Naamtaan nen lakik tan baik iray balibalin promisa ya gawaen na Panarian nen Jehova nen 1906, kayarin mismo na impatey na anak da lapud sakit ya diphtheria. Say doktor da et sakey ya Estudyante na Biblia, atan so tawag nensaman ed saray Tasi nen Jehova. Imbaga tod sikara iray makaligliwan ilalo manlapud Biblia, kaiba lay ilalo ya kioli. Lapud saman, nagmaliw ya Estudyante na Biblia si lakik tan baik, si nanay ko, tan anggan si auntie’k.

 Diad dakel ya taon, amin da et masetseseg ed katuaan. Nagmaliw ni ingen ya usherette iray bibii ed pamilya da nen impalabas so “Photo-Drama of Creation” ed Chicago, Illinois diad United States. Makapaermen balet ta si nanay ko labat so nantultuloy ya nanlingkor ed si Aman Jehova. Mair-irap iman parad si nanay ko ta close ya maong so pamilya da, tan saniiba ran nandayew ed si Jehova anggad 1930’s. Apaseseg ak ya maong ed si nanay ko ta matoor tan lanang ton uunoren si Aman Jehova. Tan apaseseg ak met ed si tatay ko ta matoor met ya Estudyante na Biblia.

 Inyanak ak nen 1927, siak so panguloan ed sikamin anemiran sanaagi. Amin mi et nansiansia ed katuaan. Karpentero si tatay ko, tan manaayam kami ed komportablin abung diad sakey ya baryo ed Chicago. Walay baleg ya panagtaneman mi na pisipising, tan wala ray manok tan pato mi.

 Labalabay koy mankimey. Sakey ed saray kimey kod abung et dadaiten ko ray abutaw ya medyas. Agla tanton gagawaen itan natan, pero nensaman, agmi basta-basta ibabantak iray abutaw ya medyas. Manu-mano min dadaiten iratan. Maong labat ta naaralan koy mandait ta sinmabi panaon et atan so nagmaliw ya asainmin ko.

 Sineguro nen tatay ko ya agmin balot napaulyanan so espiritual iran bengatla. Kanian aatendian min amin so Kristianon pantitipon, regular kamin manpupulong, tan pantotongtongan mi sakey a teksto ed Biblia kada agew. Kada Sabado na labi, walay family study na pamilya mi, tan uusaren mi so Say Panag-bantayan.

 Pian napulongan mi ray kakaabay mi, angiyan si tatay ko na di-kuryente ya karatula diad loob na bintana na salas mi. Ginawa itan na saray agagi. Ipapaamta na satan ed totoo no walay publikon paliwawa odino sakey ed saray publikasyon tayo. Mankidyam so silew ed loob na kahon na karatula kanian napansin itan na saray ondadalan. Angipeket met si tatay ko na duaran karatula ed luluganan mi.

 Imbangat ed sikami nen tatay ko diad salita tan gawa ya importantin unoren mi si Jehova. Lanang ya susuportaan nen nanay ko si tatay ko. Nampayunir met si nanay ko nen limay taon la na samay utit ya agi min bii, tan tuloytuloy ya nampayunir legan na andukey ya impanbilay to. Talagan maong so alimbawa na atateng mi.

 Duma so panagbilay na totoo nensaman kompara natan. Anggapo so TV mi kanian say gawaen min sanaagi et onyurong kamid flooring tan ondengel ed radyo, ta wala ray balibalin serye ya narengel mi ditan. Balet say mas panliliketan min pamilya ya dengelen et saray espiritual ya programa ya ibro-broadcast na organisasyon nen Jehova.

 Labalabay mi onatendi ed saray kombension na saray Tasi nen Jehova. Diad sakey a kombension nen 1935, naamtaan mi ya say “baleg ya ulop,” ya makaliktar ed “baleg a kairapan,” ya abitlad Apocalipsis 7:9, 14, et walay ilalo dan manbilay ya anggapoy anggaan diad Paraison dalin. Antis na satan ya taon, parehon mibibiang iray atateng ko ed saray emblema no Memoryal. Balet kayari na satan ya kombension, si tatay ko labat la. Atalosan nen nanay ko ya say ilalo to et aliwan diad tawen ya nakaiba toy Kristo ya manuley, noagta manbilay ya anggapoy anggaan diad dalin.

 Nen 1941, diad sakey a kombension ed St. Louis, Missouri, in-release nen Joseph Rutherford, say mangidadaulo ed kimey diad saman ya panaon, so libron Children. Makmaksil tan abaybayag so tipak! Say edad kod saman et 14, tan sakey taon ak lan abautismoan. Agko nalingwanan may nen pinmila ak ya kaibay arum ya ugugaw tan nanakar kami paonlad stage pian mangala na sarili min kopya na saman ya libro.

