Kailangan tayoy malinis ya danum pian nabilay. Balet ngalngali agnasuplayan na malinis ya danum so binilyon a totoo. Diad tuay tua, onia ni ingen so imbaga na UN Secretary-General ya si António Guterres: “Lapud karakel ya manguusar na danum, onkukulang laingen so suplay.”

 Onsabi ni kasi panaon ya agti la problemaen so malinis ya danum? Antoy kuan na Biblia?

Kuan na Biblia ya agla onkulang so danum

 Nabasad Biblia ya onsabi panaon et sawaan lay malinis ya danum tan aglan balot onkulang.

 “Ombusitsit so danum diad kalawakan, tan onagus so danum diad patar a desierto. Magmaliw a maranum a pasen so amagamagan dalin, tan ompaway iray subol na danum diad amagaan a dalin.”​—Isaias 35:6, 7.

 Segurado ’tan. Panon tayon amta ey? Nengnengen tayo pay kuan na Biblia ya inkagawa na planeta tayo.

Say inkagawa na planeta tayo tan say water cycle

 “[Agpinalsa na Dios so dalin] ya andiay gagala, noagta ginawa ton panayaman.”​—Isaias 45:18.

 “Paoonlaen [na Dios ed] tagey iray tedter na danum; magmamaliw iratan ya uran manlapud saray kelpa; insan ipepelag iratan na lurem; onteterter iratan ed katooan.”​—Job 36:27, 28.

 “Ikdan ta kayoy uran diad dugan panaon, tan say dalin et mamawala na bunga to, tan saray kiew ed uma et manbunga.”​—Levitico 26:4.

 Dumaralos iray Israelita nensaman. Tan insipan na Dios ed sikara ya bendisyonan toy tanem da pian dakel so anien da. Pero siempre, pian natoor toy sipan to, sinegurado na Dios ya onuran diad panaon ya kaukolan day uran.

 Ontan met so gawaen na Dios diad arapen. (Isaias 30:23) Pero natan, dakel nin siansia so nakukulangay danum tan matalag so uran ed dakel ya lugar. Panon kasin solusyonan na Dios so amin ya problema ed danum?

Panon ya solusyonan na Dios so amin ya problema ed danum

 Base ed Biblia, usaren na Dios so Panarian to. Gobierno na Dios itan ya manuley ed interon dalin. (Daniel 2:44; Apocalipsis 11:15) Atan so man-solusyon ed amin ya problema tayo, kaiba lay problema ed danum. (Mateo 6:9, 10) Kanian amin iramay problema ya agsarag ya ekalen na gobiernoy too et solusyonan na Panarian na Dios.

 Problema: Lapud climate change, aliwa lan normal so water cycle. Kanian diad arum ya pasen, mabayag ya anggapoy uran. Diad arum balet ya lugar, grabe so delap ta agmanunday uran tan manatagey lan manatagey so level na danum ed dayat.

 Solusyon: Solusyonan na Panarian na Dios so amin ya problema ed kalikasan pian ompawil ed dati so planeta tayo. Oniay imbaga na Dios: “Gagawaen kon balo so amin a bengatla.” (Apocalipsis 21:5) Onagus lay danum diad saray amagan dalin kanian nabilay la ray tanaman, kakiewan, tan ayayep diad saray lugar ya datin agnapanayaman. (Isaias 41:17-20) Si Jesus ya Ari ed Panarian na Dios et pansiansiaen ton normal iray puersa ed dalin, singa say gravity.

 Problema: Kulang so suplay na malinis ya danum lapud wala ray totoon anggapoy disiplina ra. Wala met iray pabrika tan kompanya ya manudutak ed saray ilog tan manederal ed saray subol na danum.

 Solusyon: Ekalen na Dios so amin ya dutak diad ilog, dayat, tan dalin pian magmaliw ya malinis so planeta tayo tan magmaliw lan paraiso. Oniay nabasa ed Biblia: “Manliket so kalawakan tan say amagaan a dalin, tan manggayaga so patar a desierto tan manrosas a singa safron.”​—Isaias 35:1.

 Problema: Aliway panma-manage na totoo ed suplay na danum. Maples ya naupot so malinis ya danum balet mabayag ya nasalatan.

 Solusyon: Diad Panarian na Dios, aliwa lan say panlabayan na makasarilin totoo so nagawa, noagta say panlabayan na Dios. (Mateo 6:9, 10) Bangatan met iray totoo no panon dan asikasoen so planeta tayo. Oniay ibabaga na Isaias 11:9: “Say dalin et napano na kakabatan ed si Jehova.” a Diad satan a panaon, makalakal tan marunong lay amin a totoo, inar-aro day Dios, tan saray palsa to. Kanian naasikaso da lan maong so interon dalin, say panlalapuan na malinis a danum, tan arum nin kailangan tayo.

•    Basaen so artikulo ya “Antoy Gawaen na Panarian na Dios?” ta wala ni rad tay nabasam tungkol ed Panarian na Dios.

•    Basam so libro na Biblia ya Isaias, diad kapitulo 35 pian naamtaan mo no panon ya onggawan paraiso so interon dalin.

•    Bantayan so video ya Akin ya Ginawa na Dios so Dalin? pian mas natalosan mo no akin ya ginawa na Dios so dalin tan saray totoo.