“Napepeligro lamet so ekonomya na interon mundo,” so imbaga na presidente na World Bank Group diad sakey a report nen Hunyo 2022. “Ombibili iray sasaliwen, balet agnaaaruman so nanaalmo na totoo.”

 “Maples ya ontatagey so presyo na gasolina tan naakan, tan say talagan apektado et saramay walad mairap iran bansa,” so naimano na International Monetary Fund.

 Tutulongan itayo na Biblia ya natalosan no akin ya nagagawa irayan problemad ekonomya, no panon tayon nasarag iraya, tan ipapaamta to met so ilalo ya permanentin manresolbe ed sarayan problema.

•   Say tawag na Biblia ed panaon ya pambibilayan tayo et “kaunoran iran agew.”—2 Timoteo 3:1.

•   Imbaga nen Jesus ya wala ray “makapataktakot a nanengneng,” odino makapakebbiew ya nagawa ed sayan panaon. (Lucas 21:11) No ombibili iray sasaliwen, natatakot iray totoo. Naaaburido ira ed no antoy nagawad arapen da, tan ompan agda la nitarya iray pankaukolan na pamilya da.

•   Impasakbay na libron Apocalipsis ya ontagey iray presyo na naakan legan na sayan panaon. “Nadngel kod satay boses . . . Inkuan to, ‘Sakey a salup na trigo labat so nasaliw na sakey ya denario a sanagew lan sueldo, tan taloran salup na sebada labat so nasaliw na sakey a denario a sanagew lan sueldo.’”—Apocalipsis 6:6, Maung a Balita.

 Pian naaruman ni antam nipaakar ed “kaunoran iran agew” tan say propesiya ya nabasad libro na Apocalipsis, bantayan so video ya Anguma-uman so Mundo Manlapu La nen 1914 tan basaen so artikulon “Say Apatiran Akakabayo—Siopa Iratan?”

•   “Mangipaalagey ira na kaabungan tan manayam ira ditan, tan mantanem ira na kaubasan tan kanen day bunga to. Ag-ira mangipaalagey tan sananey so manayam, ag-ira mantanem tan sananey so mangan.”—Isaias 65:21, 22.

•   “Dakdakel so anien ya ilik diad dalin; say toktok na kapalandeyan et napanopano.”—Salmo 72:16.

•   “‘Lapud nalalames iray pobri, lapud paneermen na saray mairap-bilay, manparaan ak ya onkiwas,’ kuan nen Jehova.”—Salmo 12:5. a

 Asingger lan solusyonan na Dios so aliwan patas ya kipapasen na ekonomya diad interon mundo. Pian naamtaan mo no panon ya nagawa itan, basaen so artikulon “Posible Kasin Magmaliw ya Patas so Sistema ed Ekonomya?”

 Pero natan ni labat, natulongan ka la na Biblia pian nasarag mon arapen so ibibili na saray sasaliwen. Panon itan ya makatulong? Wala ray praktikal ya bilin ditan no panon mon usaren so kuartam diad dugan paraan. (Proverbio 23:4, 5; Eclesiastes 7:12) Parad kaaruman ya impormasyon, basaen iray artikulon “Protektaan Moy Pangaalaan Yo na Pambilay” tan “No Panon ya Pasaragen so Daiset ya Kuarta.”