MANTULTULOY A MANBANTAY!

Saray Graben Delap—Antoy Ibabaga na Biblia?

I-PLAY

Diad interon mundo, dakel so apektado na saray graben delap. Nia ray pigaran report:

“Nen imbebeneg iran agew, inreport so sankakasilan ya uran ya agawa ed capital city na China kayari masulok ya 140 ya taon. Manlapud Sabado ya anggad Mierkoles, say sukat na napepelag ya uran et 744.8 millimeters (29.3 inches).”—AP News, Agosto 2, 2023.
“Nen Huebes, komaduan agew la ya makmaksil so uran tan dagem lapud Bagyon Khanun ya dinmalan ed southern Japan. Lapud satan, ag-onabeba ed duaran too so inatey. . . . Iilaloan ya makasabi itan ya bagyo diad mapalandey a parte na central Taiwan tan onabot ed manga 0.6 meters (2 feet) so uran.”—Deutsche Welle, Agosto 3, 2023.
“Dinmelap [ed Nova Scotia] nen weekend lapud tuloytuloy so makmaksil ya uran diad parte na Canada ya walad Atlantic coast, atan la so sankakasilan ya uran ya agawa ditan kayari 50 ya taon.”—BBC News, Hulyo 24, 2023.

Antoy ibabaga na Biblia tungkol ed saray nagagawan delap?

Sakey ed saray tanda na “kaunoran iran agew”

Ibabaga na Biblia ya manbibilay tayo la ed panaon ya tatawagen ya “kaunoran iran agew.” (2 Timoteo 3:1) Impropesiya nen Jesus ya diad panaon tayo et “wala ray makapataktakot a nanengneng” tayo. (Lucas 21:11) Lapud climate change, nagmaliw laingen ya mas mabetbet, mas grabe, tan bigbiglan onsabi iray makapataktakot ya kalamidad.

No akin ya agtayo naeekalan na pag-asa

Diad tua, ibabaga na Biblia ya saray makapataktakot ya nagagawa ed mundo natan et mangiter laingen na pag-asa ed sikatayo. Akin ey? Oniay imbaga nen Jesus: “No nanenengneng yon nagagawa la irayan bengatla, amtaen yo ya asingger lay Panarian na Dios.”—Lucas 21:31; Mateo 24:3.

Ipapanengneng na saray nagagawa ed mundo natan ya magano lan onkilos so Panarian na Dios pian kontrolen iray natural ya puersa ed dalin, singa say water cycle.—Job 36:27, 28; Salmo 107:29.

Pian naaruman ni antam no panon ya apigeren na Panarian na Dios so kalikasan, nengnengen so artikulo ya “Sino ang Magliligtas sa Lupa?”