Eric: Diad tua, aliwa ak ya relihyoso. Kanian anggapoy masyadon antak ed satan.

Brian: Naapresyak ya imbagam itan. Siak manaya si Brian. Sika ey?

Eric: Eric.

Brian: Eric natepet ko labat, saray atateng mo ey, relihyoso ira?

Eric: Relihyosoy pamilyak, balet nen binmiig ak la nen nan-college ak, anggapo lay panaon kod relihyon.

Brian: Ah . . . onman manaya. Antoy kurson inalam ey?

Eric: Social studies tan history. Mahilig ak kasid history—singa bilang no panon ya nambilay iray totoo diad dalin.

Brian: Balibalin tua ya aralen so history. Antam ya say Biblia et libro na history? Asalim lan inusar itan ed saray research mo?

Eric: Andi ni. Antak ya balibali ’tan ya libro, pero natan ko labat arengel ya historical book so Biblia.

Brian: Naimanok ya open-minded ka. Labay ko komon ya ipanengneng ed sikan magano iray pigaran alimbawa ya mangipanengneng ya say Biblia et duga ed history.

Eric: Sige. Anggapoy Bibliak balet.

Brian: Ayos labat ta walay awit ko. Say unona et walad 1 Awaran kapitulo 29, bersikulo 26 tan 27. Oniay nabasad saratan ya bersikulo: “Bang si David ya anak nen Isai nanari ed amin ya Israel. Et say panaon ya impanari to ed Israel sikato so apataplo a taon. Pitoy taon a nan-ari ed Hebron, tan talomplo tan talo a taon a nan-ari ed Jerusalem.”

Eric: Antoy koneksion to ya ey?

Brian: Nensaman, ibabaga na saray kritiko ya anggapo kuno tay nambilay ya Arin David.

Eric: Talaga? Akin et kuestionen da ’tan?

Brian: Likud ed Biblia, datdaiset so ebidensya ya si David et talagan nambilay. Balet nen 1993, walay nalmo na saray archaeologist ya datdaan lan bato ya walay akaukit iran salita ya no ipatalos et “Abung nen David.”

Eric: Talaga?

Brian: Say sakey nin abitlad Biblia ya kukuestionen da no talagan nambilay et si Poncio Pilato, aya may gobernador nen panaon nen Jesus. Sikatoy abitla ed Lucas kapitulo 3, bersikulo 1—sakey ed saray opisyal na gobierno nensaman.

Eric: On ta ni kuan to dia ay: “Sanen si Poncio Pilato so gobernador na Judea, tan si Herodes so manuley na distrito na Galilea.”

Brian: Duga. Abaybayag ya nanduaruwaan na saray scholar no talaga kasin walay toon  nambilay ya Poncio Pilato. Insan nen manga 50 taon lay apalabas, walay nalmon bato diad Middle East ya malinlinew ya akaukit ditan so ngaran to.

Eric: Hmm. Natan ko labat naamtaan iratan ah.

Brian: Maliket ak ta nibagak iratan ed sika.

Eric: Antam, parad siak et marakdakep a literatura so Biblia, balet agkon balot naisip ya nausar ni yad panaon tayo. Nayarin dugay ibabaga tod history, balet singa aliwa lan mausar natan.

Brian: Ontan so ibabaga na dakel, balet parad siak andi. Ta onia ’tan ay: Manlapud gapo, ag-anguman so manunan pankaukolan na too. Singa bilang, kaukolan tayoy naakan, isulong, tan panayaman. Kaukolan tayoy mitongtong ed sakey tan sakey tan nawalaay maliket ya pamilya. Agta importantid sikatayon amin iratan?

Eric: Siempre.

Brian: Diad saratan ya amin et makatulong ed sikatayoy Biblia. Kanian nibagan say Biblia et daan balet ta modernon libro.

Eric: Antoy labay mon ibaga?

Brian: Singa bilang, wala ray prinsipyod Biblia ya importante ni anggad natan, a singa nen insulat iratan manga 2,000 taon lay apalabas.

Eric: Singa anto ra ’tan ey?

Brian: Natulongan tayo na saray prinsipyod Biblia pian magmaliw ya balanse ed panmoriad kuarta, no panon ya magmaliw a maliket so pamilya, tan magmaliw ya maong a kaaro. Tulongan to tayon onaligwas. Singa bilang, mainomay kasi natan so magmaliw ya responsablin asawa tan ulo na pamilya?

