Manlapud inkaugaw ko, naarok lay katuaan. Labay kon idedikay sarilik ed si Jehova tan manpabautismo. Agawaan ko tan ya goal ko nen 13 so taon ko. Nen 14 ko, tinepetan ak nen Brother Helge Linck a no labay koy manpayunir. Anggad natan et agko iman nalingwanan. Anggano asali met di daddy’k tan mommy’k so manlingkor bilang temporary pioneer (say tawag natan et auxiliary pioneer), anggapoy ideyak no anto ’tay regular pioneer. Akatulong may tepet nen Brother Linck pian pan-isipan ko no panon kon mas napanlingkoran si Jehova.

 Nen 1974, maguloy politika ed Ethiopia kanian wala ray panag-aresto, panagpatey, tan panlalaban. Ag-abayag, agkami la nayarin manpulong ed kaabungan tan angkelag labat ya grupo so pantitipon mi. Imbangat kami na atateng mi no antoy gawaen mi no mas onirap so situasyon. Akatulong iray prinsipyo ed Biblia pian natalosan mi no antoy labay ya ibaga na pagmaliw a neutral. Naaralan mi ya ibangat kami nen Jehova no antoy ibaga mi no bilang ta natepetan kami tan no kapigan kami ag-onesel.​—Mateo 10:19; 27:12, 14.

 Ka-graduate ko, nantrabaho ak ed Ethiopian Airlines. Sakey ya kabuasan, nen wala ak ed trabaho, in-congrats ak na katrabahok ta siak kuno so apili ya man-lead ed parada parad anibersaryo na gobierno. Imbagak ya tampol ed supervisor mi ya agak mibiang ed selebrasyon ta neutral ak.

 Diad sinmublay ya agew nen mantratrabaho ak ed airport, walay anengneng kon lalaki ya akasakbat na paltog tan paonla rad ticket counter. Naisip ko ya wala amoy arestoen dan ontatakas. Balet mankelaw ak ta siak so ituturo da! Manlapud saman, biglan anguman so normal ya bilay ko.

 Inawit ak na saray sundalo diad sakey ya opisina tan diman et pigaran oras da ak ya tinepet-tepetan. Tinepetan da ak: “Siopay panlalapuan na pundo na Saray Tasi nen Jehova? Kasin susuportaan moy Eritrean Liberation Front? Kasin mantratrabaho kayo nen tatay mo parad gobierno na United States?” Makapa-stress ya maong iman, pero diad tulong nen Jehova, kakkalmado ak nin siansia.​—Filipos 4:6, 7.

 Kayari na interogasyon, inyakar ak na saray sundalo ed sakey ya abung ya ginawa dan prisoan. Inkulong da ak ed kuarto ya say kaawang to et 28-square-meter (300-sq-ft), kaibak ditan so 15 kabataan ya bibiin apriso lapud politika.

 Diad saman ya labi, naugip ak ed semento tan aka-uniform ak ni ta anggapoy pampalesan ko. Naisip ko ya seguradon mapagpaga iray atateng ko tan agagik. Amta da ya naaresto ak balet agda amta no iner so kawalaan ko. Impikasik ed si Jehova ya tulongan to ra pian naamtaan da no iner so kawalaan ko.

 Kabangon koy kabuasan, abirbir ko may ugaw nin guardia. Nen anengneng to ak, mankelaw tan kuan to “Akin et wadia ka, Aster?” Akikasi ak ed sikato ya onla ed abung mi tan ibaga tod saray atateng ko no iner so kawalaan ko. Ngarem to man, inyawitan ak na saray atateng ko na naakan tan kawes. Seguradon amay guardia so angibaga ed sikara no iner ak akapriso. Inebatan nen Jehova so pikakasik! Apatunayan ko ya agko bukbukor.

 Binawalan da ak ya nawalaan na sarilin kopyak na Biblia o arum nin publikasyon, tan aga ak met nayarin bisitaen na kapamilyak tan kakaarok. Balet, inusar nen Jehova iray kaparak ya priso pian napaseseg ak. Inagew-agew ko ran pupulongan, tan pambiliban day katuaan tungkol ed Panarian na Dios. Say lanang dan ibabaga ed siak: “Say ilalaban mi et gobierno na too, pero sika, say ilalaban mo et gobierno na Dios. Agka ombabaliktad, anggan pateyen da ka ni!”

 No maminsan, aalaen na saray guardia iray priso parad interogasyon tan bubugbogen da ra. Sakey ya labi, nen manga alas 11 la, inala da ak. Nen wala kami lad kuarto parad interogasyon, amayamay so inyakusa da. Agko kuno susuportaan so gobierno. Tan nen agko labay ya bitlaen so sakey ya political slogan, binugbog ak na duaran guardia. Aminpiga da itan ya ginawa ed siak. Balet akikasi ak ed si Jehova, tan aliknak ya tutulongan to ak.

