Masulok ya 60 porsiento na saray full-time ya translation team so mankikimey, aliwan diad saray branch office, noagta diad saray remote translation office (RTO). Akin et mas epektibo iyan uksoyan? Anto ray kaukolan na saray translator pian epektibo dan nagawaan iray kimey da ed RTO? Tan panon ya say lugar ya kawalaan na sakey ya translation team et makaapekto ed kualidad na panagpatalos da?

 Lapud RTO, makapanayam iray translator ed lugar ya kawalaan na totoon mansasalita na lenguahen ipapatalos da. Oniay imbaga nen Karin, sakey ya translator ed lenguahen Low German: “Manlapu la nen inmalis kami ed RTO diad Cuauhtémoc, Chihuahua, Mexico, naynay kami lan mansasalita na Low German—no mitotongtong kamid saray kaiba min translator, no wala kamid ministeryo, tan anggan no mititindaan kami. Apaliberan kami na saray totoon mansasalita na lenguahe mi. Narerengel mi ray ekspresyon ya abayag mi lan ag-arengel, tan naaamtaan mi ray pananguman ed saray salita ya uusaren na totoo.”

 Inamin nen James, kaiba ed Frafra translation team diad Ghana, ya no maminsan et naiiliw toy pamilyan Bethel diad branch. Balet inyarum to: “Labalabay koy mankimey ed RTO. Malikeliket ak no manpupulong ak ed mismon lenguahe mi insan ko nanenengneng so reaksion na saray totoo ed maong a balita.”

 Panon ya mandedesisyon iray agagi no iner so pangiyanan na sakey ya RTO? “Say sakey ya problema mi, diad arum ya lugar et mankatsep so kuryente odino danum, odino say koneksion na Internet ya kaukolan pian naawat iray materyal ya ipatalos,” so kuan nen Joseph, kaiba ed Worldwide Design/Construction Department diad Warwick, New York, U.S.A. “Kanian no mangi-set up kami na sakey ya RTO, aliwa labat ya saksakey a pasen so pampipilian mi diad saray lugar ya sasalitaen so lenguahe.”

 Kaslakan, say sankapelesan tan aliwan magastos ya pangiyanan na sakey a RTO et diad sakey ya Assembly Hall, Kingdom Hall, odino missionary home, ya ditan et nayarin onla iray translator tan mankimey bilang commuter. No agnayarin usaren iray ontan ya pasilidad, nayarin naaprobaan so pangaliw na apartment tan pasen ya usaren bilang opisina ya ditan manayam tan mankimey iray translator. No manguman so pankaukolan na translation team, mainomay ya ilako iratan ya pasilidad tan nausar so pundo ed no iner itan mas kakkaukolan.

 Legan na 2020 serbisyon taon, nanggastos tayo na 13 milyon a dolyar (U.S.) pian mantultuloy so kimey ed RTO. Kaukolan na saray team ed RTO iray computer, espisyal iran software, gamit parad audio-recording, koneksion ed Internet, tan arum ni. Singa bilang, say kaslakan ya nagastos ed pan-set up na sakey a computer et nayarin onabet ed manga $750 (U.S.) kada translator. Saratan ya computer et walaan na sinaliw iran software tan say Watchtower Translation System, sakey itan ya program ya ontutulong ed saray translator pian naorganisa da iray kimey da tan pian mainomay dan na-access iray materyal ya usaren da.

 Wala met iray naawat na saray translator ya gamit parad audio-recording pian makapanrekord ira diad opisina da. Mausa-usar iratan ya gamit lalo la nen ginmapoy COVID-19 pandemic ta nayarin isempet iratan na saray translator ed panaayaman da tan nituloy day panrekord na saray ipapatalos dan publikasyon tan saray video.

 Kaslakan et wala ray volunteer ya manrerebyu ed saray impatalos ya publikasyon, tan manmimintina ed saray pasilidad na RTO. “Dakel ya manangipalapag tan regular payunir so naikdan na pankanawnawan nausar da iray talento da dia,” so imbaga nen Cirstin, ya manlilingkor ed Afrikaans RTO diad Cape Town, South Africa.

 Panliliketan na saratan ya volunteer so pribilehyo da. Imbaga na sakey ya sister ya ontutulong ed sakey ya RTO ya no mankikimey ditan et singa “makakasungap na preskon dagem.” Wala ray agagi ya nauusar so boses da ed saray audio recording. Imbaga nen Juana, translator na Totonac diad sakey probinsya na Veracruz, Mexico: “Natan ta asingger kami lad saray baley ya mansasalita na lenguahen ipapatalos mi, mas mainomay la na saray agagi so ontulong ed panrekord na saray publikasyon tayon audio tan video.”

 Balet kasin akatulong so inyalis ed saray RTO pian ondakep so panagpatalos? Dakel ed saray minilyon ya manbabasa so angibaga ya, on. Oniay imbaga nen Cédric, ya kaiba ed Kongo team diad Democratic Republic of Congo: “Dati, say tawag na arum ya agagi ed panagpatalos mi na Kongo et ‘say Kongo na saray publikasyon na Watch Tower,’ ta aliwan onman so natural ya panagsalitay Kongo. Balet natan, ibabaga ran saray publikasyon tayo et ipapatalos ed moderno ya Kongo, say inagew-agew ya panagsalita na totoo.”

 Ontan met so narerengelan nen Andile ya kaiba ed Xhosa team diad South Africa. “Dakel so mangibabaga ed sikami ya naimano da so impanguman na panagpatalos mi,” so kuan to. “Anggan saray ugugaw ya datin English so babasaen dan Panag-bantayan et manbabasa la natan na Xhosa. Labalabay da so in-revise ya Balon Mundo a Patalos ta natnatural itan ya basaen.”

 Amin ya gastos ed pangi-set up tan panmintina na saray RTO, pati say pangitarya na pankaukolan na saray mankikimey ditan et susuportaan na saray boluntaryon donasyon ed sankamundoan ya kimey, kaiba la ray indonasyon panamegley na donate.pr418.com.