Nen Mayo 19, 2022 dinengel na United Nations Security Council so masulok ya 75 ya ataragey ya opisyal ya angibagan “say krisis ed naakan ed interon mundo, ya apektado la na COVID-19 pandemic tan climate change, et mas lalon grinmabe lapud guerra ed Ukraine tan lapud satan et posiblin niwalay eras.” Kayari na satan, indeklara na The Economist ya “lapud guerra et mas ondakel ni totoon narasan ed sayan mundon napno lay problema.” Impasakbay la na Biblia ya diad panaon tayo et nagawa iray ontan ya krisis ed naakan, balet mangiiter met itan na tulong pian nasarag tayo iratan.

•    Oniay impropesiya nen Jesus: “Manlalaban iray bansa ontan met ed saray panarian, tan wala ray eras.”—Mateo 24:7.

•    Idedeskribe na libro na Biblia ya Apocalipsis so apatiran simbolikon akakabayo. Irerepresenta na sakey ed saratan ya akakabayo so guerra. Ontutumbok ed sikato so sakey nin akakabayo ya mangirerepresenta ed eras, aya may panaon ya nairapan ya mananap na naakan iray totoo tan sobray bili na saray presyo na naakan. “Anengneng koy sakey a kabayon andeket. Say akakabayod saya sankabembenan toy sakey a simbangan. Nadngel kod satay boses . . . Inkuan to, ‘Sakey a salup na trigo labat so nasaliw na sakey ya denario a sanagew lan sueldo, tan taloran salup na sebada labat so nasaliw na sakey a denario a sanagew lan sueldo.’”—Apocalipsis 6:5, 6, Maung a Balita.

 Sarayan impropesiya na Biblia nipaakar ed saray krisis ed naakan et nasusumpal la natan ed sayan panaon ya tatawagen na Biblia ya “kaunoran iran agew.” (2 Timoteo 3:1) Pian naaruman ni antam nipaakar ed “kaunoran iran agew” tan say apatiran akakabayo ya abitlad Apocalipsis, bantayan so video ya Anguma-uman so Mundo Manlapu La nen 1914 tan basaen so artikulon “Say Apatiran Akakabayo—Siopa Iratan?”

•    Wala ray praktikal ya bilin diad Biblia ya makatulong ed sikatayon nasarag iray mairap ya situasyon tayo, kaiba lay ibibili na saray presyo na naakan odino anggan say kakulangan na naakan ni ingen. Nengnengen so arum ya alimbawa diad artikulon “No Panon ya Pasaragen so Daiset ya Kuarta.”

•    Mangiiter met na ilalo so Biblia ya ondakep lanlamang so situasyon. Impromisa na Biblia ya onsabi panaon ya “dakdakel so anien ya ilik diad dalin” tan dakel so naakan na amin ya too. (Salmo 72:16) Pian naamtaan mo ni ibabaga na Biblia ya ilalo ed arapen tan no akin ya napantiwalaan mo itan, basaen so artikulon “Makakaasa Ka sa Isang Magandang Kinabukasan.”