MANTULTULOY A MANBANTAY!
Akin et Magulogulo Iray Totoo Lapud Politika?—Antoy Ibabaga na Biblia?
Diad interon mundo, naapag-apag iray totoo lapud politika. Base ed 2022 ya survey na Pew Research Center, “65% na saray adulto ed 19 ya bansan sinurbey so mangibabaga ya magulogulo iray totoo ed bansa ra lapud mandumaan so susuportaan dan politika.”
Kasin nanenengneng mo met diad lugar yo ya magulogulo iray totoo lapud politika? Akin et ontan so nagagawa? Naekal ni kasi itan? Imanoen no antoy ibabaga na Biblia.
Saray ugalin manederal na pankakasakey
Imbaga na Biblia ya diad panaon tayo a tatawagen ya “kaunoran iran agew,” dakel ya totoo so nawalaan na saray aliwliwan ugali ya lapud satan et imposible ya niwalay pankakasakey.
“Diad kaunoran iran agew et onsabi iray mapeligro tan mair-irap a panaon. Ta saray totoo et magmaliw a maaro ed sarili ra, . . . agda labay so mipaknaan.”—2 Timoteo 3:1-3.
Kanian anggan antoy pansagpot na saray totoo pian magmaliw ya balibali so uley na gobierno, ag-itan nagagawa. Lapud mankokontraan so opinyon na saray totoo, mairap tan imposible ni ingen ya mankakasakey ira pian nasolusyonan iray problema. Nanengneng ed sarayan nagagawa ya tua imay abayag lan imbaga na Biblia.
“Say too et uuleyan toy kapara ton too diad pankaugsan to.”—Eclesiastes 8:9.
Balet imbaga la na Biblia so solusyon—walay sakey ya gobierno ya uleyan na sakey ya lider, tan ekalen to so amin ya probleman mamapairap ed saray totoo natan.
Sakey ya perpekton lider tan walay malasakit to
Ibabaga na Biblia no siopa iyan perpekton lider: Si Jesu-Kristo. Walay pakayari tan autoridad nen Jesus, tan labalabay ton niwalay pankakasakey tan kareenan ed amin ya totoo.
“Diad saray agew to et ombulaslas so matunong, tan inerman a pasen et walay kareenan.”—Salmo 72:7.
“Amin a nasyon et manlingkor ed sikato.”—Salmo 72:11.
Perpekton lider si Jesus ta imamalasakit to ray totoo tan labalabay to ran tulongan, lalo la ed saramay aliwan patas so pantratrato ed sikara.
“Iliktar to so mairap-bilay ya onkekerew na tulong, tan samay pakaskasi tan siopaman ya anggapoy ontutulong. Kasian to so pobri tan say mairap-bilay, tan isalba toy bilay na saray maniirap. Iliktar to ra ed panagpairap tan karuksaan.”—Salmo 72:12-14.
Sarag mo nin aruman so antam nipaakar ed Panarian na Dios, say gobierno ed tawen ya uuleyan nen Jesus. Amtaen no panon kan natulongan na satan tan no panon mon nasuportaan so pananguley to.
Bantayan so video ya Anto so Panarian na Dios?
Basaen so artikulo ya “Panarian na Dios—Gobierno ya Anggapoy Kurapsion.”
Ompan Nagustoan Mo Met
EBAT ED SARAY TEPET ED BIBLIA
Anto so Tanda na “Kaunoran Iran Agew,” odino “Panaon na Anggaan”?
Impasakbay na Biblia iray dakel ya manbabansag ya nagawa ya pakapatnagan na kaunoran iran agew.
ARUM NIN TOPIC
Naandi ni Kasi Kurapsion ed Gobierno?
Amtaen iray taloran rason no akin ya makapantiwala tayo ed sakey ya nikadkaduman gobierno ya agbalot magmaliw ya kurakot.
Manunan Bangat na Biblia—Video
Ginmapon Nanuley so Panarian na Dios nen 1914
Masulok lan 2,600 taon so apalabas nen impakugip na Dios so sakey a propesiya ed sakey ya makapanyarin ari, tan natan et nagagawa la itan.
SAY PANAG-BANTAYAN
Siopa so Ari ed Panarian na Dios?
Insulat na pigaran nansulat ed Biblia iray detalye ya pakabidbiran ed samay magmaliw ya Ari ed Panarian na Dios. Diad amin ya toon nambilay, saksakey labat so eksakton tutukoyen na amin ed saratan ya detalye.
NIPAAKAR ED SIKAMI
Man-request na Ombisita ed Sika
Pantongtongan so tepet mo nipaakar ed Biblia, odino amtaen ni kaaruman ya impormasyon nipaakar ed Saray Tasi nen Jehova.
