Mapappaabeban brother si kuya Cecil tan anengneng ko ya talagan inar-aro to ray totoo. Kanian inalig koy alimbawa to, ontan met ed alimbawa nen nanay ko, tan arum ni ran matoor ya agagi ed kongregasyon. Bilang resulta, apakiwas ak ya iter ed si Jehova so sankaabigan ko. (Filipos 2:13) Istoryaen kod sikayo iray agawgawad bilay ko.

 Niyanak ak nen 1943. Manaayam iray atateng ko diad syudad na Bundaberg ya pantataneman na unas ya asingger ed gilig na dayat diad Queensland, Australia. Akaugalian na saray kabandaan mi ya onla rad baley no Sabadoy labi pian makapiistoryaan irad saray totoo. Aminsan nen 1939, walay akatongtong na atateng ko ya duaran payunir (Tasi nen Jehova ya full-time ya manpupulong). Inistorya dad sikara iray nanaaralan da ed Biblia. Manlapud saman, sinmabid puso na atateng ko iray nanaaralan dad Biblia, tan ag-abayag et nagmaliw iran Tasi nen Jehova. Kanian binmaleg kami nen atsik Jean ed pamilyan Tasi. Makapaermen balet ta biglan inatey si tatay nen naplag ed takayan ed abung mi. Pitoy taon ko ni labat ed saman tan abigbigla ak ed impatey to. Agkon balot nalingwanan so inkakuli to tan say pampapaelek dad sikami. Excited ak lan napaoli si tatay ed paraiso pian mas nakabat ko ni!​—Gawa 24:15.

 Mabaibait si nanay tan panindigan to no antoy duga. Aamtaen to met no anto ray labay tan agmi labay nen atsik. Balet no tungkol la ed saray prinsipyo na Biblia tan panagdayew ed si Jehova, talagan gagawaen to no antoy duga. Lanang kamin mimiaral tan babagaan to kami nen atsik Jean ya limitaan mi piulop mi ed saray aliwan Tasin kaeskuela mi no asumpal lay klase. (1 Corinto 15:33) Anggad natan, misalsalamat ak ed saraman ya ginawa to parad sikami.

 Si nanay et makuli met ya manpulong, tan mabetbet ya mana-aplay ya vacation pioneer (natan et tatawagen ya auxiliary pioneer). Nanonotan ko ni ya masulok ya 50 ya kaabungan so regular ton iikdan na magasin ya Panag-bantayan tan Onliing! Anggano nen mataktakken tan makapuy la, say sankanonot to et no panon ton tulongan iray interesado. Talagan inar-aro nen nanay iray totoo tan lalo lad sikami ran ananak to. Lapud satan, sikatoy inar-aro mi tan inalig mi ray balibalin alimbawa to. Nen 1958, indedikak so bilay kod si Jehova tan nampabautismo ak anggano 14 ko ni labat ed saman.

 Ag-abayag, nampabautismo met si Rudolf ya kakongregasyon ko. Masulok ya 20 so taon tod saman tan nanlapud Germany. No Sabadoy kabuasan, mabetbet ya saniba kami nen Rudolf ya manpupulong ed saray manaalagar ed kotse ra legan ya mansha-shopping iray kapamilya ra.

 Maseseg ya brother si Rudolf tan itatagar to ak ya man-vacation pioneer kada no bakasyon ed eskuelaan. Aminsan, six weeks kamin saniban nampulong diad syudad na Gladstone ya manga 190 kilometro so kaarawi tod norte na Bundaberg. Lapud saman ya ginawa to tan lapud aliknak so liket ed impan-vacation pioneer mi, nagmaliw ya goal ko so man-regular pioneer. Kanian nen 16 so taon ko, nampayunir ak tan desidido ak ya usaren so bilay ko diad panlingkor ed si Jehova.

 Say unaan ya asainmin ko et diad Mackay, sakey ya syudad ya asingger ed dayat diad norte na Bundaberg tan asingger ed Great Barrier Reef. Kayari na manga sakey taon, nen 17 ko, niyasain ak ya manlingkor bilang special pioneer a diad probinsya na Australia ya datdaiset so manaayam. Say kaibak ed satan ya teritorya et si Brother Bennett (Ben) Brickell ya sakey ya alanaan tan mas matatken na 30 taon nen siak. b Akaaral ak ya maong ed sikato ta abayag lan payunir tan kabkabat ya sikatoy talagan napanuliranan ya payunir!

