Antoy Ibabaga na Biblia Tungkol ed Kakulangan na Naakan Diad Panaon Tayo?
“Anggapon balot so naerasan.” Atan so goal na saray manuley ed mundo pian nasolusyonan so sakey ed saray sankabalegan ya problema na saray totoo—kulang so naakan. a Wala kasi solusyon pian anggapo lay naerasan? Antoy ibabaga na Biblia?
Impasakbay la na Biblia ya wala ray nagawan eras ed panaon tayo
Nensaman, impasakbay la na Biblia ya wala ray nagawan eras diad panaon tayo, ya tatawagen a “kaunoran iran agew.” (2 Timoteo 3:1) Aliwan say Dios so rason no akin ya onkukulang so naakan, pero pinasakbayan to itayo ya nagawan-nagawa itan diad panaon tayo. (Santiago 1:13) Imanoen irayan duaran propesiya ed Biblia.
“Wala ray eras . . . ed nanduruman pasen.” (Mateo 24:7) Impasakbay la na Biblia ya wala ray nagawan eras diad interon mundo. Oniay inreport na saray eksperto tungkol ed suplay tan distribusyon na naakan: “Mas lalon onloloor so eras ed interon mundo tan onkukulang so suplay na masustansia iran naakan.” b Minilyon ya totoo ed dakel ya bansa so naeerasan lapud kakulangay naakan. Makapaermen ta dakel ed sikara so ompapatey.
“Anengneng koy sakey ya andeket a kabayo, tan samay akakabayo ed satan et akaegna na simbangan.” (Apocalipsis 6:5) Diad sayan propesiya, isisimbolo na kabayo tan samay akakabayo so eras ya nagagawa ed kaunoran iran agew. c Samay akakabayo et walay sankaegnaan ton simbangan ta kailangan ya apagen so datdaiset ya suplay na naakan. Legan ya akalugan, walay boses ya angibagan ombili so presyo na saray naakan, tan pinasakbayan to ray totoo ya mantipid. (Apocalipsis 6:6) Dugaruga iyan simbolo na krisis ed naakan diad panaon tayo, lapud binilyon ya totoo so agmakakaawat tan agmakakasaliw na masustansia iran naakan.
No panon ya nasolusyonan so krisis ed naakan
Ibabaga na saray eksperto ya sarasarag na planeta tayo ya suplayan na dakel a naakan so amin ya manaayam dia. No ontan sirin, akin balet et onkukulang nin siansia so naakan? Tan antoy ibabaga na Biblia ya gawaen na Amalsa tayo, si Jehova, d pian nasolusyonan iyan problema ed mundo?
Problema: Agsarag na saray gobierno ya ekalen so kairapan tan saray problema ed ekonomiya ya manreresulta ed eras.
Solusyon: Saray gobiernoy totoo et salatan na perpekton gobierno—say Panarian na Dios. (Daniel 2:44; Mateo 6:10) Dakel natan so mairap-bilay, tan ngalngali ag-ira makasaliw na naakan. Pero anggapo lan balot so ontan diad uley na Panarian na Dios. Oniay ibabaga na Biblia tungkol ed si Jesu-Kristo, say Ari na Panarian na Dios: “Iliktar to so mairap-bilay ya onkekerew na tulong. . . . Dakdakel so anien ya ilik diad dalin; say toktok na kapalandeyan et napanopano.”—Salmo 72:12, 16.
Problema: No wala ray guerra, apektadon maong so ekonomiya, kanian nalilimitaan so suplay tan distribusyon na naakan.
Solusyon: “Papatundaen [nen Jehova iray] guerra diad interon dalin. Puputeren to ray pana tan dederalen to ray gayang; popoolan to ray kariton a parad guerra.” (Salmo 46:9) Deralen na Dios iray armas ya uusaren ed guerra, pati saray totoon mangigagapo na guerra. No nagawa la itan, amin ya totoo diad dalin et agla nairapan ya makala na naakan. Oniay im-promise na Biblia: “Ombulaslas so matunong, tan inerman a pasen et walay kareenan.”—Salmo 72:7.
