Legan ya nagagawa so guerra ed Ukraine, nanenengneng tayo no panon ya papasesegen na saray lider na relihyon iray totoo ya suportaan so guerra. Imanoen no panon ya susuportaan na saray lider na relihyon so kada panig da:

•   “Pagalangan tan pisalamatan tayoy amin ya sundalo tayo lapud proprotektaan day Ukraine manlapud saray kalaban . . . Say simpatya, impapuson pikakasi, tan suporta mi et naynay yon nailaloan.”—Metropolitan Epiphanius I na Kyiv, ya inreport ed The Jerusalem Post, Marso 16, 2022.

•   “Nanpatawag na espisyal ya misa so pangulo na Russian Orthodox Church parad saray sundalon Russian nen Simba, tan pinaseseg to ra ya protektaan day bansa ra ta ‘atan so manepeg labat ya gawaen na saray Russian’ legan ya tuloytuloy ya migi-guerra so Moscow ed Ukraine.”—Reuters, Abril 3, 2022.

 Duga kasi ya mibabali iray Kristiano ed guerra? Antoy ibabaga na Biblia?

 Ibabaga na Biblia ya saramay tuan patumbok nen Jesu-Kristo et agmibabali ed guerra.

•   “Ipawil moy espadam ed kaluban to, ta amin iramay mangusar na espada et ompatey ed espada.”—Mateo 26:52.

   No say sakey et mibabali ed guerra, talaga kasin uunoren to so imbaga nen Jesus?

•   “Iter kod sikayo so sakey a balon ganggan, a manaaroan kayo; no panon so impangarok ed sikayo, ontan met so panaaroan yo. Diad saya et naamtaan na amin a sikayo iray disipulok—no manaaroan kayo.”—Juan 13:34, 35.

   No say sakey et susuportaan toy guerra, nipapanengneng to kasi so klase na panangaro ya imbaga nen Jesus ya pakabidbiran na saray disipulo o papatumbok to?

 Pian naaruman ni antam, basaen so artikulon “Nayari Kasin Miguerra Iray Kristiano?”

 Talaga kasin posible ya agmakapibabali ed guerra iray Kristiano natan? On. Impasakbay na Biblia ya diad panaon tayo, ya tatawagen ya “kaunoran iran agew,” et wala ray totoo diad nanduruman bansa ya ‘agla ra manaral a miguerra,’ ya singa imbangat nen Jesus.—Isaias 2:2, 4, paimanod leksab.

•   Pian naaruman ni antam, basaen iray serye na artikulo na Ang Bantayan ya say title to et “Ano ang Tingin ng Diyos sa mga Digmaan?”

 Agla manbayag et usaren nen Jehova, a “say Dios na kareenan,” so gobierno tod tawen pian iligtas iray totoo “ed panagpairap tan karuksaan.”—Filipos 4:9; Salmo 72:14.

•   Pian nanengneng mo no panon, bantayan so video ya Anto so Panarian na Dios?