“No nensaman, agtayo naimadyin ya awaten tayoy espiritual ya naakan diad elektronikon paraan.” Kasin onabobon kad satan? Kaiba itan ed saray imbaga nen Geoffrey Jackson ed makapaseseg ya paliwawa to diad 2020 Update na Mananguley ya Ulop #6. Imbaga to ni: “Balet natan, ompan naisip tayo, ‘Panon tayon nasarag yay pandemic no anggapoy nausar tayo ya singa say JW Library?’ Imparaan itayo nen Jehova ya pigay taon la pian nasarag tayoy singa onia ran kipapasen.”

 Panon tayon nibaga ya abayag itayo lan ipaparaan nen Jehova? Anto ray ginawa pian nabuo so JW Library app, tan anto ray kaukolan ya gawaen pian namintina tan naparakep ni itan?

 Nen Mayo 2013, kinerew na Mananguley ya Ulop ed MEPS Programming, sakey ya department ed world headquarters, ya manggawa ira na app ya nakarga toy Balon Mundo a Patalos. “Anggapo nid saman so in-release tayon mobile app ed anggan anton app store,” so kuan nen Paul Willies ya walad MEPS Programming. “Balet nanbuo kami na team, intunda mi ni ray arum ya proyekto, tan akitulongan kamid arum ya department pian idesinyo tan buoen so app tan saray karga na satan. Mabetbet kamin manpipikasi tan diad tulong nen Jehova, in-release so app diad annual meeting kayari labat na limaran bulan.”

 Say onsublay ya kaukolan ya gawaen et no panon ya magmaliw ya library so app, ya sarag ton ikarga ditan so dakel ya publikasyon diad nanduruman lenguahe. Kasabi Enero 2015, maslak ed saray balon publikasyon ed English et available lad app, tan kalabas na limaran bulan, nayari lan i-download iratan diad nilasus nin lenguahe.

 Manlapud saman, mas pinarakep ni app diad dakel nin paraan. Singa bilang wala la ray video, amin ya publikasyon tan media ya usaren ed saray aral ed kongregasyon et wala lad sakey labat ya tab, tan nabasa la iray reperensya diad Giya ed Pan-research diad mismon bersikulo na Biblia.

 Kada agew, nalulukasan so JW Library ed 8 milyon ya gadyet tan kada bulan et diad masulok ya 15 milyon ya gadyet! Antoy kaukolan ya gawaen pian seguradon onggana itan diad saratan ya gadyet? Oniay impaliwawa nen Brother Willies: “Diad tua, say sakey ya mobile app et agan talaga nasumpal. Tuloytuloy kamin mansasagpot pian naaruman iray feature tan pian mas mainomay ya usaren so app. Mabetbet ya manguuman iray operating system, kanian uumanen mi met so app pian seguradon onggana ed saratan ya balon system. Kaukolan mi met ya mintinaen tan umanen so internal software tayo ta naaaruman iray publikasyon tan recording ya available ed JW Library.” No paniibaen so amin ya lenguahe, diad kaplesan et walay manga 200,000 ya publikasyon tan masulok ya 600,000 ya audio tan video recording ya available ed JW Library!

 Pian tuloytuloy ya nasuportaan iyan app, aliwa labat lan computer so kaukolan. Kaukolan met so manbayar parad lisensia na dakel ya software. Say sakey labat ya lisensia et manbili na $1,500 (U.S.) kada taon. Ontan met, manguusar so MEPS Programming na manga $10,000 (U.S.) kada taon parad saray gadyet ed nanduruman manufacturer pian naseguro ya onggana so app ed balo iran computer, tablet, tan cellphone.

 Lapud JW Library, baleg so abawas ed gastos parad pan-imprinta, pan-bind, tan pangi-deliver ed saray literatura. Say sakey ya alimbawa et say bokleta ya Usisaen so Kasulatan ya Inagew-agew. Ngalngali 12 milyon ya kopya na Usisaen so Kasulatan ya Inagew-agew—2013 so inimprinta. Balet manga limaran milyon ya kopya labat so inimprinta ed samay 2020 ya edisyon—anggano mas dakel lad saman na manga 700,000 so bilang na manangipalapag ed interon mundo. Akin et abawasan? Dakel ed saray agagi tayo et manbabasa la na teksto ed inagew-agew diad JW Library. a

 Makakatulong so JW Library ed saray manguusar ed satan diad dakel ya paraan. Si Geneviève ya manaayam ed Canada et imbaga ton nagmaliw ya regular so personal study to lapud sayan app. “Diad tua, no uloren ko ni ray librok, seguro mangiras ak ya manaral a kinabuasan,” so kuan to. “Balet lapud sayan app, laen ko labat so tablet ko tan wadman lan amin so kaukolan ko. Lapud regular ya panag-aral, mas binmiskeg so pananisiak tan espiritualidad ko.”

 Akatulong met ya maong so app legan na COVID-19 pandemic. Oniay impaliwawa nen Charlyn ya tagad United States: “Lapud ikakayat na COVID-19 diad interon mundo, masulok a sakey taon ak lan ag-akaawat na balon niimprinta ya publikasyon. Balet lapud JW Library, mansiasiansian mabiskeg so espiritualidad tayo, tan pisalamatan koy Jehova lapud sayan maaron probisyon to.”

 Mipara so nalilikna na dakel ed si Faye ya taga Pilipinas. Imbaga to: “Uusaren ko yan balibalin app pian mansiansia ak ya maapit ed si Jehova. Atan so unaan ya babasaen ko kabangon koy kabuasan. Atan so dedengelen ko legan ak ya mankikimey ed abung. Atan so uusaren ko no manaaral ak parad saray pantitipon tayo tan no manpaparaan ak antis ak ya mangiyaral. Manbabantay ak na video ed satan no anggapoy gagawaen ko. Manbabasa ak na saray artikulo odino Biblia no manaalagar ak diad pila. Talagan mausa-usar.”

 Mausa-usar met so app diad ministeryo. Singa bilang, legan ya manpupulong so sakey ya sister, labay ton usaren so sakey ya teksto ya anengneng ton inusar na sananey nin sister pigaran simba lay apalabas. Pero agto amta no iner nabasa imay teksto. Imbaga to: “Maong labat ta walay anonotan kon salita ed samay teksto. Nilukasan ko may app, in-tap koy Biblia, insan ko in-search may salita. Nalmok ya tampol imay teksto. Lapud samay app, naaalmok iray teksto ya nalilingwanan ko.”

 Makakatulong iray donasyon yo panamegley na saray paraan ya walad donate.pr418.com pian namintina tan mas naparakep so JW Library app parad saray agagi tayo diad interon mundo. Salamat ed inkamaiter yo.

1. Oktubre 2013—In-release so app ya nankargay Balon Mundo a Patalos

2. Enero 2015—Available la iray arum ya publikasyon diad English, insan sinmublay so arum nin publikasyon diad dakel ya lenguahe

3. Nobyembre 2015—inyarum so feature ya highlighting

4. Mayo 2016—inyarum so tab na Meetings

5. Mayo 2017—inyarum so feature ya note-taking

6. Disyembre 2017—inyarum so feature parad Study Bible

7. Marso 2019—Nayari lay man-download na audio recording, man-stream na video, tan na-access iray reperensya diad Giya ed Pan-research

8. Enero 2021—inyarum iray feature parad Panliketan so Bilay ya Anggapoy Anggaan!