Mas dakel la natan so espiritual a naakan na Saray Tasi nen Jehova diad elektronikon paraan. Balet diad dakel ya lugar, anggapoy pakasarag na agagi tayo ya manpakabit na Internet. Say arum et manaayam ed saray lugar ya mabetbet ya naaandi so kuryente, mahinay Internet, odino talagan anggapoy Internet.

 Balet natan, nayari lan i-download na agagi tayo iray elektronikon publikasyon tayo anggano anggapoy Internet! Panon?

 Say JW Box et iiter ed saray kongregasyon ya mairap day maka-access ed Internet. Nankarga itan na router device ya sinaliw ed sakey ya kompanya, software ya denesinyo na Computer Department ed Bethel, tan saray elektronikon publikasyon tan video ya inalad jw.org. Say bili na kada box et manga $75 U.S.

 Diad Kingdom Hall, ikonekta na saray agagi so cellphone odino tablet da ed JW Box insan da i-download iray publikasyon tan video ya agla kaukolay Internet. Anggan saramay daan la odino mamura labat so gadyet da et sarag day onkonekta. Balet panon ya na-update so JW Box no anggapoy access na kongregasyon ed Internet? Sagpaminsan et mangipapawit so branch na saray USB ya say sakey et manbili na manga $4 U.S. Nankarga iratan na balo iran publikasyon ya inalad jw.org tan nayarin iyalis ed JW Box.

 Panon ya akatulong so JW Box ed saray agagi tayo? Oniay imbaga nen Nathan Adruandra, sakey ya ama ya manaayam ed Democratic Republic of Congo: “Abayag ko lan sasalien ya i-download iray drama ya ‘O Jehova . . . Sika so Panmamatalekan Ko’ tan Nodnonot Yoy Asawa nen Lot. Balet agkon talaga nai-download kanian adismaya ak. Pero natan, sarag ko lan i-download irayan video ed cellphone ko, tan makakatulong iraya ed sikami ran atateng pian nibangat min maong iray ananak mi.”

 Oniay imbaga na sakey ya brother ya tinmulong ed saray kongregasyon ed Nigeria ya mangi-set up na JW Box: “Parad saray agagi, espisyal ya regalo ya nanlapud si Jehova so JW Box. Malikeliket ira ta main-inomay la natan ya i-download iray publikasyon tan video ya walad Uusaren ed Panagbangat.”

 Masulok ya 1,700 ya JW Box so impawit ed saray agagi tayo diad Africa, Oceania, tan South America, tan wala ni ray plano ya pawitan so dakel nin kongregasyon. Iner so panlalapuan na saray pundo parad saya? Manlalapu iratan ed saray donasyon parad sankamundoan ya kimey, ya dakel ed saratan et iiter panamegley na donate.pr418.com. Salamat et mabulbulos ya suporta yo.