 Kayari taloy bulan, inasinggeran ak na sakey ya guardia tan imbaga ton sarag ko lay onsempet. Anggano excited ak ya onsempet, naermenan ak met ta nai-enjoy kon pulongan iramay bibiin kaibak ed prisoan.

 Kalabas na pigaran bulan nen anggapo ak ed abung mi, inaresto so amin ya kabataan ed pamilya mi! Inaresto day duaran agagik ya bibii tan sakey ya agik a laki. Lapud saman, nandesisyon ak ya onlad arum ya bansa. Anggano ansakit ed pusok ya taynanan lamet so pamilyak, pinaseseg ak nen mommy’k ya manpabiskeg tan mantiwala ed si Jehova. Kanian nan-flight ak paonlad United States. Diad saman ya labi, wala ray sundalo ya linmad abung mi tan aarestoen da ak lamet. Lapud agda ak nabetan ed abung mi, tinumbok da ak ed airport. Balet kasabi dad airport, tinmekkiab la may eroplano ya niluganan ko.

 Kasabik ed Maryland, in-welcome ak nen Haywood tan Joan Ward, misionero ira tan sikaray nan-study ed atateng ko. Kayari limaran bulan, agawaan kon siansia may goal kon manpayunir. Say anak dan si Cyndi so nagmaliw ya partner ko ed panagpayunir, tan dakel so makapaliket ya eksperiensya mi.

 Nen 1979, pinmasyar ak ed Bethel diad New York tan akabat koy Wesley Parker. Pambiliban ko ray balibalin kualidad to tan saray goal tod espiritual. Nen 1981, nankasal kami, insan ak linmad Wallkill, New York, tan saniba kamin nanlingkor ed Bethel. Say asainmin ko et diad Housekeeping tan Dry Cleaning Department insan inyalis da ak ed MEPS team diad Computer Department. Nen nanlingkor ak ed Bethel, naikdan ak na pankanawnawa ya iyupot so amin ya panaon ko ed panlingkor ed si Jehova legan kon nakakabat iray agagi ya nagmaliw ya kakaarok anggad natan.

 Balet sankanonot ko ray kapamilyak diad Ethiopia, ya maniirap lapud panamasegsegang. Wala nid prisoan iramay taloran agagik ya inaresto da. b Agew-agew iran ibabalonan nen mommy’k na naakan ta anggapoy rasyon ed prisoan.

 Diad saraman ya mair-irap ya panaon, si Jehova so angasikaso ed siak, tan niligliwa tan sinuportaan ak na pamilyan Bethel. (Marcos 10:29, 30) Aminsan, oniay imbaga nen Brother John Booth ed siak: “Malikeliket kami ta kaiba mi kad dia ed Bethel. Anggapo kad dia no agka bebendisyonan nen Jehova.” c Saraman ya imbaga to so angipaseguro ed siak ya benendisyonan nen Jehova so desisyon kon taynan so Ethiopia tan sikato so man-asikaso ed pamilyak.

 Nen Enero 1989, naamtaan mi nen Wesley ya malukon ak. Diad unaan, abigla kami! Balet kayari pigaran agew, amin ya panaaburidoan mi et asalatan na liket. Pero sankanonot mi nin siansia no panon mi kasin asikasoen so pamilya mi, iner so panayaman mi, tan no panon min nasuportaay materyal ya pankaukolan mi kapaway mid Bethel.

 Nen Abril 15, 1989, inkarga mi ray amin ya gamit mi diad kotse mi insan kami nambiahe paonlad Oregon, ta diman mi planon ituloy so full time ya panaglingkor mi bilang payunir. Balet kasabi mid man, wala ray kakaaro mi ya nan-advice ed sikami ya aliwan praktikal no manpayunir kamin tampol. Tua, daiset so tipon mi tan asingger ak lan mananak kanian antoy dugan gawaen mi? Diad saman, dugaruga ya binmisita so manangasikaso na sirkito mi, si Brother Guy Pierce, tan say asawa to, si Penny. d Pinaseseg da kamin ituloy so goal mi. Kanian nampayunir kami tan nantiwala kamin tulongan kami nen Jehova. (Malaquias 3:10) Manlilingkor kamin payunir nen inyanak koy panguloan, si Lemuel, tan say komadua, si Jadon.

 Say sakey ya agmi nalinglingwanan et nen nampayunir kami kaiba ray angkekelag nin ananak mi. Lapud payunir kami, dakel so pankanawnawa min ipaliwawa iray espiritual ya katuaan aliwa labat ya diad saray napupulongan mi noagta pati diad saray ananak mi. (Deuteronomio 11:19) Balet nen inyanak koy komatlon anak mi, si Japheth, akatunda kamin magano ed pampapayunir mi.​—Miqueas 6:8.

