“Binmaleg ak ed nisulinek ya baryo,” so imbaga nen Agostinho ya taga Brazil. “Mair-irap so bilay mi. Agko la nituloy so panaaral ko ta kaukolan ko lay mantrabaho parad pamilya mi.” Akaaral labat ya manbasa tan mansulat si Agostinho nen 32 to la. “Nen amtak lay manbasa tan mansulat, agak la nababaingan tan wala lay respetok ed sarilik,” so kuan to.

 Sakey labat si Agostinho ed masulok ya 250,000 ya totoo ya binangatan na saray Tasi nen Jehova ya manbasa tan mansulat diad apalabas ya 70 taon. Akin et gagawaen itan na saray Tasi? Tan panon itan ya akatulong ed saray totoo?

 Nen 1935, manpupulong la ray Tasi nen Jehova diad 115 ya bansa. Diad panagpulong, ipaparengel na saray misionero iray recording na saray paliwawa ya base ed Biblia ya impatalos ed lenguahe na totoon pupulongan da, tan mangiyoopresi met iray publikasyon ed satan ya lenguahe. Anggano amayamay so interesado ya manaral na Biblia, dakel ed sikara et agda amtay manbasa tan mansulat kanian nairapan iran manaral.

 Singa bilang, lapud agda amtan basaen so Biblia, nairapan iran iyaplika iray prinsipyon wadtan. (Josue 1:8; Salmo 1:2, 3) Agda met nagagawaan iray responsabilidad da bilang Kristiano. Singa bilang, no agmakabasa so ateng, ngalngali agto nabangatan so anak to. (Deuteronomio 6:6, 7) Tan no say sakey ya balon Tasi et agmakabasa, agto naibasa so Biblia no manpulong.

 Nen 1940’s tan 1950’s, si Nathan H. Knorr tan Milton G. Henschel, ya duara ed saray mangidadaulo ed saray Tasi nen Jehova, et linma ed nanduruman bansa pian ontulong ya organisaen so panagpulong. Diad saray bansa ya dakel so agmakabasa tan agmakasulat, in-suggest da ed saray branch office ya maabig no wala ray nagawan klase diad kongregasyon pian nabangatan iray totoo ya manbasa tan mansulat.

 Angipawit iray branch office na instruksion ed saray kongregasyon no panon da itan ya gawaen. Diad arum ya bansa, wala la ray programa tan libro ya ginawa na gobierno pian nabangatan da ray totoo ya manbasa tan mansulat, kanian aman met lay inusar na saray agagi. Singa bilang, diad Brazil, akaawat so branch office na saray gamit tan libro ya nanlapud gobierno tan impawit da iratan diad nanduruman kongregasyon. Pero diad arum ya bansa, saray Tasi so angigapo na onian programa.

 Anggan siopa et nayarin manaral—laki, bii, ugaw, tan matatken. Dapat naaralan dan basaen so mismon lenguahe ra. Kanian no maminsan pigapigaran lenguahe so ibabangat na sakey ya kongregasyon.

 Antoy nitulong na sayan programa ed saray totoo? Oniay imbaga na sakey ya Tasi ed Mexico: “Lapud makabasa ak la, natatalosan ko tan onsasabid pusok so mensahe na Biblia. Agak la nababaingan ya manpulong ed saray kakaabay mi, tan mas dakel met so natutulongan ko ya manaral na Biblia.”

 Aliwan satan labat so nitulong na sayan programa. Oniay imbaga nen Isaac ya taga Burundi: “Nen amtak lay manbasa tan mansulat, akaaral ak ya man-construction. Atan so trabahok natan, tan mano-organisa ak na angkakabaleg ya construction project.”

 Si Jesusa ya taga Peru et 49 to la nen nanaral ya manbasa tan mansulat. “Bilang ina,” so kuan to, “siak so mititindaan, kanian dapat amtak ya basaen iray presyo tan ngaran na produkto. Nensaman, irap ko ah. Pero nen akaaral ak ya manbasa tan mansulat, agak la nababaingan no mititindaan ak.”

 Diad inlabas na saray taon, indayew na saray opisyal na gobierno iray Tasi nen Jehova ed programa ra ya ibangat iray totoo ya manbasa tan mansulat. Anggad natan et tuloytuloy ni iyan gagawaen na saray Tasi. Tan mas epektibo lay uusaren dan paraan tan gamit diad pambabangat da. Nanggawa tan nan-imprinta met ira na ngalngali 224 milyon ya brosyur diad 720 ya lenguahe, ya uusaren da pian bangatan iray totoo ya manbasa tan tulongan iramay agtanton akapanaral. a