Walay atsik tan kuyak tan binmaleg kami ed sakey ya baryo ya asingger ed baley na Bicester diad United Kingdom. Manrerenta na abung so atateng mi diad sakey ya farm. Nen 19 lay taon ko, nampayunir ak met ya singa si atsik tan kuyak. Ag-abayag, aturo ak ya man-special pioneer diad Scotland. Insan nen 1970, nen 23 lay taon ko, atawag ak ya manlingkor ed Bethel diad London. Legan kon wadman naaralan koy man-sign language. Lapud satan anguman so direksion na bilay ko, nagmaliw ya malikeliket tan mabungabunga!

Nan-aral Ak na Sign Language

 Nen wala ak ed Bethel, inyasain da ak diad Mill Hill Congregation na Saray Tasi nen Jehova, tan ditan ko akabat iray Tasin emel. Agko labay ya lapud mandumaan kami na lenguahe et agak la makapikaaro ed sikara. Kanian nandesisyon ak ya miabay ed saray emel ya agagi no mimiaral ak.

 Diad saman et anggapo ni ray kongregasyon na sign language diad Britain. Onaatendi iray emel diad saray aral ya English so salita, tan ipapatalos na saray agagin makasalita so aral ya salita-por-salita. Manguusar ira na saray sinyas ya ibabase da ed salita tan grammar na English. Balet legan ak ya aanosan ya ibangat na saray agagin emel no panon toy mansinyas, a-realize ko ya walay sarilin grammar na lenguahe ra. Talagan duman lenguahe so English parad sikara! Nen a-realize ko man, mas naar-aro tan arespetok iray emel ya kakaarok ta matoor iran onaatendi ed saray Kristianon pantitipon. Apaseseg ak met ya aralen nin maong so sign language.

 Diad Britain, say lenguahe ya uusaren na saray emel et say British Sign Language, odino BSL. Diad inlabas na panaon naaralan na saray interpreter ed saray aral mi ya usaren iyan mas marakep ya lenguahe nen say Sign Supported English. Lapud satan, mas minanabang la iray emel ed saray aral mi. Mas akaaro da met iray makadngel ya agagi. No pawilen ko iray agawa ed apalabas ya 50 taon, anengneng ko ya benendisyonan nen Jehova so kimey ed sign language. Istoryaen kod sikayo iray balibalin agawa ya akapibiangan ko diad tulong nen Jehova.

Inmaligwas so Kimey ed Sign Language

 Nen 1973, manga sakey taon kayarin aturo ak bilang elder, imbaga na sakey ya emel a brother ya si Michael Eagers ya balibali komon no walay aral ed BSL. Inaprobaan na branch ya siak tan sakey nin elder so mangorganisa na binulan ya aral na sign language ya nagawa ed Deptford, diad bandad southeast na London.

 Balibali resulta! Inmatendi iray emel ya Tasi ya nanlapu ed London tan arum nin parte na southeast England ed sankaunaan ya aral ed BSL. Asabin siansia! Naaralan la na saray emel ya agagi tan saray interesado so nipaakar ed si Jehova tan ed Biblia diad sarili dan lenguahe. Kayari na aral, kaslakan et maniistoryaan kami ni nipaakar ed saray eksperiensya mi legan min manmemerienda. Sasamboten ko met iman ya pankanawnawa pian pabiskegen so arum ed saray agagin emel.

 Sinmabi panaon ya wala met la ray aral na sign language ed saray syudad na Birmingham tan Sheffield. Dakel so makasalitan agagi ya onaatendi ed saray aral lapud labay dan naaralan so BSL. Dakel ed sikara so tinmulong pian napalaknab so ministeryo ed sign language diad interon bansa.

Akalmo Ak na Masuportan Asawa

 Nen 1974, walay akabat kon magangganan special pioneer diad kongregasyon ya asingger ed Bethel, say ngaran to et Stella Barker. Agustoan mi sakey tan sakey tan nankasal kami nen 1976. Kayari to man, saniba kami nen Stella ya nanlingkor bilang special pioneer. Diad Hackney, North London so kongregasyon mi. Diman ginmapon onsuporta ed sign language si Stella ya kaibak. No nanonotan ko man, nibagak ya akatulong so impanpayunir min sanasawa pian magmaliw ya marakep so gapo na ulopan mi.

