Aanosan na totoo ed interon mundo so sankapetangan ya temperatura tan saray kalamidad ya resulta na satan. Imanoen irayan report:

•   “Diad apalabas ya 174 ya taon, manlapu nen ginapoan ya irekord so temperatura ed interon mundo, aya la so sankapetangan ya bulan na Hunyo.”—National Oceanic and Atmospheric Administration, U.S. Department of Commerce, July 13, 2023.

•   “Say bansan Italy, Spain, France, Germany tan Poland et makakaeksperiensya na graben petang na dagem ya posiblin onabot ed 48°C diad saray isla na Sicily tan Sardinia – nayarin aya lay sankapetangan ya temperatura ya nirekord ed Europe.”—European Space Agency, July 13, 2023.

•   “Lapud mas ompepetang so planeta tayo, ilaloan tayo ya mas onggrabe, mas mabetbet, tan mas maksil iray uran, tan say epekto to et mas graben delap.”—Stefan Uhlenbrook, direktor na hydrology, water and cryosphere diad World Meteorological Organization, July 17, 2023.

 Kasin napapagaan ka ed idarakel na report tungkol ed aliwa lan normal ya klima? Imanoen no antoy ibabaga na Biblia tungkol ed sayan importantin topic.

 On. Say graben petang ed interon mundo tan arum ni ran pakapatnagan ya aliwa lan normal so klima, et mitukoyan ed saramay impasakbay na Biblia ya nagawa ed panaon tayo. Singa bilang, impropesiya nen Jesus ya wala ray nanengneng tayo ya “makapataktakot” o “nikadkaduma tan makapakebbiew iran bengatla.” (Lucas 21:11; Good News Translation) Lapud grabe lan petang na temperatura ed interon mundo, dakel so natatakot ya ompan agla napanayaman na too so dalin.

 Andi. Ginawa na Dios so dalin ya permanentin ayaman tayo; agto abuloyan ya deralen itan na totoo. (Salmo 115:16; Eclesiastes 1:4) Diad tua, impromisa na Dios ya ‘deralen to iramay manederal ed dalin.’—Apocalipsis 11:18.

 Ipapanengneng na Biblia ya sarag tan labay na Dios ya protektaan so dalin manlapud natural iran kalamidad.

•   “Patutundaen [na Dios so] maksil a dagem; ondedeen iray daluyon na dayat.” (Salmo 107:29) Sarag na Dios ya kontrolen iray natural ya puersa. Sarag ton ayosen iray problema ed kaliberliber ya sengegan na aliwan normal ya klima ya mangaapektad totoo.

•   “Aasikasoen mo so dalin, pambubungaen mo itan na dakdakel tan payayamanen mon maong.” (Salmo 65:9) Diad panamendisyon na Dios, magmaliw ya paraiso so interon dalin.

 No labay mo nin naamtaan so tungkol ed promisa na Biblia ya ompawil ed dati so itsura na dalin, basaen so artikulon “Sino ang Magliligtas sa Lupa?”