Nen Oktubre 9, 2024 in-release na World Wildlife Fund so makapaaburidon report nipaakar ed epekto ed ayayep na saray gagawaen na totoo. Imbaga da ya “diad apalabas ya 50 taon (1970-2020) dinmaiset na 73% so bilang na ayayep ya oobserbaan da.” Oniay pasakbay na report: “Nibaga tayo ya akadepende ed saray nagawa ed onsublay ya limaran taon so magmaliw ya bilay ed Dalin.”

 Natural labat ya nabigla so dakel ya totoo ed ontan iran report. Inar-aro tayoy balibalin planeta tayo tan agtayo labay ya naupot iray ayayep. Oniay liknaan tayo ta ginawa itayo na Dios ya labay tayon asikasoen iray ayayep.—Genesis 1:27, 28; Proverbio 12:10.

 Kanian ompan iisipen mo, ‘Sarag tayo kasin protektaan iray ayayep ed dalin? Antoy ibabaga na Biblia?’

 Anggano antoy pansagpot tayo pian asikasoen iray ayayep ed planeta tayo, diad tua et say Dios labat so talagan makasarag ya manprotekta ed sikara. Base ed Apocalipsis 11:18 impasakbay na Biblia ya “deralen [na Dios] iramay manederal ed dalin.” Walay duaran naaralan tayo ed satan ya bersikulo:

1.  1. Patundaen na Dios iray totoon manederal ed dalin pian agla onloor itan.

2.  2. Asingger lan onkiwas so Dios. Panon tayon amta? Mas wala lay pakayari na totoo ya ipeligro iray ayayep natan nen say nensaman.

 Antoy gawaen na Dios pian nasolusyonan iyan problema? Usaren toy gobierno o Panarian to ya walad tawen pian uleyan so interon dalin. (Mateo 6:10) Itarya na satan ya gobierno so edukasyon tan panangipasal ya kaukolan na saray maunor ya totoo pian naasikaso tan naprotektaan da iray ayayep ed dalin.—Isaias 11:9.