Lapud guerra ya nagagawa ed Ukraine tan lapud climate change, onkukulang so suplay na naakan ed interon mundo. Kanian mas lalon nairapan iray bansa ya dati da lan problema so suplay na naakan da.

•   “Lapud guerra, climate change, tan ibibili na gasolina tan koryenti, apektado so suplay na naakan.”—António Guterres, secretary-general na UN, Hulyo 17, 2023.

•   “Agla kaiba so Russia ed kasundoan ya makapan-export iray ilik ya manlapud Ukraine. Lapud satan, imbaga na saray eksperto ya mas lalon onloor so krisis ed naakan diad interon mundo tan mas onatagey so presyo na saray sasaliwen diad saray aliwan mainawan bansa, singa diad North Africa tan Middle East.”—Atalayar.com, Hulyo 23, 2023.

 Imanoen so ibabaga na Biblia tungkol ed krisis ed naakan tan no antoy nagawad arapen.

•   Oniay impasakbay nen Jesus: “Manlalaban iray bansa ontan met ed saray panarian, tan wala ray eras.”—Mateo 24:7.

•   Diad libro na Apocalipsis, in-describe so apatiran akakabayo ya walay isisimbolo da. Say sakey ed sikara et isisimbolo toy guerra. Manuttumbok ed sikato so sakey nin akakabayo ya irerepresenta toy eras, aya may panaon ya limitadoy naakan na saray totoo tan sobray bili na presyo na saray naakan. “Anengneng koy sakey a kabayon andeket. Say akakabayod saya sankabembenan toy sakey a simbangan. Nadngel kod satay boses . . . Inkuan to, ‘Sakey a salup na trigo labat so nasaliw na sakey ya denario a sanagew lan sueldo, tan taloran salup na sebada labat so nasaliw na sakey a denario a sanagew lan sueldo.’”—Apocalipsis 6:5, 6, Maung a Balita.

 Sarayan propesiya na Biblia tungkol ed krisis ed naakan et nagagawa la ed panaon tayo ya tatawagen na Biblia ya “kaunoran iran agew.” (2 Timoteo 3:1) Pian naaruman ni antam tungkol ed “kaunoran iran agew” tan say apatiran akakabayo ya abitlad Apocalipsis, bantayan so video ya Anguma-uman so Mundo Manlapu La nen 1914 tan basaen so artikulon “Say Apatiran Akakabayo—Siopa Iratan?”

•   Wala ray praktikal ya bilin diad Biblia ya makatulong ed sikatayon nasarag iray mairap ya situasyon, kaiba lay ibibili na saray presyo na naakan, anggan say kakulangan na naakan. Nengnengen so pigaran bilin na Biblia diad artikulon “No Panon ya Pasaragen so Daiset ya Kuarta.”

•   Mangiiter met na ilalo so Biblia ya ondakep lanlamang so situasyon. Impromisa na Biblia ya onsabi panaon et “dakdakel so anien ya ilik diad dalin” tan dakel so naakan na amin ya totoo. (Salmo 72:16) Pian naamtaan mo ni tungkol ed satan ya ilalo ed arapen tan no akin ya napantiwalaan mo itan, basaen so artikulo ya “Makakaasa Ka sa Isang Magandang Kinabukasan.”