Anthony: Kumusta Tim? Maong ta asabian ta ka.

Tim: Ayos met labat.

Anthony: Inyawitan ta kay balon isyu na Say Panag-bantayan tan Onliing! Seguradon nagustoan mo ray artikulon wadia.

Tim: Salamat a. Diad tua, maong ta linma ka dia ta walay labay kon itepet ed sika.

Anthony: Anto man ey?

Tim: Akatongtong ko may katrabahok nen imbeneg ya agew. Naistoryak ed sikato iramay inter mod siak ya pamphlet tan imbagak ya makapainteres iraman. Balet imbaga ton agko kuno babasaen iraman ta agmanisiad si Jesus iray Tasi nen Jehova. Tua ’man? Imbagak ed sikato ya tepeten kod sika no ompawil ka dia.

Anthony: Marakep ta nantepet kad siak. Maong labat ya say nantepetan mon mismo et sakey ed Saray Tasi nen Jehova. Siempre pian naamtaan moy papanisiaan na sakey a too, agta mas maabig no sikaton mismoy tepetan mo?

Tim: Lanti, naisip ko met ’tan.

Anthony: Say tua et talagan manisia iray Tasi nen Jehova ed si Jesus. Parad sikami ingen et importante so pangipanengneng na pananisia ed si Jesus pian nilaban itayo.

Tim: Antak ya manisia kayo, balet nen imbaga to ’may katrabahok ya agkayo manisiad si Jesus, mankelaw ak. Singa agta ni ’yan balot apantongtongan.

Anthony: Walay ipabasak ed sikan pigaran bersikulo ed Biblia ya mangipanengneng ya importante so pananisia ed si Jesus. Mabetbet ya uusaren na saray Tasi nen Jehova irayan bersikulo no manpupulong ira.

Tim: Sige pa sirin.

Anthony: Mas marakep no igapo ta ed imbagan mismo nen Jesus diad Juan 14:6. Sarayan salita et imbaga nen Jesus nen katongtong toy sakey ed saray apostol to. Oniay nabasa: “Inkuan nen Jesus ed sikato: ‘Siak so dalan tan say katuaan tan say bilay. Anggapo so makasabi ed Ama no aliwan diad panamegley ko.’” Unong ed satan a bersikulo, anto labat so paraan pian makaasingger ed Ama?

Tim: Panamegley nen Jesus.

Anthony: Duga. Tan talagan panisiaan itan na saray Tasi nen Jehova. Tepetan ta ka pa: No manpikasi so sakey a too, diad siopan ngaran to itan nepeg ya iparalan?

Tim: Diad ngaran nen Jesus.

Anthony: Duga. ’Atan so rason no akin ya kada manpikasi ak et ipaparalan ko ed ngaran nen Jesus. Ontan met so gagawaen na saray Tasi nen Jehova diad amin a pikakasi ra.

Tim: Maong no ontan.

Anthony: Say sakey nin bersikulo et amay Juan 3:16. Importantin maong itan a bersikulo kanian tinawag a melag ya Ebanghelyo. Labay ton ibaga, no tiponen mon amin so nisulat nipaakar ed bilay tan ministeryo nen Jesus diad dalin tan pankasakeyen mod saksakey a bersikulo, aya ’man. Pibasam pa.

Tim: Sige. Say kuanto: “Ta ontan lay panangaro  na Dios ed mundo ya inter to so bogbogtong ya Anak to, ta pian balang sakey a mangipapanengneng na pananisia ed sikato et agnaderal noagta nawalaan na bilay ya andi-anggaan.”

Anthony: Salamat. Pamilyar kad satan a bersikulo?

Tim: Ay e, aminpigak la ’tan ya arengel, tan dakdakel so pakakanengnengan kon akasulatan na satan.

Anthony: On, kabkabat itan ya bersikulo. Imanom pan maong so imbaga nen Jesus. Imbaga ton lapud panangaro na Dios, posible parad totoo a manbilay ya andi-anggaan—balet anto kunoy kaukolan tayon gawaen?

Tim: Mangipanengneng na pananisia.

Anthony: On, say pangipanengneng na pananisia ed bogbogtong ya Anak, si Jesu-Kristo. Satan a pananisia ed si Jesus et mangilukas na dalan parad bilay ya andi-anggaan, tan nidanet itan ed pahina 2 na sayan magasin ya awit ko parad sika. Nabasa dia so manunan gagala na magasin ya Say Panag-bantayan, say kuan to: “Ipapaseseg na saya so pananisia ed si Jesu-Kristo ya inatey pian nawalaan itayo na bilay ya andi-anggaan tan manuuley la natan bilang Ari ed Panarian na Dios.”

Tim: E, wadtan manaya. Papaneknekan a mismo na magasin yo ya manisia kayo ed si Jesus.

Anthony: On.

Tim: Akin balet et ibabaga ran agkayo manisiad si Jesus ey?

Anthony: Nayarin wala ray rason da no akin ya ibabaga da ’tan. Singa bilang, ompan ibabaga da ’tan ta ontan so narerengel dad arum. Odino nayarin ontan so imbangat na ministro da.

