Anengneng na ugaw a bii iray makapal ya asewek ya manlalapud pabrika tan pakanengneng to et singa iratan lurem. Kanian say amta to, satan ya pabrika et manggagawa na lurem. Nayarin makapalek no melag labat so lingon pakatalos a singa ed sayan ugaw. Balet wala ray lingon pakatalos ya baleg so epekto tod bilay tayo. Alimbawa, no aliway impanbasa tayod akasulat ed bote na tambal, nayarin grabe so nagawa.

Balet mas grabe so epekto no aliway pakatalos tayo ed saray nababasa tayod Biblia. Singa bilang, aliway atalosan na arum a totoo ed saray bangat nen Jesus. (Juan 6:48-68) Imbes ya aralen da nin maong, agda la dinengel so amin ya imbangat nen Jesus. Sayang!

Kasin babasaen moy Biblia pian nigiya ka? Balibali itan. Balet posible kasi ya nalingo ka ed pakatalos mo ed saray nababasam? Nagagawa itan ed dakel a totoo. Nengnengen so taloran maslak ya lingon pakatalos.

• Wala ray totoo ya aliway pakatalos da ed ganggan na Biblia ya “takotan moy tuan Dios.” Iisipen dan kaukolan ya say naliknam et sobran takot ed Dios. (Eclesiastes 12:13) Balet aglabay na Dios ya ontan so nalikna na saray mandadayew ed sikato. Imbaga to: “Agka ontatakot, ta wala ak ed sika. Agka ompapaga, ta siak so Dios mo. Pabiskegen ta ka, on, tulongan ta ka.” (Isaias 41:10) Say labay ya ibaga na takotan so Dios et dapat nalikna tayo so dayew tan panangigalang ed sikato.

• Wala ray totoo ya aliway pakatalos da ed sarayan salita: “Walay panaon na amin a bengatla, . . . panaon na kiyanak tan panaon na ipatey.” Ibabaga dan wala lay panaon ya pinili na Dios no kapigan ompatey so kada sakey a too. (Eclesiastes 3:1, 2) Balet diad tua, say tutukoyen na satan et say normal labat ya dalan na bilay tan ipapanengneng to ya amin et ompapatey. Ibabangat met na Salita na Dios ya saray desisyon tayo et makaapekto ed karukey na bilay tayo. Alimbawa, oniay nabasa tayo: “Say takot ed si Jehova et mamarukey na bilay.” (Proverbio 10:27; Salmo 90:10; Isaias 55:3) Panon? Singa bilang, no rerespetoen tayoy Salita na Dios, iwasan tayo ray makapuy ya kagagawa singa say panagbuanges tan imoralidad.—1 Corinto 6:9, 10.

• Wala ray literal so pakatalos da ed ibabaga na Biblia ya say tawen tan dalin et “nigana ed apoy,” ya iisipen dan deralen na Dios so mismon planeta tayo. (2 Pedro 3:7) Balet ipropromisa na Dios ya agto abuloyan ya naderal so literal ya dalin. “Inletneg [na Dios so] dalin diad saray pundasyon to; ag-itan nagalaw diad pasen to ya anggad angga.” (Salmo 104:5; Isaias 45:18) Sayan mauges ya sistema na mundo, aliwan say literal ya planeta, so manampot, a singano deralen na apoy. Balet say tawen, no literal so inkausar to, nayarin ontukoy itan ed tawen ya nanenengneng tayo, say mabitewen na uniberso, odino say panaayaman na Dios. Anggapo ed saraya so deralen.

Singa nanengneng tayod saratan ya alimbawa, maslak ya aliway pakatalos na totoo ed saray nababasa ra ed Biblia. Balet akin et aabuloyan na Dios itan ya nagawa? Nayarin ibaga na arum: ‘No talagan marunong so Dios tan amta ton amin, angiter la komon na libro ya malinlinew iray ibabaga to tan mainomay ya natalosan na amin. Akin et agto itan ginawa?’ Nia ray taloran rason no akin ya maslak et aliway pakatalos dad Biblia.