 Agnambayag, naimbitaan kami nen Stella ya manlingkor ed Bethel bilang commuter. Bip-busy kami! Manlilingkor ak met bilang substitute circuit overseer, mangikokondukta ak met na Kingdom Ministry School parad saray elder, tan ontutulong ak met ya mangorganisa na interpretation na sign language ed saray regional a kombension ya English. Nakekesawan kami pero nai-enjoy min maong iray gagawaen mi.—Mateo 11:28-30.

 Nen 1979 tan 1982, niyanak so duaran anak mi, si Simon tan si Mark. Malikeliket kami pero baleg iyan responsabilidad. Panon min agawaan man? Nandesisyon kami nen Stella ya kada no walay laen kon arawi lapud teokratikon asainmin ko, onla kamin amin bilang pamilya, insan kami met la ompasyar tan man-enjoy. Labay min nanengneng na saray ananak mi ya maliket kami ed panlilingkor mi ed si Jehova! Antoy resulta? Legan ya ombabaleg iray ananak mi, agda labat naaralan so mansinyas noagta nampayunir met ira. Insan manga 40 taon manlapu lad samay inggapon “panlingkor ed Bethel” na samay baka na atateng ko, nanlingkor met ed Bethel si Simon tan Mark. Malikeliket kami!

Tulong Parad Saray Emel

 Anggan diad bandad sampot na 1990’s, anggapo ni emel ya elder ed Britain, pero wala ray ministeryal a lingkor. Lapud satan, saray makasalitan elder ya agda amtay mansinyas so kaukolan ya mangobserba tan mandesisyon no kasin “kualipikadon manbangat” tan manlingkor bilang manangasikaso irayan emel ya brother. (1 Timoteo 3:2) Walay sakey ya emel ya ministeryal a lingkor ya walad English ya kongregasyon, say ngaran to et Bernard Austin. Rerespetoen ya maong iyan brother tan talagan inar-aro to ray agagi. Malikeliket ak nen naamtaan kon aturo bilang elder si Bernard! Diad tua, sikato so sankaunaan ya emel ya elder ed Britain.

 Nen 1996 walay agnalinglingwanan ya agawa, inaprobaan na branch ya nabuo so sankaunaan ya sign language ya kongregasyon ed Britain. Wala itan ed Ealing, diad West London. Insan dakel ni agawan inyaligwas.

Nagugunggonaan La ra ed Amin ya Kristianon Pantitipon

 Legan na 1980’s tan 1990’s remote worker ak na Service Department ed Bethel. Kanian makakapan-volunteer ak anggano wala ak ed abung. Say asainmin ko et eebatan ko iray tepet nipaakar ed kimey na sign language. No maminsan, mansusulat iray agagi diad branch tan tetepeten da no panon dan natulongan iray emel ya natalosan iray paliwawa diad saray aral, asemblea, tan kombension ya English. Diad saman, anggapo ni ray uksoyan ya iyinterpret ed sign language iray angkabaleg ya pantitipon, tan anggapo met iray publikasyon parad saray emel. Kanian mabetbet kon papasesegen iray agagi ya makasalita tan saray emel ya mananos labat tan alagaren day ikiwas nen Jehova.

 Abendisyonan so impananos mi! Ag-abayag, say branch la so mangoorganisa ed panginterpret ed sign language na saray aral tan asemblea ya English. Say sakey nin balibalin pananguman et diad arapan la onyuyurong iray emel pian nanengneng dan maong so manpapaliwawa tan mani-interpret. Lapud satan aliklikna na saray agagi tayon emel ya talagan inar-aro ira nen Jehova, tan importante iran kabiangan na espiritual ya pamilya to.

 Nen Abril 1, 1995 agawa so sankaunaan ya espisyal ya asemblea na sign language diad Assembly Hall ed Dudley diad West Midlands. Tinulongan koy Brother David Merry, ya datin manangasikaso na sirkito, pian naorganisa so assembly. Arawrawi so biniahe na saray arum ya Tasin emel pian makapi-asemblea ira. Wala ni ray nanlapud Scotland diad norte tan Cornwall diad southwest. Nanonotan ko ni ya eksayted so amin nen masulok ya 1,000 so inmatendi ed sayan agnalinglingwanan ya asemblea.