 Say teritorya mid northwestern Queensland et walad Gulf Country​—amay lugar ya kaabay na Gulf of Carpentaria. Diad saman ya panaon, sikami labat nen kuya Ben so Tasi ed saman ya lugar ya datdaiset so too. No maminsan manbiahe kami na pigaran oras antis min nasabi so onsublay ya abung ya pampulongan mi. No onman kabayag iray biahe mi, iistoryaen ed siak nen kuya Ben iray eksperiensya tod ministeryo. Singa bilang, angusar ira kuno na saray sound car c pian makapanpulong ira legan na World War II, ta diad saman et bawal so kimey na Saray Tasi nen Jehova diad Australia.

 Kayari na sanagew ya pampulong mi, mananap kami na napanginan mi tent mi diad asingger ed dalan. d Mantipon kami met na kiew pian walay panluto mi tan walay pansilew mi. Mangaawit ak met na singa tolda ya nadukolan ko, ules, tan danganan. Aminsan et agaylay pambilib kod si Aman Jehova lapud karakel na saray bitewen ed tawen ta anggapo ni kuryente diad samay lugar ya nakar mi.

 Lapud arawrawi so teritorya mi, delikado so naderalan na luluganan. Aminsan, aderal may akakonektaan na dalig na luganan mi. Agaylay petang ed saman tan kulang so balon min danum. Linmad baley na Cloncurry si kuya Ben pian mangaliw na piyesa. Taloran agew ak ya nanalagar. Datdaiset ya luluganan so ondadalan balet misalsalamat ak ta wala ray drayber ya mangiiter ed siak na danum. Wala met so lakin angiter ed siak na dagdaan lan libro. Kuan to, “Aro, basam ya ompan walay naaralan mod saya.” Abigla ak ta amay libron inter to ya ag-impublish na organisasyon tayo et tungkol ed impanirap na saray Tasi nen Jehova nen apriso rad kampo na saray Nazi!

 Ngalngali sakey taon kamin saniban nampayunir nen kuya Ben. Say impuppurek tod siak diad samay sampot ya impannengneng mi et, “Agka onsusuko agik.” Lapud samay anengneng kon seseg nen kuya Ben tan katooran tod Dios, mas desidido ak ya usaren so bilay ko diad full-time a panaglingkor.

 Kayari pigaran taon na impanpayunir kod ararawin lugar, niyasain ak ya manlingkor bilang manangasikaso na sirkito. Kaslakan et sakey simba so bisitak ed kada kongregasyon tan ararawin grupo ed sirkito. Diad inlabas na saray taon, akapanlingkor ak diad apatiran sirkito. Abisitak iray kongregasyon diad Queensland tan New South Wales. Insan nen 1971, agko inilaloan ya naimbitaan ak ya manaral ed koma-51 ya klase na Gilead, say eskuelaan na saray misionero na Saray Tasi nen Jehova ya walad New York. Limay bulan ya akapokus kami ed impanaral mi Biblia tan impiulop mid saray kaklase tan instruktor mi. Baleg so nitulong na saratan ed onsublay ya naawat kon asainmin ya magmaliw a misionero ed Taiwan.

 Siamera kamin sankaklase ya niyasain ed Taiwan, kaiba lay Brother Ian Brown ya taga New Zealand. Sikami so impaniba da diad teritorya mi. Ngalngali anggapoy amta mi tungkol ed Taiwan tan naamtaan mi labat so tungkol ed satan nen ninengneng mid mapa.

 Mandumaan ya maong so probinsya na Queensland tan Taiwan! Say unaan ya problema mi et say lenguahe ta Chinese so salita da ed Taiwan. Anggano saray aral so uusaren na organisasyon tayo pian napabiskeg itayod espiritual, medyo abayag met ya anggapoy natatalosan kod saray aral mi. Agko met tanton nakakatongtong iray agagi ta agkami makakapantalosan. Diman mi naapresya nen Ian imay dakdakel ya naaralan mi ed Gilead. Baleg met ya akatulong ed sikami so impan-personal study mi tan say impapuson panagpikasi mid si Jehova. Tan anggano agmi ni nibabagad saray agagi iray labay mi komon ya ibagad sikara, apaseseg kami ed panangaro dad sikami tan ed si Jehova.

