Legan na 2021 serbisyon taon, a siansia nin mair-irap so situasyon diad interon mundo lapud COVID-19 pandemic. Singa impaliwawa ed artikulon “Sankamundoan ya Tulong Legan na Pandemic,” minilyon ya dolyar b so ginastos tayo ed relief parad pandemic tan masulok ya 950 ya Disaster Relief Committee so binuo.

 Likud ed pandemic, apektado met iray agagi tayo ed interon mundo lapud saray kalamidad tan arum nin trahedya. Pian natulongan iray biktima na masulok ya 200 ed saratan ya kalamidad, inaprobaan na Coordinators’ Committee na Mananguley ya Ulop so pangusar na 8 milyon ya dolyar bilang kaaruman ed tulong ya inggana parad COVID-19. Imanoen no panon ya inusar iray donasyon yo pian tulongan iray biktima na duaran apalabas ya kalamidad.

 Nen Mayo 22, 2021 sinmabog so Mount Nyiragongo, sakey ya bolkan diad Democratic Republic of the Congo. Dineral na lava iray kaabungan, eskuelaan, tan sakey ya tiponan na danum. Balet aliwan say lava labat so problema. Kayari na insabog na bolkan, pigaran agew ya pinmelag ed syudad na Goma so makasamal ya abo na bolkan tan dakel nin makalna iran yegyeg so nirekord. Masulok ya kapaldua na totoo ed syudad so nan-evacuate. Nilasus libo so tinmaynan, tan say arum et binmasil ed Rwanda.

 Kaiba ed saramay nan-evacuate so manga 5,000 ya Tasi nen Jehova. Naandian na abung so arum lapud insabog na bolkan; say arum balet et tinatakewan da ra nen tinaynan day abung da. Nantulongan iray relief committee diad Rwanda tan Democratic Republic of the Congo diad pangidaulo ed pangiter na relief. Oniay inreport na branch ed Congo (Kinshasa) nipaakar ed sakey ya relief committee: “Anggano magulogulo so situasyon ed syudad tan antis ni ingen ya ingganggan so pan-evacuate, ginmapo lan angibunog so committee na naakan, danum, dukolan, tan kawes.” Diad sakey ya baley ya angiyakaran ed masulok ya 2,000 ya agagi tayo, angi-set up so sakey ya relief committee na saray tolda, angibunog ira na saray mask, tan impaliwawa dad saray agagi no antoy nepeg dan gawaen pian ag-ira naalisan na COVID-19 tan cholera.

 Diad loob na taloran bulan, akapangiter iray agagi tayo na masulok ya anemiran tonelada na belas, anemiran tonelada na arinan mais, taloran tonelada na taba, tan taloran tonelada na danum. Pian makatipid na pundo, inyuksoy na branch so pangaliw na bultoan ya naakan diad mismon bansa imbes ya man-order na mas mablin naakan diad arum ya bansa.

 “Kinmapuy so liknaan mi tan agaylay ermen mi,” so imbaga na sakey a sister ya aderal so balon abung to lapud insabog na bolkan. Balet akaawat so pamilya to na praktikal tan espiritual iran tulong. Kanian natan et oniay imbaga to: “Diad tulong nen Jehova, nitatarya nin siansiay pankaukolan mi. Anengneng mi no panon ya sasakbaten nen Jehova iray ambelbelat ya aawiten mi kanian nalelemewan kami.”

 Pigay taon lan binmagsak ya maong so ekonomiya ed Venezuela. Aanosan na agagi tayo diman so mair-irap ya panagbilay, kakulangan na naakan, tan say iloloor na krimen. Balet ag-iran balot pinaulyanan na organisasyon nen Jehova.

 Legan na apalabas ya serbisyon taon, masulok ya 1.5 milyon a dolyar so agastos pian makasaliw tan nai-deliver iray naakan tan sabon ed saray pamilyan mankaukolan. Oniay inreport na branch ed Venezuela: “Aliwan mainomay ya i-deliver so 130 ya tonelada na naakan ed interon bansa kada bulan tan naseguron makasabi iratan ed saray agagin mankaukolan.” Pian seguradon agnaderal, say maslak ya ipapawit na agagi et saramay naakan ya mabayag so bilay to. Onia ni imbaga na branch: “No mangasaliw kami naakan, kaslakan et bultoan tan pipilien mi iramay panaon da pian mas mamura. Insan no i-deliver mi la, say paraan ya pipilien mi et amay makatipid kami.”

 Labalabay nen Leonel, sakey a membro na Disaster Relief Committee ed Venezuela, so asainmin to: “Espisyal so relief work,” kuan to. “Aligliwa ak ed sayan pribilehyo manlapu la nen inatey so inar-arok ya asawa lapud COVID-19. Lanang ak ya busy tan naliliknak ya mausa-usar ak ed saray agagi ya mankaukolan. Anengneng kon mismo no panon ya susumpalen nen Jehova so promisa to ya agton balot paulyanan iray totoo to.”

 Akaawat na tulong so sakey ya brother ya datin nanlingkor ed sakey ya relief committee. “Natan, siak met lay mankaukolan na tulong,” kuan to. “Aliwa labat ya materyal ya tulong so naawat mi. Diad tulong na saray agagi, nansiansia kami met ya kalmado nen asawak. Inasikaso, niligliwa, tan pinaseseg da kami.”

 Wala ray kalamidad ya bigla labat ya nagawa. Balet kaslakan et napapawalan tampol na organisasyon nen Jehova iray suplay na naakan tan tampol ya naidi-deliver iratan, salamat ed saray donasyon yo parad sankamundoan ya kimey. Saray arum ya paraan na pandonasyon et abitla ed donate.pr418.com. Misalsalamat kami ed inkamaiter yo.