Nianak ak ed Riga, say capital na Latvia. Say nanay mi so amabaleg ed sikami nen atsik. Anggano Katoliko si Nanay, mimimisa kami labat no wala ray piesta. Manisia ak la nensaman ed sakey ya makapanyari, balet bilang kalangweran, dakel so arum nin mas paninteresan ko.

Diad ibabaleg ko, naimano nen nanay ko a mahilig ak ya manbagbag na gamit insan ko lanlamang tuopen iratan. Lapud amayamay so gamit ed abung mi ya nayarin bagbagen ko, aburidon lanang si nanay ko no natilak ak ya bukor. Kanian inikdan to ak na tutuopen ya metal a gakgalaw ya labalabay kon buoen insan bagbagen lamet. Satan ya hilig ko et dugarugad sakey nin paninteresan ko—say panag-motorbike. Impa-membro ak nen nanay kod sakey ya club parad lumbay motorbike a say tawag et Zelta Mopēds (The Golden Moped.) Ginmapo ak ya milad lumbay moped odino de-motor ya bisikleta, anggad nen kien et motorsiklo la.

Maples ak ya makaaral kanian ag-abayag et nagmaliw ak ya maong ed sayan delikadon isport. Amitlo ak ya analo ed championship na Latvia, tan amidua ak ya analo ed Baltic States Superbike Championship.

Nen kaksilan na pilulumbak, akabat na girlfriend kon si Evija (a nagmaliw ya asawak) iray Tasi nen Jehova. Wala ray nalmo ton literatura ya walay coupon parad pan-request na panagaral na Biblia. Sinulatan to imay coupon insan to impawit. Ag-abayag, walay duaran Tasi ya binmisita ed sikato, tan inyaralan day Biblia. Ayos labat man ed siak, balet diad saman et agak interesadod relihyon.

Ag-abayag, inopresian ak na saray Tasi ya mangobserba tan ondengel ed panagaral na Biblia nen Evija. Pinmayag ak tan agustoan koy nadngel ko. Say sakey ya talagan akasabid  pusok et say pormisa na Biblia ya paraison dalin. Singa bilang, impanengneng dad siak so Salmo 37:10, 11 ya say kuan to: “Wala ni so daiset, et say bagel onandi; on, imanom so pasen to, et onandi. Ingen ta saray mauyamo tawiren da naani dalin, tan manliket ira a dili ed inkadaakan na kareenan.” Talagan labalabay ko itan ya pormisa.

Tuloytuloy ya naaruman so interes kod espiritual. Amoriak ya amayamay so katilaan ya ibabangat na relihyon. Balet pandinayewan ko ray bangat na Biblia ta makatunongan tan malinlinew.

Legan kon itutultuloy so panaaral koy Biblia, naaralan ko ya papablien a maong nen Jehova so bilay. Talagan importante itan ed sikato. (Salmo 36:9) Baleg so epekto na satan ed pilulumbak—agko la labay ya irisgay bilay ko. Imbes, labay kon usarey bilay kod pangigloriad si Jehova. Kanian, agla importantid siak so inkasikat tan say liket ed pilulumbay motorsiklo.

Nen 1996, inmatendi ak ed internasyonal a kombension na Saray Tasi nen Jehova diad Tallinn, Estonia, ya asingger ed istadyum ya mabetbet kon pilulumbaan nensaman. Diad kombension, anengneng ko ray totoon nanlapud nanduruman bansa ya saniiba ya walaan na pankakasakey tan kareenan. Singa bilang, nen abalang na sakey a Tasi so pitaka to, inisip kon agto la itan naromog. Kabebekta, walay Tasin akalmo ed satan tan impawil to ya anggapoy abalang. Mankelkelaw ak! Talagan apaneknekan kon iyaaplika na saray Tasi so nanaaralan dad Biblia. Intultuloy mi nen Evija so panaaral mi, tan nen 1997 et abautismoan kami bilang Tasi nen Jehova.

Arum ed saray datin kakaarok et inatey lapud delikado tan maples ya panag-motor da. Diad impanaral koy Biblia, atalosan kon walay responsabilidad kod Manangiter na bilay, si Jehova. Nayarin satan ya naaralan ko so angisalba ed bilay ko.

Apat taon kamin akapanlingkor nen Evija ya full-time ed branch office na Saray Tasi nen Jehova diad Riga. Natan et maliket kamin mamapabaleg ed anak min bii ya si Alise, tan tutulongan min aroen toy Jehova. Pribilehyok met so mantrabaho na sakey agew ed kada simba diad translation office, ya mangapiger na saray luganan tan arum ni ran bengatlan aderal. Talagan naliliketan ak no nauusar koy abilidad ya naaralan ko nen ugaw ak ni! On, anggad natan et manbabagbag ak ni ray gamit insan ko lanlamang tutuopen iratan.

Talagan papablien ko so pribilehyo a mantasi nipaakar ed saksakey a tuan Dios kaibay pamilyak, tan misalsalamat ak ed naaralan kod Biblia. Talagan anguman so bilay ko lapud pormisa ya paraison dalin!