 Kasabi mid Taiwan, impanaral da kamin tampol na Chinese. Say nambangat ed sikami et si Sister Kathleen Logan e ya taga Australia tan nan-graduate ed koma-25 ya klase na Gilead. Sineryoso mi so impanaral mi Chinese. Inusar mi met ya tampol ed panagpulong iray naaralan mi. Diad samay unaan ya impanpulong mi, nan-memorize kami nen Ian na antikey ya presentasyon mi. Nen paonla kami lad teritorya, nantongtongan mi no siopay unonan manpulong. Lapud mas matatken ak nen say si Ian, imbagak ya sikato lay unona. Say inmunan akatongtong mi et Chinese ya kagalang-galang so itsura to. Inanosan ton dinengel so nanlaok ya Chinese tan English ya impanpulong nen Ian. Manliket kami ta marunong manayan man-English tan tinepet to no antoy gagala mi. Akitongtong kamin agano tan antis kamin manpatanir et imbaga tod sikami ya agkami onsusukon manaral na Chinese. Lapud saman, mas desidido kami ya ag-onsuko ya singa samay imbaga ed siak nen kuya Ben nensaman.

 Say baleg a parte na teritorya mi et say capital city ya Taipei. Maslak ed saray totoo et agni apulongan ta pigpigara labat so Tasi ya manaayam diman. Anggan onman so situasyon na teritorya mi, agkami adismaya tan inggapo min tampol so nampulong. Kada bulan, nilasus ya magasin so niiiter mi. Wala balet iray mangaala na magasin ta labay da labat ya naamtaan no siopa kami tan no antoy labay min ibagad sikara. Anggano dakdakel so ag-interesado, ginawa mi anggaay nayarian min ipulong so Panarian. Nanmatalek kami ya walan-wala ray mangawat ed katuaan.

 Ag-abayag, nagmaliw ya kaarok so sakey ya Taiwanese ya sister ya si Wen-hwa. Inar-aro toy katuaan tan labalabay ton tulongan iray totoo pian natalosan tan awaten day mensahe na Biblia. Lapud satan, dakdakel kamin misionero ya atulongan to pian mas nakabisado mi man-Chinese. Na-inlove ak ed sayan responsablin sister tan nankasal kami nen 1974.

 Tuloytuloy ya tinulongan nen Wen-hwa iray misionero pian magmaliw iran mas epektibo ed ministeryo. Singa bilang, tinulongan to kamin natalosan no anto ray kustombre tan no antoy paninteresan na saray Taiwanese. Imbangat to kami met no anto ran presentasyon so praktikal ed teritorya ta Buddhist tan Taoist iray totoo. Normal labat ed saray totoo so pandayew ed saray inmuunan atateng tan karaklan ed sikara et agni akapanbasa na Biblia odino agnin balot akanengneng na Biblia. Kanian say ipupulong mi et no akin ya segurado kamin walay Amalsa tan say ngaran to et Jehova. Singa bilang, no imbaga na sakey ya dumaralos o sumisigay ya “Manlalapud tawen so kakanen mi,” say itepet mi “Parad sikayo, siopa ey so mangiiter ed amin ya kakanen tayo? Agta say Dios ya makapanyarin-amin, say amalsa ed amin a bengatla tan karapat-dapat ya dayewen tayo?”

 Diad inlabas na panaon, abendisyonan iray impansagpot mi ta dakel so angawat ed mensahe na Panarian. Medyo nairapan iray iyaaralan na Biblia ya ibeneg iray palson papanisiaan da tan saray kustombre ya agnibase ed Biblia. Balet diad tulong na saray misionero tan saray agagi ed kongregasyon, asarag da itan tan maples so inyaligwas da ed espiritual. (Juan 8:32) Dakel met ed saray brother so nagmaliw ya elder tan ministeryal a lingkor ed saray kongregasyon da tan dakel ya agagi so linmoob ed full-time ya panaglingkor kaiba lay panlingkor ed Bethel.

 Manlapu la nen 1976, akaawat ak na pribilehyo ya manlingkor bilang membro na Taiwan Branch Committee legan ak ya manlilingkor bilang misionero. Nen 1981, atawag kamin sanasawa ed Bethel tan intuloy ko so panlilingkor ko bilang membro na branch committee diad dakel a taon. Masulok lan 60 taon so linmabas manlapu la nen inggapok so manlingkor ya full-time. Say masulok ya 50 taon ed satan et diad Taiwan tan ngalngali 50 taon kami met lan saniba ya sanasawa. Si Ian Brown ya kaibak ya sinmabin misionero ed Taiwan et nansiansia met ed full-time ya panaglingkor anggad impatey to nen 2013.

 Akapokus kamin sanasawa ed saray asainmin mi diad Bethel, diad Chinese ya kongregasyon mi, tan diad ministeryo. Misalsalamat kamid si Jehova diad saray amin ya pribilehyon iiter tod sikami. Nen ugaw ak ni, pinakiwas ak nen Jehova ya manlingkor ed sikato ya interon puso, tan anggano matatken kami la nen Wen-hwa, tuloytuloy min nalilikna so tulong tod sikami.