 Atalosan mi ya say sankaimportantian ya responsibilidad mi bilang atateng et say pangibangat ed ananak mi pian manisia ra ya talagan tua si Jehova tan nawalaan iray maapit ya relasyon ed sikato. Kanian nan-isip kami na saray paraan pian talaranan da so family worship mi. Nen ugugaw ni ra, saniiba min basaen iray publikasyon ya Listening to the Great Teacher tan Saray Istorya ed Biblia. No maminsan, ida-drama mi iray arum ya istorya ed Biblia. Siak labat so bii ed abung mi, kanian no ida-drama mi istorya nen Jezebel, siak so mangaala ed role nen Jezebel. Labalabay na ananak mi ya kunwarin itulak da ak ed yurongan tan mankunwari iran aso! Likud ed family worship mi, sansakey ya iyaaralan nen Wesley iray ananak mi.

 Inar-aro tan inasikaso min maong iray ananak mi tan lanang min ipipikasi ya lalon onelet so aroan mi bilang pamilya. Nen ombabaleg la ra, imbangat mi ray kimey ed abung. Sikaray mansisinop, manlilinis na kuarto ra, tan manpepesak na kawes da. Naaralan da met so manluto.

 Aliwan saray anak mi labat so akaaral noagta anggan sikami met ya atateng da. Wala ray pagkakataon ya agmi nakontrol so reaksion min sanasawa kanian napansalitaan mi ansakit so sakey tan sakey odino saray ananak mi. No onman lay nagawa, manpaabeba tan manperdonaan kami.

 Regular min iimbitaan ed abung mi iray agagi ed kongregasyon, pati saray Bethelite, misionero, manangasikaso na sirkito, tan saramay manlilingkor ed lugar ya baleg so pankaukolan. (Roma 12:13) No walay bisita mi ed abung, agmi ibabaki iray ananak mi ed kuarto da. Kaiba mi ran mi-istoryaan tan ondengel ed saray eksperiensya. Mabetbet ya mas natandaan da ray apan-istoryaan mi nen say sikami nen Wesley.

 Nansagpot kami nen asawak pian na-enjoy mi panlilingkor mid si Jehova bilang pamilya. Singa bilang, manplaplano tan mantitipon kami kuarta tan bakasyon pian makapasyar kami ed arum ya bansa. Diad amin ya biahe mi, manto-tour kami ed branch office, mimiaral, tan mimila kamin manpulong. Lapud satan, mas naaro mi organisasyon nen Jehova ed interon mundo, tan mas nagmaliw kamin close ed sakey tan sakey.

 Apansin min amayamay so manaayam ed lugar mi ya Spanish so salita da, pero matalag iran napupulongan. Kanian anggano angkelag ni ray ananak mi, tinepetan mi Brother Pierce no antoy nibaga ra ed plano min pamilya ya onalis ed kongregasyon ya mansasalitay Spanish. Makakaimis iran inmebat, “No managsigay ka, onla ka ed pasen ya kawalaan na saray sira.” Apaseseg kamid satan ya imbaga ra kanian inmalis kami ed Spanish congregation diad Woodburn, Oregon. Dakel so nigapo min Bible study ya inmaligwas anggad abautismoan ira, tan amay melag ya Spanish group et nagmaliw ya kongregasyon.

 Nakal ed trabaho si Wesley, kanian inmalis kami ed California ta diman so balon trabaho to. Kayari duaran taon, nampayunir ak kaibay Lemuel tan Jadon. Makapaliket ta nen 2007, akapaniiba kamin inmatendi ed Pioneer Service School. Ag-abayag kayari impan-PSS mi, apansin mi ya amayamay so manaayam ed teritorya mi ya Arabic so salita da. Kanian kayari 13 taon mid Spanish congregation, nandesisyon kamin pamilya ya onalis ed kongregasyon ya Arabic so salita da. Nai-enjoy min pulongan iray mansasalitay Arabic ya onaalis diad teritorya mi tan ed saray walad abroad no wala ray special preaching campaign. Anggad natan et payunir kami ni diad kongregasyon ya Arabic diad San Diego, California.

 Maomaong ya asawa tan ulo na pamilya si Wesley. Aralem so respeto to ed organisasyon nen Jehova. Anggapon balot so negatibon komento to tungkol ed Bethel odino diad saray uksoyan na kongregasyon. Lanang ya positibo iray ibabaga to. Saniba kamin manpipikasi tan lanang to ak ya ipipikasi. Tan no wala ray ambelat ya problema mi, naliligliwa ak ed saray pikakasi to tan atan so ontutulong pian mansiansia ak ya kalmado.

 No pawilen koy apalabas, talagan na-enjoy mi full time ya impanlingkor mi, impamabaleg mid ananak mi, tan intulong mi ed saray kongregasyon ya baleg so pankaukolan. Apatunayan mi ya talagan bebendisyonan nen Jehova iramay iyuuna day panaglingkor da ed sikato, tan agto kamin balot pinaulyanan. (Salmo 37:25) Kombinsido ak ya sankaabigan so desisyon mi ya usaren so interon bilay mi diad panaglingkor ed si Jehova.​—Salmo 84:10.