Oniay inreport na United Nations:

•   Manlapu nen Oktubre 7 anggad Oktubre 23, 2023, masulok ya 6,400 so inatey tan 15,200 so asugatan lapud nagagawan guerra ed Israel tan Gaza, maslak ed sikara et sibilyan odino inosentin totoo. Aliwan satan labat, masulok ya 100,000 so inmalis na ayaman.

•   Base ed report nen Setyembre 24, 2023, walay 9,701 ya inatey lapud panlalaban na Russia tan Ukraine, tan 17,748 so asugatan diad Ukraine.

 Antoy ibabaga na Biblia ya pag-asa na saray biktima na guerra?

 Impasakbay na Biblia ya ‘patundaen na Dios iray guerra diad interon dalin.’ (Salmo 46:9) Usaren to so gobierno odino panarian to ed tawen pian salatan so amin ya gobierno na too. (Daniel 2:44) Atan ya panarian so mangekal ed amin ya problema na totoo.

 Nia ray gawaen nen Jesu-Kristo, say Ari na Panarian na Dios:

•   “Iliktar to so mairap-bilay ya onkekerew na tulong,tan samay pakaskasi tan siopaman ya anggapoy ontutulong. Kasian to so pobri tan say mairap-bilay, tan isalba toy bilay na saray maniirap. Iliktar to ra ed panagpairap tan karuksaan.”​—Salmo 72:12-14.

 Ekalen na Panarian na Dios so amin ya aliwliwan resulta na guerra tan krimen.

•   “Punasen to so amin a lua ed kamataan da, tan anggapo lay patey, anggapo met lay panermen tan panakis tan panotot. Saray datin bengatla et linmabas la.”​—Apocalipsis 21:4.

 Agmanbayag, i-improve na Panarian na Dios so bilay diad dalin. Diad tua, impasakbay la na Biblia iray nagagawan “guerra tan balita nipaakar ed saray guerra” diad panaon tayo. (Mateo 24:6) Patunay iratan ya manbibilay tayo la ed “kaunoran iran agew” na uley na too.​—2 Timoteo 3:1.