MANUNAN ARTIKULO | NABILAY LAMET IRAY INATEY—POSIBLE KASI?
Antoy Nagawa no Ompatey so Too?
“Abalang ko walay taloran pasen ya nayarin laen na too no ompatey: tawen, impierno, odino purgatoryo. Antak ya agak maomaong pian onlad tawen, tan agak met mauge-uges pian onlad impierno. Agko balet anta no anton talaga tay purgatoryo. Anggapoy ontan ya abasak ed Biblia. Narerengel ko labat ya ibabaga na arum.”
—Lionel.
“Imbangat ed siak ya amin a totoo et onlad tawen no ompatey, balet agak kombinsido. Say antak no ompatey so too, aman lay anggaan to
—anggapo lay pag-asa to.” —Fernando.
Kasin naisip mo la: ‘Anton talagay nagagawa no ompatey so sakey? Kasin maniirap ed arum a pasen iray inatey ya inar-aro tayo? Kasin nanengneng tayo ra lamet? Panon tayon anta?’ Imanoen tayo pa no anton talagay ibabangat na Biblia. Unona, nengnengen tayoy ibabaga to ya kipapasen na saray inatey. Insan tayo pantongtongan so ilalo ya ibabaga na Salita na Dios, say Biblia.
Antoy kipapasen na saray inatey?
EBAT NA BIBLIA: “Saray mabilay amta ra a sikara ompatey ira: balet saray inaatey agda amta so bengatla, ag-ira met nawalaan la na tumang; ta say pakanonot ed sikara alingwanan. Anggan anto a say limam naromog to a gawaen, sikato so gawaen mo ed pakayarim; ta anggapo so gawa, no kanonotan, no pakaamta, no kakabatan, dia ed Sheol, a laen mo.” *
Say Sheol odino Lubok sirin so laen na saray inatey; simboliko itan ya lugar odino kipapasen ya anggapo lay amta odino nagawaan. Antoy pakatalos na matoor a lakin si Job ed Sheol? Naandi amin ya walad sikato, pati samploran ananak to, diad loob labat na sanagew. Insan, apelsaan so interon laman to. Akikasi ed Dios: “O komon ta yamot moak dia ed Sheol [“ed impierno,” Catholic Douay Version], pian niyagel moak a maamo-amot.” (Job 1:13-19; 2:7; 14:13) Malinew ya ag-inisip nen Job ya say Sheol et mangapuy-apoy ya lugar, ya diman et mas lalon manirap. Imbes, inisip ton diman et nainawaan la.
Wala ni sakey a paraan pian naamtaan tayo no antoy kipapasen na inatey. Sarag tayon aralen iray walad Biblia nipaakar ed waloran totoo ya inatey insan abilay lamet.
Saraman ya walo et anggapoy imbaga dan linma rad pasen ya maliket o panagpairapan. No linma rad ontan ya pasen, agta inistorya da komon? Tan agkasi insulat komon itan ed Biblia pian naamtaan na amin? Diad Biblia, anggapoy ontan ya nabasa. Malinew ya anggapoy imbaga na saraman ya walora. Akin et anggapo? On ta nen inatey ira et anggapoy amta ra, singano araldalem so ugip da. Diad tua, uusaren na Biblia ya ilustrasyon so naugip no ipapaliwawa toy ipapatey. Singa bilang, saray matoor ya lingkor na Dios, si David tan Esteban et parehon “naugip ed patey.”
Anto siri’ ilalo parad saray inatey? Ombangon ni ra kasi ed inyugip da?
^ par. 7 Say salitan “Sheol” et Hebreo ya miparad Griegon salita ya “Hades,” ya say labay ton ibaga et “Lubok.” Diad arum iran bersion na Biblia inusar so salitan “impierno,” balet say ideyan pamairap ed inaatey diad mandarlang ya apoy et agnanlapud Biblia.