 Duma so panagpulong nensaman kompara natan. Nen 1930’s, angusar kami na saray portable ya phonograph pian i-play iray inrekord ya paliwawa manlapud Biblia diad saray nakatongtong mid kaabungan. Antis kamin ontoktok ed puerta, iparaan mi ni so phonograph, tan seguroen min akaposisyon lay dagum tan plaka na satan. Kapaway na akan-abung, mangibaga kami na antikey ya presentasyon, insan mi i-play so apatira tan kapalduan minuto ya paliwawa manlapud Biblia, tan kayari to et mangiyopresi kami na literatura. Maawat iray totoo ed lugar mi tan marespeto ra. Anggapoy nanonotan ko ya pinabaingan da kami legan kamin manpupulong. Nen nampayunir ak nen 16 ko, inikdan ak nen tatay ko na sarilik ya phonograph, tan malikeliket kon inusar iman ed ministeryo. Walay masetseseg ya sister ya partner ko ed panagpayunir, say ngaran to et Lorraine.

 Say sakey nin paraan na panagpulong nensaman et manakar kamid gilig na karsada. Diad saman, say tawag mid onman ya panagpulong et parada na saray “sandwich ya karatula,” ta walay akasulong ya karatula diad arap tan beneg mi. Akasulat ditan iray slogan ya “Religion Is a Snare and a Racket” tan “Serve God and Christ the King.”

 Akatulong iray aral pian niparaan kami ed saray posiblin panamasegsegang tan naaralan mi ditan no antoy iyebat mi pian nidepensa mi so katuaan. Tan talagan sinmabi so panamasegsegang. Singa bilang, nen first time min iyopresi iray magasin tayo diad sakey a matoon tindaan, inerel kami na saray pulis insan da kami inlugan ed van tan inawit ed istasyon da. Balet imbulos da kami lanlamang kayari na pigaran oras, maliket kami ta apasegsegang kami lapud inunor mi si Jehova.

 Kalabas na panaon, impakabat ed siak nen Lorriane so sakey a brother, si Eugene Rosam, ya akabat to met ed sakey ya assembly diad Minneapolis, Minnesota. Binmaleg si Eugene diad Key West, Florida. Nen grade 10 to, na-expel ed eskuelaan da ta agto labay so mibiang ed sakey ya makabansan seremonya. Kayari to man, nampayunir ya tampol. Aminsan, akatongtong toy sakey a biin dati ton kakklase. Pankelawan na samay bii no akin ya na-expel ed eskuelaan si Eugene anta maomaong met ya estudyante. Inusar nen Eugene so Biblia pian ebatan iray tepet to kanian apakiwas ya manaral na Biblia imay bii. Impapuso na saman ya bii so katuaan tan nagmaliw ya sakey ya matoor a sister.

 Nankasal kami nen Eugene nen 1948. Tan nampayunir kamin sanasawa diad Key West. Ag-abayag, naimbitaan kamin manaral ed koma-18 ya klase na Gilead School, tan nan-graduate kami ed bandad gapo na 1952. Imbangat da kami na Spanish ed sakey ed saray klase mi kanian say amta mi et iyasain da kami bilang misionero ed bansa ya say salita et Spanish. Balet aliwan satan so agawa. Nen manaaral kami ed Gilead, peles ya nagagawa so Korean War, insan impatawag na gobierno si Eugene pian mansundalo. Makapabigla iman ta nen World War II, naikdan si Eugene na exemption ed pansundalo. Kanian ingganggan da kamin ag-onaalis ed United States. Adismaya ak ya maong kanian manakis ak. Kalabas na duaran taon, naawat lanlamang nen Eugene so exemption tod pansundalo. Balet walay importantin naaralan mi ed saman ya makapadismayan agawa, no onkapot so sakey a puerta, sarag nen Jehova ya lukasan so sananey ya puerta, tan atan so agawa. Kaukolan mi labat so maanos ya manalagar.

 Nen 1953, kayari na impanpayunir mi ed sakey ya Spanish ya kongregasyon diad Tucson, Arizona, niyasain kami ya manlingkor ed sirkito. Diad dakel ya taon, nanlingkor kamid saray sirkito diad Ohio, California, tan New York City. Insan nen 1958, nanlingkor kami ed distrito a diad California tan Oregon. Nampundo kami ed abung na agagi. Insan nen 1960, linma kami ed Canada, tan nagmaliw ya instruktor si Eugene ed Kingdom Ministry School parad saray manangasikaso ed kongregasyon diman. Nansiansia kami ed Canada ya anggad 1988.

 Say sakey ed saray agko nalinglingwanan legan kamin walad Canada et walay sakey ya pamilya ya apulongan min dua may kaibak ya sister. Akatongtong min unona imay ina, si Gail, tan imbaga tod sikami ya maer-ermen iray ananak to ta inatey si laki da. “Akin et inatey si laki?” so tepet dad sikato. “Iner so nakar da?” pero agmakaebat si Gail. Kanian impanengneng mid sikato so ebat ed Biblia tan impabasa mi iray makaligliwan teksto.

