Diad dakel ya bansa, mas ombibili lan ombibili so naakan, kawes, tan panayaman kanian mairap so bilay na totoo anggan saray Tasi nen Jehova. Balet imbes ya naaburidon maong iray Tasi, naliligliwa ira ta amta ran ‘agbalot paulyanan’ nen Jehova iray lingkor to. (Hebreo 13:5) Lanang ya totooren nen Jehova itan ya imbaga to, tan ontan so ginawa to ed Pilipinas. Anggad natan et dakel ni diay totoon mairap so bilay da. Balet mas mairap ni bilay ed sayan bansa legan na 1970’s tan 1980’s.

 “No maminsan onaakis ak ta anggapoy naakan,” so iistoryaen na sakey ya sister ya si Vicky. a “Wala ray panaon ya belas, asin, tan danum labat so wala.” Onia met so imbaga na sakey ya brother ya si Florencio ya diad saman et agmakalmoy trabaho: “Taloran kawes ya pantagey tan taloran pantalon labat so pansusublayan kon isulong ed aral tan asemblea.” Panon itan ya asarag na totoo nen Jehova? Antoy akatulong ed sikara pian tuloytuloy iran matoor ya makapanlingkor ed sikato? Panon itayon natulongan na alimbawa da no bilang ta biglan manguman so situasyon tan agtayo amtay nagawad sikatayo?

 Matalek iray Tasi ed Pilipinas ya asikasoen ira nen Jehova legan na saraman ya mairap ya panaon. (Hebreo 13:6) Tan talagan ontan so ginawa nen Jehova, kaslakan et diad paraan ya agda iilaloan. Singa bilang, oniay nanonotan na sakey ya sister ya si Cecille: “Sakey litsi na belas labat lay akera ed sikami, nen niluto mi la man parad almusal, anggapo lay onsublay ya kanen mi di tatay, nanay, tan kuyak. Kanian impikasi mid si Jehova ya ikdan to kami na kaukolan mi parad saman ya agew. Legan min mamangan na almusal, walay sinmabin brother ya walay awit ton limaran kilo na belas. Akaakis kami ed liket tan pisasalamat mi ed saman ya bendisyon nen Jehova. Dakel ni ray singa onman ya agawad sikami.”

 Ontan met, inyaplika na totoo na Dios so praktikal ya karunongan ya walad Biblia. (Proverbio 2:6, 7) Singa bilang, walay sakey ya sister ya kapkapampabautismo to, say ngaran to et Arcelita. Diad saman et anggapo ni asawa to tan nanairapan ya maong ta agaylay irap na bilay, kanian imbaga tod si Jehova so amin ya nalilikna to. Insan to dinalepdep may ibabaga na Proverbio 10:4 ya: “Say liman mangiras et pansengegay kairapan, balet say liman makuli et mangawit na kayamanan.” Labay ton iyaplika itan kanian inggapo toy mantanem. “Talagan benendisyonan nen Jehova iray sagpot ko,” so kuan to. “Diad tua, dakel so bunga na saray intanem ko kanian ditan ak la angala na naakan ko tan inlakok so arum kanian walay pamasahek.”

 Anggapo met so kuarta na agagi ya isaliw day dalin tan pampaalagey na saray Kingdom Hall. Balet siansia nin inunor da so ganggan ya mantitipon tan manpapasesegan. (Hebreo 10:24, 25) Ginawa da labat no antoy sarag dan gawaen. Singa bilang, oniay nanonotan na sister ya si Deborah: “Manga anemira kamin onaatendi ed saray aral mi diad melag ya alolong ya impaalagey min dua may kaibak ya payunir. Bulong na nipa so ginawa min atep to, bulong na niyog so dingding to, tan sengeg na niyog iray yurongan to.”

 Balet kaslakan et diad abung na saray agagi so pantitiponan da. “Gawad nipa tan kawayan so melag ya abung mi,” so kuan na sister ya si Virginia. “Kada Sabado, ipireg mi ray gamit ed abung mi pian walay pasen ya pantitiponan na agagi kaimbuasan to.” Diad sananey ya abung, mantedter so atep. Oniay nanonotan na brother ya si Noel, “No onuran, mangisalor kami na saray timba pian diman natipon so danum. Balet agmi la naiimano iratan ya problema ta maliket kamin kaiba iray agagi ya mandadayew ed si Jehova.”

 Anggano mairap so bilay, ag-abawasan so seseg na saray Tasi ed ministeryo da. Oniay natandaan nen Lindina ya tagad Negros: “Baleg so pamilya mi tan si Tatay labat so walay trabaho kanian no maminsan anggapoy kuarta min pamasahe. Mabetbet kamin manakar paonlad teritorya. Balet na-enjoy mi man ta saniiba kamin sankapamilya. Amta min naliliketan si Jehova ed saray sagpot mi.”

 Say sakey ed saray sankairapan ya laen ya pampulongan et saramay nisulinek ya teritorya diad kapalandeyan ta matalag so luganan odino anggapo ni ingen. Oniay istorya nen Esther ya tagad Luzon: “Manga 6 anggad 12 kamin Tasi, masaksakbay kamin ombuat no kabuasan ta pigaran kilometro so akaren mi. Sanagew kamin manpupulong. Wala la ray balon min naakan, insan kami mangan ed silong na saray kiew. Wala ray agagi ya anggapoy naakan da pero mimila ni ran siansia. Kanian ibabaga mid sikara, ‘Agkayo mapaga ta onsusto ed sikatayon amin yay naakan.’”

 Benendisyonan ya maong nen Jehova iratan ya impansakripisyo. Singa bilang, nen 1970 walay 54,789 ya manangipalapag ed Pilipinas. Kasabi 1989 ngalngali adoble so bilang ta inmabot ed 102,487. Nen 2023 say bilang na saray mangipupulong ed Panarian diad Pilipinas et inmabot lad 253,876.

 Anggano mairap so bilay na saray Tasi, malikeliket ira tan dakdakel so agawaan dad panaglingkor da ed si Jehova. “Ag-inamper na irap na bilay so panangaro mid si Jehova,” so kuan na sakey ya brother ya si Antonio. Oniay naobserbaan nen Sister Fe Abad: “Nen agaylay irap na bilay min sanasawa, nansiansia kamin maap-apit ed si Jehova kanian alikna mi liket na simplin panagbilay. Lapud satan, naaralan met na ananak mi so mantiwala ed si Jehova.”

 “No manlilingkor tayod si Jehova aliwan problema so irap na bilay,” so adalepdep nen Lucila ya tagad Samar. Imbaga to ni ya “no iyuuna tayoy Dios, magmaliw tayon kontento tan napansiansia tayoy positibon liknaan. Talagan malikeliket ak ta akabat na saray inyaralan koy Biblia si Jehova tan nampayunir met ira ya kaibak.”

 Amta tayo ya wala ni dalanen tayon mairap ya kipapasen diad arapen, kanian tandaan tayoy imbaga na sakey ya elder ya si Rodolfo, oniay insulat to: “Alikliknak so tulong nen Jehova legan na saray mairap ya panaon nen 1970’s tan 1980’s. Anggano dagdaiset so kuartak, agko aliknan kaskasian ak. Lanang ak ya aasikasoen nen Aman Jehova. Talagan malikeliket ak ed bilay ko natan, tan tatalaranan ko lay ‘tuan bilay’ ed Paraiso diad arapen.”—1 Timoteo 6:19.