Diad interon mundo, dakel so interesado ed tatawagen ya veganism o vegan lifestyle.

•   “Say veganism et paraan na panagnonot tan kabibilay na totoo ya no iner et iiwasan dan sakitan o usaren iray ayayep parad naakan, kawes, o arum ni ran rason.”—The Vegan Society.

 Wala ray totoo ya ontan so lifestyle da lapud concern ira ed saray ayayep. Sakey ni, labay da met ya na-improve so kalikasan, kondisyon na laman da, odino atan so relihyoson papanisiaan da.

•   “Duma so veganism ed arum ya klase na diet, ta saramay totoon oniay lifestyle da et ipapasen da so veganism bilang sakey ya klase na pananisia, prinsipyo, tan paraan pian na-improve so situasyon na mundo.”—Britannica Academic.

 Kasin say veganism so solusyon ed saray problema ed mundo? Antoy ibabaga na Biblia?

 Base ed Biblia, ipapasen nen Jehova a Dios, a say Amalsa, ya mas atagey iray totoo nen saray ayayep. Inikdan to ray autoridad ya uleyan iray ayayep. (Genesis 1:27, 28) Sinmabi panaon, inabuloyan na Dios iray totoo ya mangan na karne na ayayep. (Genesis 9:3) Balet impalinew to ya kabusol to so panagmaltrato ed saray ayayep.—Proverbio 12:10.

 Ibabaga na Biblia ya personal ya desisyon b na sakey no kasin sikatoy mangan na karne odino andi. Antokaman so desisyon to, aliwan satan so basiyan pian sikatoy ipasen na Dios ya mas maong nen say arum. (1 Corinto 8:8) Kanian agtayo dapat babalawen so desisyon na sakey tungkol ed no antoy pilien ton kanen.—Roma 14:3.

 Ibabangat na Biblia ya aliwan say lifestyle tayo so solusyon ed saray problema ed mundo. Dakdakel so problema natan lapud makapuy ya sistema na sayan mundo ed politika, ekonomiya, tan aliwan patas ya panagtrato. Amin iratan et agsarag ya solusyonan na too. Oniay ibabaga na Biblia:

•   “Samay pikewet et agnipetek.”—Eclesiastes 1:15.

 Magano lan ekalen na Amalsa so amin ya problema tayo. Diad simbolikon paraan, in-describe na Biblia no antoy gawaen na Dios diad arapen.

•   “Tan anengneng koy sakey a balon tawen tan sakey a balon dalin; ta naandi la imay datin tawen tan samay datin dalin, tan anggapo la so dayat.”—Apocalipsis 21:1.

 Saray gobierno na totoo o say “datin tawen,” et salatan na “sakey ya balon tawen,” aya imay Panarian o gobierno na Dios ed tawen. Ekalen na Panarian to imay “datin dalin,” ya ontutukoy ed saray mauges ya totoo, tan uleyan na Panarian to so “sakey a balon dalin,”odino saramay malabay ya manpasakop ed sikato.

 Dia labat ed uley na Panarian na Dios naeksperiensya na saray totoo so manbilay ya mareen kaiba iray ayayep, tan naaralan dan asikasoen ya maong so kalikasan.—Isaias 11:6-9.