Binmaleg ak ed pobpobrin lugar diad syudad na Montreal. Anem bulan ko ni labat nen inatey si tatay ko, kanian si nanay ko lay angakod amin ya responsabilidad. Walora kamin sanaagi tan siak so bolirek.

Diad ibabaleg ko, say bilay ko et ontetelek ed droga, panagsugal, inkaruksa, tan piuulop ed saray kriminal. Nen samploy taon ko, nagmaliw ak lan igaganggan na saray hostes tan saray managpautang ya sobsobray interes. Matilatila ak tan labalabay kon saolen iray totoo ed amin lan klase na panagloko. Bisyok ’tan.

Nen 14 años ko, marundunong ak lan mansaol. Singa bilang, mangasaliw ak na asandarakel ya relo, bracelet, tan singsing ya intubog ed gold, insan walay uusaren kon panag-ukit pian markaan iratan na 14K gold, insan ko ilakod saray dalan tan parking lot na saray shopping center. Panlikliketan koy makalmo na kuarta ya agko nanirapan. Aminsan et $10,000 so nalmok ed sanagew labat!

Nen na-ekspel ak ed reform school nen 15 años ko, anggapoy napanayaman ko. Onuugip ak ed gilig na karsada, diad saray parke, o diad abung na saray kabat ko ya manpatuloy ed siak.

Lapud panagsaol ko, mabetbet ak ya sisitaen na pulis. Balet lapud agko tinakew iray ilalakok, agak niprison balot. Angkakabaleg balet iray multak lapud panagsaol, panagpeke, tan panaglako ya anggapoy permit. Anggapoy tatakotan ko, siak ni ingey mansisingil parad saramay managpautang ya baleg so interes. Delikado man, tan no maminsan et mangaawit ak na paltog. Mimila ak ni ingen ed saray implanon krimen.

Unaunaan kon arengel so nipaakar ed Biblia nen 17 años ko. Walay iyaamong kon girlfriend ya nanaral na Biblia ed saray  Tasi nen Jehova. Balet agko labay iray ibabawal na Biblia, kanian tinaynan ko, tan inyamong koy sananey nin bii ya idi-date ko met lad saman.

Balet nanaral met ed saray Tasi yay komaduan girlfriend ko! Baleg so impanguman to tan manbilib ak ta mas mauyamo la tan mas maanos. Kanian nen inimbitaan ak na saray Tasi ed aral dad Kingdom Hall, linma ak. Pinatuloy ak na totoon desente tan maomaong. Talagan duma itan ed binalegan ko! Agak labalabay na pamilyak; agkon balot alikna so panangaro manlapud inkaugaw ko. Balet anengneng kod saray Tasi nen Jehova so panangaro ya abayag ko lan aanapen. Nen inyopresi na saray Tasi ya tulongan da ak ya manaral na Biblia, inawat ko.

Niliktar ak lapud saray naaralan kod Biblia. Aminsan, implanok so milan mantakew pian nabayaran ko ray utang kod panagsugal, ya masulok ya $50,000. Balet maong labat ta inmatras ak! Intuloy itan na duaran kaibak. Say sakey et akulong tan samay sakey et inatey.

Diad pangitutuloy koy panaaral koy Biblia, anengneng ko ya dakdakel so kaukolan kon umanen ed sarilik. Singa bilang, naaralan koy ibabaga na Biblia ed 1 Corinto 6:10: “Saray matakew, odino saray maagum, odino saray managbuanges, odino saray manag-ayew, odino saray managkatkat et agda natawir so panarian na Dios.” Nen abasak ’tan ya bersikulo, akaakis ak ta anengneng kon aliwa lan talagay agawad siak. Amoriak ya talagan kaukolan kon umaney interon kabibilay ko. (Roma 12:2) Bayolenti tan agresibo ak, tan puro katilaan so panagbilay ko.

Balet naaralan ko met diad panaaral koy Biblia ya si Jehova et mapangasi tan manamerdona. (Isaias 1:18) Nampikasi ak ya maong ya tulongan ak nen Jehova ya makalukpos ed datin kabibilay ko. Lapud tulong to, kalkalnan nauman koy personalidad ko. Say sankamanunaan ed satan et nankasal kami na iyaamong ko.

Diad saman et 24 años ko. Lapud kasal ak la tan talora lay anak mi, kaukolan koy mananap na legal ya trabaho. Balet abebay aral ko tan anggapoy eksperiensyak. Nampikasi ak lamet ed si Jehova. Insan ak nananap na trabaho. Imbagak ed saray panaaplayan ko ya labay kon umaney kabibilay ko tan nawalaay malinis ya trabaho. No arum, ipapaliwawak ni ya manaaral ak na Biblia tan labay koy magmaliw ya maong a too. Dakel so nanaplayan ko balet agda ak inawat. Anggad nen aminsan, impatuak ed sakey ya interbyu iray aliwliwan ginawak nensaman. Imbaga na samay anginterbyu ed siak: “Agko anta no akin, balet singa labay ta kan awaten ed trabaho.” Antak ya aya may ebat ed pikakasik. Sinmabi panaon et abautismoan kami nen asawak bilang Tasi nen Jehova.

Mabilay ak natan lapud panguunor kod saray prinsipyod Biblia tan Kristiano so kabibilay ko. Maliket so pamilyak. Kombinsido ak ya pinerdona ak nen Jehova, kanian maliket ak ta malinis so konsiensiak.

Labin-apat taon ak lan full-time ya ministro, ya ontutulong ed arum ya naamtaan no antoy ibabangat na Biblia, tan agano ni ya kaibak lay asawak ed sayan full-time ya panaglingkor. Diad apalabas ya 30 taon, malikeliket ak ya akatulong ed 22 ya katrabahok a mandayew ed si Jehova. Oonla ak nid saray shopping center—balet aliwa lan pian manlokoy totoo a singa nensaman. Natan no oonla ak diman, mabetbet kon pupulongan so arum. Walay labay kon iter ed sikara: say ilalo ya pambilay diad balon mundo ya anggapo la ray managloko.—Salmo 37:10, 11.