•   “Inreport na China so sankapetangan lan heatwave tan komatlo ed sankamagaan lan summer ed rekord da.”—The Guardian, Setyembre 7, 2022.

•   “Komaliman taon la na graben kelang ed arum ya parte na Africa, tan mantultuloy ni itan.”—UN News, Agosto 26, 2022.

•   “Masulok ya kapaldua na Europe so napepeligro ya naapektoan na kelang, nayarin atan lay sankagrabian ya kelang ed loob na 500 ya taon.”—BBC News, Agosto 23, 2022.

 Ipapasakbay na dakel ya eksperto ya saratan ya kelang et mantultuloy tan mas onggrabe ni ingen. Wala ni kasi ilalo ya manguman ni kipapasen ed arapen? Antoy ibabaga na Biblia?

 Oniay impasakbay na Biblia ya nagawad panaon tayo:

•   “Diad nanduruman pasen et wala ray eras.”—Lucas 21:11.

 No walay kelang, maslak et onkulang so naakan. Satan ya kakulangan na naakan, tan say paniirap tan ipapatey ya epekto na satan, et kasumpalan na propesiya na Biblia.—Apocalipsis 6:6, 8.

 Ipapaamta na Biblia so manunan rason no akin ya mas onloloor iray kelang. Oniay nabasa:

•   “Agkanepegan na too ya igiya so dilin kupbang to.”—Jeremias 10:23.

 Labay ton ibaga, agsarag na totoo ya “igiya so dilin kupbang [da],” odino uleyan so sarili ra. Kanian saray desisyon da et maslak ya manresulta ed saray kelang tan kakulangan na danum.

•   Ibabaga na maslak ya scientist ya say global warming et resulta na saray ginawa na too, tan lapud satan et linmoor so kelang ed interon mundo.

•   Lapud inkaagum na totoo tan saray ginawa ran patakaran ya agda la ninonot so epekto na saratan ed arapen, naupot laingen iray kakiewan, linmoor so polusyon, tan aliway impangusar ed saray natural a kayaman na dalin. Bilang resulta, napepeligro iray importantin panlalapuan na danum.

 Balet mangiiter na ilalo so Biblia.

 Im-promise na Biblia ya resolbien na Dios so kakulangan na danum natan. Panon?

1.  1. “Deralen [na Dios] iramay manederal ed dalin.” (Apocalipsis 11:18) Ekalen to so sakey ed saray rason no akin ya kulang so danum—saray mauges, maagum ya totoo ya manederal ed kaliberliber.—2 Timoteo 3:1, 2.

2.  2. “Magmaliw a maranum a pasen so amagamagan dalin.” (Isaias 35:1, 6, 7) Ayosen na Dios iray dineral na kelang tan gawaen ton paraiso iyan dalin, ya sustoy danum to.

3.  3. “Aasikasoen mo so dalin, pambubungaen mo itan na dakdakel tan payayamanen mon maong.” (Salmo 65:9) Bendisyonan na Dios so dalin kanian nawalaan na dakel ya maabig ya naakan tan malinis ya danum so amin.