Problema: Lapud aliwliwan panaon tan natural iran kalamidad, nadederal iray tanem tan ompapatey iray ayayep.
Solusyon: Kontrolen na Dios iray natural a puersa ed dalin pian dugaruga so klima parad saray tanem ya pangalaay naakan. Oniay ibabaga na Biblia: “Patutundaen [nen Jehova so] maksil a dagem; ondedeen iray daluyon na dayat. . . . Say desierto et pagmamaliwen ton maranum a pasen, tan say amagan dalin et pagmamaliwen ton subosubol na danum. Panaayamen to ditan iramay nanaerasan . . . Mangisisibwag ira na bini ed kaumaan tan mantatanem ira na kaubasan a manbubunga na dakdakel.”—Salmo 107:29, 35-37.
Problema: Wala ray maagum tan kurakot ya totoo ya manggagaway delikadon naakan, odino iyaamot da iray naakan pian aga nasuplayan iray mankaukolan.
Solusyon: Deralen na Panarian na Dios so amin ya matila tan kurakot ya totoo. (Salmo 37:10, 11; Isaias 61:8) Diad Biblia, in-describe si Jehova ya Dios bilang “Samay mangipapaseguroy hustisya ed saramay nalalames, samay mangiiter na naakan ed narasan.”—Salmo 146:7.
Problema: Kada taon, kakatlo o 1/3 ya suplay na naakan ed interon mundo so napeperdi labat.
Solusyon: Diad uley na Panarian na Dios, dugay pangasikaso ed saray suplay na naakan. Nen wadiad dalin si Jesus, anggapoy sinayang ton naakan. Aminsan, nanggaway milagro pian napakan so masulok ya 5,000 a totoo. Kayari to ran pinakan, oniay ingganggan to ed saray disipulo to: “Tipon yo iray akeran pisagpisag, ta pian anggapoy naperdi.”—Juan 6:5-13.
On, ekalen na Panarian na Dios so amin ya rason no akin ya naeerasan iray totoo. Diad satan ya panaon, na-enjoy tayo lay dakdakel ya masustansian naakan. (Isaias 25:6) Pian naamtaan mo no kapigan itan gawaen na Panarian na Dios, basaen so artikulon “Kapigan Uleyan na Panarian na Dios so Dalin?”
a Say 2030 Agenda for Sustainable Development, ya goal met na amin ya membro na United Nations nen 2015.
b Say pinan-iiban report na Food and Agriculture Organization of the United Nations, International Fund for Agricultural Development, United Nations Children’s Fund, United Nations World Food Programme, tan say World Health Organization.
c Pian naaruman ni antam tungkol ed apatiran akakabayo ya abitlad Apocalipsis, nengnengen so artikulon “Say Apatiran Akakabayo—Siopa Iratan?”
d Jehova so ngaran na Dios. (Salmo 83:18) Nengnengen so artikulon “Siopa si Jehova?”
Ompan Nagustoan Mo Met
EBAT ED SARAY TEPET ED BIBLIA
Anto so Tanda na “Kaunoran Iran Agew,” odino “Panaon na Anggaan”?
Impasakbay na Biblia iray dakel ya manbabansag ya nagawa ya pakapatnagan na kaunoran iran agew.
ARUM NIN TOPIC
Posible Kasin Magmaliw ya Patas so Sistema ed Ekonomya?
Walay gobierno ya perpekto so panuley to ed saray nagagawad dalin kanian aglan balot manirap iray totoo odino manaburido no kasin walay pambilay da.
SAY PANAG-BANTAYAN
Say Apatiran Akakabayo—Siopa Iratan?
Amtaen no panon mon natalosan so labay ya ibaga na sayan propesiya.
ESSENTIAL BIBLE TEACHINGS
Anto so Panarian na Dios?
Legan na ministeryo nen Jesus, say manunan topic ya imbangat to et say Panarian na Dios. Nilasus taon lan ipipikasi na saray papatumbok to ya onsabi la komon itan ya Panarian.
