Diad sayan taon 2024 dakdakel so nagawan eleksion diad interon mundo. Balet naandi lay tiwala na dakel ya totoo ed saray politiko.

•   Kaslakan ed saray Amerikanon atepetan et ibabaga dan ombabatik labat “iray maslak ya politiko lapud makasarilin motibo” aliwan lapud labay dan panserbian iray totoo. a​—Pew Research Center, Setyembre 19, 2023.

 Dakel met so kabataan ya anggapo lay tiwala da ed saray politiko.

•   “Interesado iray tinedyer ed saray solusyon ed importante iran isyu, pero diad saray survey ibabaga ra ya ag-ira natutulongan na saray politiko.”​—The New York Times, Enero 29, 2024.

•   “Base ed sakey ya survey mas mantitiwala iray kabataan ed saray nababantayan da ed YouTube nen say diad saray politiko.”​—The Korea Times, Enero 22, 2024.

 Makapantiwala tayo kasi ya sarag ya gawaen na saray politiko ya mas marakep so arapen? Siopay napantiwalaan tayo?

 Duga labat ya manalwar iray totoo ed no siopay pantiwalaan da. Ibabaga na Biblia ya “say toon anggapoy amta to et manisia ed kada salita, balet samay makabat et dadalepdepen toy kada gawaen to.”​—Proverbio 14:15.

•   Wala ray makatulong pian nibiig yo no kasin duga o aliwa so impormasyon ya akasabid sikayo, basaen so artikulon “Protektaan Moy Sarilim ed Saray Aliwan Tuan Impormasyon.”

 Sakey ni, anggano matua tan maong so intension na sakey ya politiko, limitado labat so nagawaan to. Kanian oniay pasakbay na Biblia:

•   “Ag ka manmamatalek ed saray totoon pangulo; anggapoy toon makapangilaban ed sika.”​—Salmo 146:3, Maung a Balita.

 Ipapaliwawa na Biblia ya tinuro na Dios so sankakualipikadoan tan napantiwalaan ya lider: si Jesu-Kristo. (Lucas 1:32, 33) Si Jesus so Ari na Panarian na Dios, sakey ya gobiernon manuuley ed tawen.​—Mateo 6:10.

•   Amtaen no akin ya napantiwalaan yoy Jesus tan no antoy gawaen to pian nasolusyonan iray problema tayo. Basaen iray artikulon “Siopa so Ari ed Panarian na Dios?” tan “Antoy Gawaen na Panarian na Dios?”