Eric: Mairap lanti. Sakey taon kami lan kasal nen asawak, balet mabetbet ya agkami makapampaknaan.

Brian: Talagan ontan. Balet wala ray prinsipyo ed Biblia ya makatulong. Singa bilang amay walad Efeso kapitulo 5. Basaen ta pay bersikulo 22, 23, tan 28. Nayarin sikay manbasa?

Eric: Sige. Kuan to dia: “Komon ta manpasakop iray asawan bibii ed kaasawaan da a singa pampapasakop da met ed Katawan, lapud say asawan laki et ulo na asawa to a singa say Kristo et ulo na kongregasyon, ta sikato so manangilaban ed sayan laman.” Diad bersikulo 28: “Ontan met, nepeg ya aroen na asawan lalaki so kaasawaan da a singa laman dan dili. Samay mangaaro ed asawa to et mangaaro ed laman ton dili.”

Brian: Salamat. No iyaplika na sanasawa iyan simplin bilin, di ba mas maliket so pamilya?

Eric: Ay on. Singa mainomay ya ibaga, balet mairap ya gawaen.

Brian: On tua ’tan, ta anggapoy perpekton too. Diad tua, diad satan met lanlamang ya kapitulo na Biblia, walay bersikulo ya ibabangat to tayon magmaliw ya makatunongan. * Diad antokaman ya relasyon kaukolan so pagmaliw ya balanse tan mapalugar. Akatulong so Biblia ed sikamin sanasawa pian nagawaan mi itan.

Eric: Manisia ak ed saratay imbagam.

Brian: Walay Web site na Saray Tasi nen Jehova ya wala ray balibalin impormasyon nipaakar ed sanasawa tan bilay na pamilya. No ayos labat ed sika, labay kon ipanengneng ya magano so sakey ed saratan.

Eric: Sige, magano met labat manaya.

Brian: Say Web site mi et www.pr418.com/pag. Nia ay so home page to.

Eric: Balibali ra yay litrato.

Brian: Onia ray gagawaen min panagpulong diad interon mundo. Nia ay manaya. Wala diay tab ya “Publikasyon.” Diad satan et walay  seksion ya “Magasin.” Dia ed magasin mi ya Onliing! mabetbet ya wala ray artikulon nipaakar ed nanduruman situasyon ya aarapen na sanasawa. Singa bilang, nengnengen ta yay magasin ya Onliing! ed isyu na Oktubre–Disyembre 2014. Wala diay artikulo ya say tema to et “No Panon ya Naekal so Sakit na Linawa.”

Eric: Mmm . . . Balibali ’tan ya topic!

Brian: Ipapaliwawa na sayan artikulo so apatiran nayarin gawaen pian naresolbay problema. Nengneng mo pa yan parapo. Sarag ton pibasam?

Eric: Sige. Say kuan to: “Deralen na sakit na linawa so ulopan na sanasawa. Akin? Ta deralen na satan iray ugalin kaukolan ed panamaley ya singa say aro, tiwala, tan katooran.” Tua yay ibabaga to.

Brian: Salamat ed impanbasam. Abitla dia so Efeso 4:31. Sarag ton pibasam iyan bersikulo?

Eric: Say kuan to: “Naekal komon ed sikayo so amin a paneem-em na sakit na linawa tan pasnok tan sanok tan paneeyagan tan makapasakit a salita pati say amin a kaugsan.”

Brian: Naimanom no anto ramay kagagawa odino mauges ya ugali ya kaukolan tayon ekalen?

Eric: Kaukolan tayon ekalen so paneem-em na sakit na linawa, pasnok, tan sanok.

Brian: Agtayo napaliisan so pampasnok, balet parad sika, ombayag kasi relasyon na sanasawa no say sakey ed sikara et walay pupukoken ton sakit na linawa ed asawa to?

Eric: Siempre andi.

Brian: Manisia ka ya no say sanasawa et parehon anggapoy eem-eman dan sakit na linawa et tuloytuloy ya onelet so relasyon da?

Eric: Ay on.

Brian: Kanian sayan bersikulo ed Biblia, anggano ngalngali 2,000 taon lay apalabas nen insulat et talagan makatulong no iyaplika.

Eric: Agko naisip ya makatulong manayay Biblia.

Brian: Labay ko komon ya mannengnengan ta lamet dia tan pantongtongan ta yay subheading ya “No Antoy Nayarin Gawaen Mo” ya wadia lanlamang ed sayan artikulod Web site mi. *