Kada bulan, tatalaranan tayo so pangi-release na saray espiritual ya programa tan saray video diad JW Broadcasting. Balet, agna-access na dakel ya agagi tayo ed Africa irayan programa diad Internet. Akin ey?

 Dakel ya lugar ed Africa so anggapoy access ed Internet. Tan no bilang wala, maslak et makapuy so Internet tan mabmabli. Singa bilang, in-download na sakey ya manangasikaso na sirkito diad Madagascar so sakey labat ed saray binulan ya programa na JW Broadcasting diad sakey ya Internet café. Siningil da na $16, mas baleg itan nen say nanaalmo na arum ya totoo ed sakey simba! a

 Balet anggano onia kairap so kipapasen ed Africa, sarag la natan na minilyon a totoo ya bantayan so JW Broadcasting anggano anggapoy Internet. Panon?

 Manlapu la nen 2017, nabantayan la na saramay manaayam ed sub-Saharan Africa so JW Broadcasting panamegley na satellite channel. Libre so pambantay ed sayan channel ya available ed 16 ya lenguahe.

 Pian nagawaan itan, manbabayar iray Tasi nen Jehova na sakey ya television broadcast service pian i-transmit iray video panamegley na satellite. Sarag ya kobrian na sayan satellite so manga 35 ya bansa diad sub-Saharan Africa. Say bayar ed satan et masulok ya $12,000 kada bulan. No maminsan, walay kaaruman ya bayaran no mangi-broadcast tayoy live iran event diad sananey nin channel. Kanian nilibo iray nagugunggonaan ed saray kombension odino saray espisyal ya programa no wala ray branch visit.

 Nababantayan na dakel, anggan saray aliwan Tasi, so JW satellite channel diad TV ed abung da. Balet wala ray agagi ya agmakasaliw na saray kaukolan ya equipment pian makapambantay na satellite channel. Pian natulongan ira, in-set up iray satellite-receiving equipment ed masulok ya 3,670 ya Kingdom Hall pian nabantayan na saray agagi so JW Broadcasting ditan. Say bili na equipment kaiba lay pangi-deliver et manga $70 no wala lay TV odino projector na Kingdom Hall. No anggapo ni, say nagastos parad kaukolan ya equipment et nayarin onabot ed $530.

 Naapresyan maong na saray agagi iyan channel. Oniay imbaga na sakey ya elder ed Cameroon: “Parad pamilya mi, singa itan mana diad pegley na desierto.” Oniay imbaga nen Odebode, sakey a brother diad Nigeria: “Bilang pamilya, mamitlo min babantayan ed sakey simba so channel. Lanang iratan ya tatalaranan na ananak mi. No maminsan ni ingen no walay babantayan min arum ya channel, labay dan iyalis ed JW channel.” Oniay imbaga nen Rose ya taga met ed Nigeria: “Malikeliket ak ya mangibagad sikayo ya imbes ya puro balita so babantayan ko, say babantayan ko la natan et JW satellite channel. No manbabantay ak na balita, mainomay ak ya onsyodot ed nababantayan ko tan onaatagey so dalak. Balet makapaseseg tan makapakalma so JW Broadcasting! Paboritok iyan channel. Talagan bendisyon iya manlapud si Jehova.”

 Inreport na sakey ya manangasikaso na sirkito diad Mozambique ya diad sirkito to et in-set up ed saray Kingdom Hall iray satellite-receiving equipment. Saray agagi ed sarayan kongregasyon et onsasabi na sakey oras odino mas masakbay ni antis na aral pian bantayan so JW Broadcasting panamegley na satellite.

 Diad samay 2019 ya internasyonal a kombension diad Johannesburg, South Africa, inusar so channel pian nipabantay ed siameran lokasyon iray manunan paliwawa, kaiba la ray paliwawa na sakey ya membro na Mananguley ya Ulop. Oniay imbaga nen Sphumelele, manlapud local Broadcasting Department diad South Africa branch: “Dati, nai-broadcast mi labat iray paliwawa panamegley na Internet. Pero dapat maksil so Internet tan manbayar tayoy data. Balet mas mamura so nagastos ed JW satellite channel tan anggapoy aberya.”

 Salamat ed saray mabulos ya donasyon yo ed sankamundoan ya kimey, nabantayan la natan na dakel ya agagi tayo ed Africa so JW Broadcasting panamegley na satellite. Misalsalamat kamin maong ed saray donasyon ya mabulos yon iiter ed nanduruman paraan ya naromog ed donate.pr418.com.