa”—so apaolin si Jesus. (1 Corinto 15:6) Sakey ni, say inkioli nen Jesus et pinaneknekan tan inawat na dakel, a singa ipapanengneng na apatiran ebanghelyo.—Mateo 27:62–28:20; Marcos 16:1-8; Lucas 24:1-53; Juan 20:1–21:25.

Komadua, anengneng na saray apostol so taloran impamaoli nen Jesus—unona et diad Nain, insan diad Capernaum, tan ed Betania. (Lucas 7:11-17; 8:49-56; Juan 11:1-44) Say sampot ed saraman ya impamaoli, ya atukoy ed inmunan artikulo, et nipaakar ed pamilyan maapit ed si Jesus. Nengnengen tayo pay arum nin agawa.

“Say agim et onoli.” Imbaga iya nen Jesus ed si Marta, ya say agi ton si Lazaro et apat agew lan inatey. Agtampol atalosan nen Marta so imbaga nen Jesus. “Amtak a sikatoy onoli,” so inyebat nen Marta. Balet say amta to et nagawa ni itan ed arapen. Imadyin mo pa labat so impakabigla nen Marta sanen kayari ton nadngel so imbaga nen Jesus ya “Siak so kioli tan say bilay,” et anengneng toy impamaoli nen Jesus ed agi to!—Juan 11:23-25.

Iner so kawalaan nen Lazaro legan ya sikatoy apat agew ya inatey? Anggapoy imbaga nen Lazaro ya mangipapanengneng ya sikatoy nambilay ed arum ya lugar. Anggapoy imortal ya kamarerwa nen Lazaro ya linmad tawen. Sanen pinaoli si Lazaro, sikatoy agpinaleksab nen Jesus diad dalin pian taynan so marakep ya kipapasen tod tawen kaibay Dios. Kawalaan sirin nen Lazaro diad saman ya apat agew? Sikatoy nanaugip ed lubok.—Eclesiastes 9:5, 10.

Tandaan, inkompara nen Jesus so patey ed ugip ya nayarin bangonen so sakey panamegley na kioli. Oniay salaysay na Biblia: “‘Say kaaro tayon si Lazaro et manpapainawa, balet onla ak diman  pian bangonen ko ed ugip to.’ Kanian inkuan na saray disipulo ed sikato: ‘Katawan, no sikatoy manpapainawa, sikatoy onabig sirin.’ Balet say imbaga nen Jesus et nipaakar ed impatey nen Lazaro. Ingen ta inisip dan say ibabaga to et nipaakar ed panagpainawa ed ugip. Kanian diad saman et imbaga la nen Jesus ed sikara: ‘Inatey lay Lazaro.’” (Juan 11:11-14) Diad impamaoli ed si Lazaro, impawil nen Jesus so bilay to pian nakaiba so pamilya to. Talagan makapakelkelaw so regalo nen Jesus ed saman ya pamilya!

Saray ginawan impamaoli nen Jesus diad dalin et mangipapanengneng labat na saray gawaen to diad arapen bilang Ari na Panarian na Dios. * Legan na uley nen Jesus diad dalin, bilayen to lamet iramay totoon nanaugip ed lubok. Kanian imbaga to: “Siak so kioli.” Isipen pa labat so liket sano nanengneng mo lamet iray inad-arom! Tan isipen pa met so liket na saramay napaoli!—Lucas 8:56.

Imbaga nen Jesus ed si Marta: “Samay mangipapanengneng na pananisia ed siak, anggano sikatoy ompatey et ombilay lamet; tan balang sakey a mabilay tan mangipapanengneng na pananisia ed siak et aglan balot ompatey.” (Juan 11:25, 26) Saramay bilayen lamet nen Jesus legan na sanlibon taon ya uley to et nawalaay ilalo ya manbilay ya andi-angga—basta manisia irad sikato.

Kayari na saraman ya imbaga nen Jesus nipaakar ed kioli, tinepetan toy Marta: “‘Manisia ka ed saya?’ Inkuan to ed sikato: ‘On, Katawan, manisia ak a sika so Kristo ya Anak na Dios.’” (Juan 11:26, 27) Sika ey? Labay mo met kasi nawalaay malet ya pananisia ed ilalon kioli, a singa si Marta? Say unonan gawaen mo et mangala kay kakabatan nipaakar ed gagala na Dios parad totoo. (Juan 17:3; 1 Timoteo 2:4) Lapud satan ya kakabatan et nawalaan kay pananisia. Maabig no kerewen mod Saray Tasi nen Jehova ya ipanengneng dad sika no antoy ibabangat na Biblia nipaakar ed sayan topic. Maliket dan ipaliwawad sika so makapakelkelaw ya ilalon kioli.