1. Denesinyo so Biblia pian natalosan na saramay mapaabeba tan labay day makaaral. Imbaga nen Jesus ed Ama to: “Idayew ta kad arapan  na totoo, Ama, a Katawan na tawen tan dalin, lapud maalwar mon inyamot irayan bengatla ed saray marunong tan mautek, balet impaamtam iraya ed saray ugugaw.” (Lucas 10:21) Insulat so Biblia diad paraan ya natalosan labat na saramay walaay dugan panagnonot. Saray totoon mapaatagey—ya maslak et “saray marunong tan mautek”—et mas nayarin nalingo ed pakatalos dad Biblia. Balet saray totoon manbabasa na Biblia, ya say panagnonot da et singa “ugugaw” ya mapaabeba tan labay day makaaral, so naikdan na dugan pakatalos ed mensahe na Dios. Talagan marunong so impandesinyo na Dios ed Biblia!

2. Say Biblia et parad saray totoon talagan labay day patulongan ed Dios pian natalosan itan. Impanengneng nen Jesus ya kailangan na totoo so tulong pian natalosan dan maong so imbangat to. Panon dan naawat itan? Imbaga nen Jesus: “Say mananulong, say masanton espiritu, ya ibaki na Ama diad ngaran ko, so mangibangat ed sikayo na amin a bengatla.” (Juan 14:26) Kanian iiter na Dios so masanton espiritu to—say mabiskeg ya aktibon puersa to—pian tulongan iray totoon natalosan iray babasaen da ed Biblia. Balet ag-iiter na Dios so espiritu to ed totoo ya ag-onkekerew na tulong ed sikato, kanian parad sikara et mair-irap ya talosan so Biblia. Papakiwasen met na masanton espiritu iray Kristianon marunong ed Salita na Dios ya tulongan iramay labay dan natalosan itan.—Gawa 8:26-35.

3. Say arum ya bersikulo ed Biblia et natalosan labat na totoo diad dugan panaon. Alimbawa, ingganggan si propeta Daniel ya isulat so sakey a mensahe parad arapen. Imbaga na sakey ya anghel ed sikato: “O Daniel, pansiansiam nin sekreto irayan salita, tan selyadoan mo so libro ya anggad panaon na anggaan.” Diad loob na nilasus a taon, dakel ya totoo so akabasa la ed libro na Biblia ya Daniel balet agdan talaga atalosan itan. Anggan si Daniel et agto atalosan so arum ya insulat to. Mapaabeba ton inamin: “Nadngel ko, balet agko atalosan.” Balet natalosan met lanlamang na totoo so labay ya ibaga na propesiya na Dios ya insulat nen Daniel, pero diad panaon ya pinili na Dios. Imbaga na anghel: “La ka, Daniel, ta nepeg a mansiansia nin sekreto tan selyado irayan salita anggad panaon na anggaan.” Siopay makatalos ed saray mensahe na Dios? “Anggapo ed saray mauges so makatalos ed sarayan salita; balet natalosan iraya na saramay walaay aralem a pakatalos.” (Daniel 12:4, 8-10) Kanian ag-ipapaamta na Dios so kabaliksan na arum ya bersikulo ed Biblia anggad onsabi so dugan panaon.

Wala kasi panaon ya aliway pakatalos na Saray Tasi nen Jehova ed Biblia? On. Balet nen impalinew iratan ed panaon ya pinili na Dios, akaparaan iray Tasi ya umanen so pakatalos da. Manisia ra ya diad satan ya gagawaen da et aaligen da ray apostol nen Kristo, ya mapaabeba dan inuman so panagnonot da kada no ipetek ira nen Jesus.—Gawa 1:6, 7.

Say nononoten na ugaw ya bii no iner manlalapu iray lurem et nayarin melag labat ya lingon pakatalos. Balet say ibabangat na Biblia et importantin maong ed bilay mo. Masyadon importante so mensahe na Biblia pian salien na siopaman ya talosan itan a bukor no babasaen toy Biblia. Kanian kerew kay tulong pian natalosan moy babasaen mo. Anapen iramay mapaabeban manaaral na Biblia, saramay totoon mandedepende ed masanton espiritu na Dios pian natalosan so Biblia, totoon kombinsido ya manbibilay tayo la ed panaon ya labay na Dios ya talagan natalosan tayoy Biblia. Agmanaalangan ya mitongtong ed saray Tasi nen Jehova odino basaen iray in-research dan maong ya walad website ya jw.org. Ibabaga na Biblia: “No ontawag ka pian onkerew na pakatalos . . . , naromog moy kakabatan nipaakar ed Dios.”—Proverbio 2:3-5.