Problema ed interon mundo so kurapsion ya gagawaen na saray opisyal na gobierno, tan aliwliway epekto na satan. a Singa bilang, legan na COVID-19 pandemic, naakusaan iray opisyal ed dakel ya bansa ya nankurakot ed saray pundo ya para komon ed saray totoon mankaukolan legan na pandemic. Lapud ontan ya kurapsion, aglaingen akasabi ed totoo iray medikal ya tulong kanian dakdakel so nanirap tan inatey.

 Grabe so epekto na kurapsion ed gobierno. Oniay imbaga na datin prime minister na United Kingdom ya si David Cameron: “Say kurapsion et singa balbaleg ya linat—tan amin ya bansa et narel ed satan.”

 Balet makaseguro tayo ya asingger lan naandi so amin ya kurapsion ed gobierno. Akin ey? Imanoen so ibabaga na Biblia ya gawaen na Dios.

 Nabasa ed Biblia iyan imbaga na Dios: “Siak, si Jehova, et inarok so inkahustisya; kabusol koy panagtakew tan ag-inkatunong.” b (Isaias 61:8) Amta na Dios no nanairapan iray totoo lapud mauges ya gagawaen na arum. (Proverbio 14:31) Oniay impromisa to: “Lapud nalalames iray pobri, . . . manparaan ak ya onkiwas.”—Salmo 12:5.

 Antoy gawaen na Dios? Imbes ya tulongan to iray gobierno ya manuuley natan, salatan to iratan, tan say isalat to et say mismon gobierno tod tawen ya tatawagen ya “Panarian na Dios.” (Marcos 1:14, 15; Mateo 6:10) Ibabaga na Biblia: “Say Dios na tawen et mangiletneg na panarian. . . . Buyaken tan panganggaen to irayan amin [ya arum ya] panarian, tan saya labat so mansiansia ed andi-anggaan.” (Daniel 2:44) Ontan so gawaen na Dios pian naandi so kurapsion ya nanenengneng tayo natan.

 Panon tayon amta ya agmagmaliw ya kurakot so gobierno ya Panarian na Dios? Imanoen iraya.

1.  1. Pakayari. Say Makapanyarin-amin a Dios so mangiter na pakayari ed Panarian.—Apocalipsis 11:15.

    No akin ya importante itan: Akadepende iray gobierno na too ed kuarta ya iiter na saray walad sakop da pian nagawaan day kimey da. Lapud satan, naiikdan na pankanawnawa iray manuley ya mangawat na pasuksok, mantakew, odino usaren iray pundo ed makasarilin gagala. Balet say Panarian na Dios et susuportaan ya mismo na Makapanyarin-amin a Dios, kanian sarasarag na satan ya iter so amin ya pankaukolan na saray walad sakop to.—Salmo 145:16.

2.  2. Manuley. Si Jesu-Kristo so tinuro na Dios ya Manuley ed Panarian.—Daniel 7:13, 14.

    No akin ya importante itan: Anggan saray sankamaongan ya toon manuley et nayarin naimpluensyaan ya manggaway mauges. (Eclesiastes 7:20) Duma balet si Jesus ta agbalot napasuksokan. (Mateo 4:8-11) Sakey ni, amin ya gagawaen to parad saray walad sakop to et lapud panangaro tod sikara, tan talagan interesado ed pankaabigan da.—Salmo 72:12-14.

3.  3. Saray Ganggan. Perpekto iray ganggan na Panarian na Dios tan nainawaan iray onunor ed saratan.—Salmo 19:7, 8.

    No akin ya importante itan: Kaslakan et komplikado iray ganggan na gobiernoy too, makapabelat, odino aliwan duga so paraan na pangipapaakseb ed saratan, kanian nagagawa so kurapsion. Duma balet iray ganggan na Dios ta praktikal tan makagunggona. (Isaias 48:17, 18) Sakey ni, aliwa labat ya say gagawaen na too so sakopen na saratan ya ganggan, noagta pati say motibo na too. (Mateo 22:37, 39) Siempre, nabasa na Dios so puso na too tan seguroen to ya mapangasin nipaakseb iratan.—Jeremias 17:10.

 Papasesegen mi kan amtaen nin maong so promisa na Biblia nipaakar ed isabi na panaon ya anggapo lay kurapsion ed gobierno.

•   Basaen so artikulon “Panarian na Dios—Gobierno ya Anggapoy Kurapsion” pian naamtaan moy talora nin rason no akin ya agbalot magmaliw ya kurakot so Panarian na Dios.

•   Bantayan so video ya Anto so Panarian na Dios? pian naaruman ni amtam nipaakar ed gobierno na Dios tan no antoy gawaen na satan diad dalin.

•   Salien so iyoopresi min libren interactive ya paraan na panag-aral na Biblia pian nanengneng mo no panon kan nagunggonaan ed saray promisa na Biblia.