Tim: Naisip ko labat—seguro ibabaga na arum ya agkayo manisiad si Jesus ta say tawag ed sikayo et Tasi nen Jehova, aliwan Tasi nen Jesus.

Anthony: Nayarin sakey met ’tan ya rason.

Tim: Akin et naynay yon bibitlaen si Jehova a?

Anthony: On, ta manisia kami ya importante so pangusar ed personal a ngaran na Dios ya Jehova—a singa ginawa met na Anak ton si Jesus. Imanom pa no antoy imbaga nen Jesus nen nampikasi ed Ama to. Nabasa yad Juan 17:26. Nayarin pibasam?

Tim: Sige. “Impakabat ko ed sikara so ngaran mo tan ipakabat ko itan, ta pian nipatnag da met so aro ya impatnag mo ed siak tan mikasakey ak ed sikara.”

Anthony: Salamat. No naimanom, imbaga nen Jesus ya impakabat toy ngaran na Dios. Parad sika, akin kasi et ginawa to ’tan?

Tim: Hmm. Agko anta.

Anthony: Mas marakep seguro no manbasa ta ni arum ya bersikulon mangipaliwawad satan. Say nononoten ko et amay Gawa 2:21. Oniay nabasa: “Balang sakey ya ontatawag ed ngaran nen Jehova et nilaban.” Seguradon miabobon ka ya no kaukolan so itawag ed ngaran nen Jehova pian nilaban, segseguradon amta nen Jesus itan.

Tim: On.

Anthony: Sirin, lapud labay ton nilaban iray papatumbok to, importantid si Jesus ya naamtaan tan usaren day ngaran na Dios pian nilaban ira. Tan satan so sakey ed saray manunan rason no akin ya naynay min itotongtong so nipaakar ed si Jehova. Parad sikami et talagan importante ya ipakabat so personal a ngaran na Dios, tan natulongan ni arum ya ontawag met ed satan a ngaran.

Tim: Balet anggano ag-amta odino ag-uusaren na totoo so ngaran na Dios, amta da nin siansia no siopay tutukoyen da no bibitlaen day Dios.

Anthony: Nayarin ontan. Balet diad impangipakabat na Dios ed personal a ngaran to, tinulongan to itayon mas mainomay ya onapit ed sikato.

Tim: Antoy labay mon ibaga?

Anthony: Isip mo pa labat: Agti la kaukolan ya naamtaan so ngaran nen Moises. Magenap lan  amta tayo ya sikato may amaldua ed Ambalangan Dayat odino amay toon angawat na Samploran Ganggan. Ontan met ed si Noe—akin et kaukolan ti nin amtaey ngaran to? Sarag to met ya basta ti labat ibaga ya sikato may toon angipaalagey na biong pian nisalba so pamilya to tan saray ayayep. Anggan si Jesus, sarag tayo met labat ya ibagan sikato may nanlapud tawen ya inatey parad saray kasalanan tayo, agta ontan?

Tim: Nayarin ontan.

Anthony: Balet sineguro na Dios ya naamtaan tayo ray personal a ngaran da, pian diad ontan et magmaliw iran mas tudtua ed sikatayo. Anggan agtayo apinengnengan si Moises, Noe, odino si Jesus, lapud amta tayoy ngaran da, mas tudtua irad sikatayo.

Tim: Agko tan naisip a, balet walay puntom!

Anthony: Tan satan so sakey nin rason no akin ya mabetbet ya uusaren na saray Tasi nen Jehova so personal a ngaran na Dios. Labay min tulongan iray totoon nawalaay pananisia ed si Jehova a Dios bilang tuan Persona, ya sarag day onapit ed sikato. Ontan met, papablien min maong so betang nen Jesus ed kilalaban tayo. Mas maabig seguro no manbasa ta ni sakey ya teksto pian mas nalinewan ta.

Tim: Sige.

Anthony: Binasa ta nen niman so Juan 14:6. Imbaga nen Jesus diman ya sikato so “dalan tan say katuaan tan say bilay.” Onatras tay pigaran bersikulo tan imanom so imbaga to diad Juan 14:1. Sarag ton pibasam so imbaga nen Jesus diad bandad sampot na satan ya bersikulo?

Tim: Sarag to. Say kuan to dia: “Ipatnag yo so pananisia ed Dios, ipatnag yo met so pananisia ed siak.”

Anthony: Salamat. Nibagam kasi ya say tuan pananisia et balanglan say panisia labat ed si Jesus odino say panisia labat ed si Jehova?

Tim: Andi. Imbaga nen Jesus ya kaukolan itan ya dua.

Anthony: Duga. Tan segurado ak ya onabobon ka ya aliwan magenap so pangibaga labat ya walay pananisia tayo ed Dios tan ed si Jesus. Kaukolan ya nanengneng ed panagbilay tayo ya walaan tayoy pananisiad sikara.

Tim: Duga.

Anthony: Balet panon ya nipanengneng na sakey a too ya talagan walay pananisia tod Dios tan ed si Jesus? Pantongtongan ta ’tan no onsublay. *

Tim: Sige.