Nen 2024 Summer Olympics, manga limaran bilyon ya totoo so nambantay ed kompetisyon na saray atleta ya nanlapud 206 ya bansa. Oniay imbaga nen Thomas Bach ya presidente na International Olympic Committee: “Say goal mi et pankakasakeyen iray totoo tan niwalay kareenan ed mundo. Suportaan tayo iyan gagala na Olympics, ya amin ya totoo et manbilay ya mareen tan mankakasakey anggano wala ray pandumaan tayo.”

 Nagawaan kasin talaga na Olympics so gagala to? Onsabi ni kasi panaon ya manbilay ya mareen iray totoo tan walay pankakasakey da?

 Parad dakel ya totoo, say 2024 ya Olympics et aliwa labat ya basta sports. Wala ray isyu ed komunidad tan politika ya labay dan naikdan na imano, singa say isyu ed karapatan na too, diskriminasyon lapud lahi tan relihyon, tan say aliwan patas ya panagtrato.

 Labalabay na totoo ya bantayan iray International sports singa say Olympics. Pero diad tua, ompapaway laingen ed saratan ya sports iray nanduruman ugali tan panagnonot na totoo ya rason no akin ya anggapoy pankakasakey tan kareenan.

 Imbaga la na Biblia ya mairap ya niwalay pankakasakey lapud saray ugali na totoo ed panaon tayo. (2 Timoteo 3:1-5) Pian mas dakel ni naaralan mo tungkol ed sayan imbaga na Biblia, basaen so artikulo ya “Inihula Ba ng Bibliya na Magiging Ganito ang Ugali ng mga Tao sa Ngayon?”

 Nabasa ed Biblia no anton talagay makapangiter na tuan kareenan tan pankakasakey ed mundo. Isisipan na Biblia ya mankakasakey la so amin ya totoo ed dalin diad uley na “Panarian na Dios”—atan imay gobierno To ed tawen.—Lucas 4:43; Mateo 6:10.

 Say Ari ed satan ya Panarian et si Jesu-Kristo, tan gawaen ton mareen so interon dalin. Oniay ibabaga na Biblia:

•   “Ombulaslas so matunong, tan inerman a pasen et walay kareenan.”—Salmo 72:7.

•   “Iliktar to so mairap-bilay ya onkekerew na tulong. . . Iliktar to ra ed panagpairap tan karuksaan.”—Salmo 72:12, 14.

 Natan ni labat, wala lay pankakasakey na minilyon ya totoo diad 239 ya bansa lapud uunoren day bangat nen Jesus. Naaralan na Saray Tasi nen Jehova diad interon mundo no panon iran manbilay ya mareen. Pian naamtaan mo no panon dan nagagawaan itan, maabig no nabasam so isyu na Panag-bantayan ya say title to et “Naekal so Pambubusolan!”