 Nen 2001 imbaga na branch ya sikami nen Brother Merry so mangorganisa na BSL ya regional a kombension ed ontumbok ya taon. Baleg ya kimey iman! Balet benendisyonan nen Jehova so sagpot na dakel ya volunteer, kanian nagmaliw ya marakdakep tan agnalinglingwanan iman ya kombension! Kayari to ’tan, awalaan ak na pribilehyon ontulong ya mangorganisa ed saray asemblea tan kombension na sign language ed dakel ya taon, ya anggad angitarya lay Jehova na mas ugaw ni ran kualipikadon brother ya manggawa na sayan kimey.

Saray Video Parad Saray Emel

 Nen 1998 malikeliket kami ta in-release na organisasyon nen Jehova so sankaunaan ed saray publikasyon na sign language diad BSL—say brosyur ya What Does God Require of Us?—On Videocassette. Inusar mi itan ed dakel ya iyaaralan mi na Biblia.

 Diad samay 2002 a kombension, first time ya inyinterpret ed BSL iray Kingdom song. Sarag la natan ya “kansionen” na saray emel ya agagi iray balibalin liriko legan dan aaligen so signer tan nalilikna da met so balibalin tono na musika. Naliliketan ak no nanonotan ko may sakey ya emel ya elder ya manakis ed liket nen first time toy “angansion!”

 Wala ni first time ya agawa nen 2002 a kombension. Naimbitaan so London Sign language Congregation ya manggawa na in-video ya drama. Pero panon min gawaen itan ta agmi nin balot asali so nanggawa na in-video ya drama? Tinulongan kami lamet nen Jehova! Diad saman et akalmo kami na saray agagi ya marunong ya manggawa tan man-edit na video. Balibali may drama! Baleg so nitulong to man ya eksperiensya mi ta manlapu la nen 2003 ya anggad 2008 et apribilehyoan ak ya mangasikaso ed panggawa na saray video drama ed Bethel parad saray kombension na BSL diad arapen.

 Labalabay mi nen Stella so manlingkor ed Bethel kaiba iray ananak mi. Pero aliwan mainomay so kimey! Kayari pigay simba na impanpraktis tan impan-video, naknaksawan ya maong so laman tan isip na saramay ginmanap ya aktor tan saramay kaiban nanggawa na drama. Pero sulit so impansagpot mi! Malikeliket ya maong so puso mi nen anengneng min nagmaliw ya tudtua iray agawa ed Biblia parad saray agagi tayon emel tan dakel ed sikara so akaakis ed liket.

 Tuloytuloy ni so pangiiter nen Jehova na saray espiritual ya regalo. Nen 2015 naawat mi so video na panaralan ya edisyon na The Watchtower ed BSL. Insan nen 2019 ni-release met so video na libro na Biblia ya Mateo. Natan et wala lay kompleton Kristianon Griegon Kasulatan—tan say Hebreon Kasulatan et peles ya gagawaen. Misalsalamat ya maong iray emel ya agagi ed si Jehova!

 Bilang lingkor nen Jehova, kaiba tayo ed espiritual ya pamilya ya mangaalig ed panangaro na Ama tayod tawen ya anggapoy lalabien to. (Gawa 10:34, 35) Siansia nin pambiliban min sankapamilya so panaon, biskeg, tan kaykayarian ya uusaren na organisasyon tayo pian tulongan so amin ya klase na totoo—kaiba la ray emel tan saray bulag. a

 Sulit iraman ya impansagpot mi ta natan et wala lay pigaran kongregasyon na BSL ed Britain. Malikeliket ak ta anengneng kon inmaligwas so kimey diad sign language manlapud “melag a gapoan.” (Zacarias 4:10) Pero siempre, agawa labat iratan lapud tulong nen Jehova. Igigiya to so organisasyon to. Iiter to so amin ya pankaukolan na saray lingkor to pian nipulong da so maong a balita ed amin ya klase na totoo. Tan patutuboen to so bukel na Panarian ed puso na saramay makanepegan.