 Diad saman et ombibisita si Eugene bilang manangasikaso na sirkito ed saman ya kongregasyon, kanian sakey simba kami labat diman. Balet pinawil na samay kaibak ya sister si Gail. Antoy agawa ey? Inawat nen Gail so katuaan, tan say asawa ton si Bill, tan saray taloran ananak da—si Christopher, Steve, tan Patrick. Sakey la natan ya elder si Chris diad Canada. Si Steve balet et nagmaliw ya instructor diad sakey a Bible school facility diad Palm Coast, Florida. Tan si Patrick et nagmaliw ya membro na Branch Committee diad Thailand. Diad inlabas na saray taon, nagmaliw kami ya maapit ya sankakaaro. Malikeliket ak ta anggan panon et walay melag ya nitulong ko pian nakabat day Aman Jehova!

 Legan kamin walad Canada, walay inter nen Jehova ed si Eugene ya makapa-excite tan balibalin asainmin. Iyistoryak ed sikayo.

 Nensaman, agnatatalosan na totoo no akin ya agtayo manpapasaksak na dala kanian aliwliway pakanengneng dad sikatayo. Karga na saray dyaryo ed Canada iray istoryan ompapatey iray ugugaw ya Tasi lapud aglabay na atateng da ya pasaksakan ira na dala. Apribilehyoan si asawak ya ontulong pian pruebaan ya aliwan tua iratan ya balita.

 Antis mismo na 1969 ya international assembly diad Buffalo, New York, linmay Eugene kaibay arum ni ran brother ed saray angkabaleg ya ospital diman pian ibaga ya walay manga 50,000 ya Tasi manlapud Canada tan United States so onatendi ed nagawa ya kombension. No walay nagawan emergency ed sakey ya onatendi, talagan makatulong no amta na saray doktor so panmoria tayod dala tan nanengneng da ya talagan makatunongan itan ya papanisiaan tayo. Inikdan da ray doktor na saray artikulo ya inalad saray respetadon dyurnal nipaakar ed panagpatambal ya ag-uusaran na dala. Lapud positibon reaksion na saray doktor, apaseseg si Eugene tan saray brother kanian ginapoan da met lan bisitaen iray ospital diad Canada. Tinulongan da met iray elder diman pian amta day gawaen da no wala ray nagawan medical emergency.

 Kalkalna ya nambunga iray sagpot da. Diad tua, agmin balot inilaloan iray nagmaliw ya resulta! Antoy agawa?

 Diad bandad pegley na 1980’s, akaawat na tawag si Eugene manlapud si Brother Milton Henschel ed world headquarters diad Brooklyn, New York. Labay na Mananguley ya Ulop ya say programa ya kaplesan ya nagagawa ed United States et onlaknab ni pian dakel nin doktor so naikdan na impormasyon tungkol ed panmoria tayod dala. Kanian linma kami nen Eugene diad Brooklyn, tan nen Enero 1998 et nambuo so Mananguley ya Ulop na sakey ya department diad world headquarters ya tinawag ya Hospital Information Services. Ag-abayag et inyasain si asawak tan duara nin brother ya mangikondukta na saray seminar, say unona et diad United States tan ed arum nin bansa. Insan nen kien, binuo iray Hospital Information Department diad nanduruman branch, tan binuo met iray Hospital Liaison Committee diad nanduruman syudad. Talagan dakel ya agagi tan ugugaw so atulongan na satan ya maaron probisyon nen Jehova. Legan ya mangikokondukta na saray seminar tan ombibisita ed saray ospital si Eugene, wala ak balet ed Bethel na kawalaan min lugar, tan maslak say asainmin ko et diad sewing room odino diad kitchen.

 Nen 2006, agawa so sankairapan lan subok ed bilay ko—inatey so inad-arok ya si Eugene. Talagan naiiliw koy panangaro to tan say impaniba min dua! Antoy akatulong ed siak pian nasarag ko iyan subok? Dakel so akatulong, singa bilang, nansiansia ak ya maapit ed si Jehova panamegley na pikakasi tan regular ya panagbasa na Biblia. Tatalaranan ko met so inagew-agew ya morning worship ya kaibay pamilyan Bethel. Babasaen koy kapitulo na Biblia ya angalaan ed teksto diad satan ya agew. Nansiansia ak met ya busy ed asainmin kod Bethel diad Sewing Department, ya ipapasen kon sakey ya baleg a pribilehyo. Nensaman et naikdan ak ni ingen na pankanawnawa ya ontulong ed pandait na saray kurtina parad saray Assembly Hall diad New Jersey tan New York. Natan et manlilingkor ak ed Fishkill Bethel, tan say kimey ko et sagpaminsan ya mandait tan arum ni ya mainomay ya kimey. b

 Parad siak, say sankaimportantian ed bilay et aroen tan unoren si Jehova tan say organisasyon to. (Hebreo 13:17; 1 Juan 5:3) Maliket ak ta inyuna mi iratan nen Eugene ed bilay mi. Kanian matalek ak ya tumangan kami nen Jehova na bilay ya anggapoy anggaan diad paraison dalin, kaiba lay liket ya nanengneng mi lamet so sakey tan sakey.—Juan 5:28, 29.