“Labinsiam ya taon ko yan inalagar!” Anto kasi tay inalagar na agi tayo? Say Balon Mundo a Patalos na Griegon Kasulatan diad mismon lenguahe to ya Bengali. Singa ontan met so ibabaga na arum no ni-release lad lenguahe ra so Balon Mundo a Patalos. Balet naisip yo la kasi no anto ray kaukolan pian nipatalos tan napawala iratan?

 Unona, iiter so proyekto ed sakey ya translation team diad panangidaulo na Writing Committee na Mananguley ya Ulop. Panon kabayag ya ipatalos na sakey a team so Biblia? Oniay impaliwawa nen Nicholas Ahladis, ya manlilingkor ed Translation Services diad Warwick, New York: “Dakel so nayarin makaapekto, kaiba lad satan so karakel na translator ya nayarin nausar parad proyekto, no panon kakomplikado so lenguahen pangipatalosan, tan no kasin saray manbasad satan et pamilyar ed panagbilay na totoo diad panaon na Biblia, ontan met no kasin walay pandumaan na lenguahe ed kada rehyon. Kaslakan, onabot ed sakey anggad taloran taon so pangipatalos ed Kristianon Griegon Kasulatan tan manga apatira ni odino mas dakel nin taon pian nasumpal so interon Biblia. Pero mas mabayag ni parad sign language.”

 Balet aliwa labat ya say translation team so kaukolan ed sayan proyekto. Kaukolan met so tulong na saray agagi ya nandurumay background da—ya no maminsan et manlapu ni ingen ed nanduruman bansa—pian narebyu so impangipatalos. Gagawaen da itan ya anggapoy bayar. Makatulong iray komento da ed saray translator pian magmaliw ya susto, malinew, tan mainomay ya talosan so Biblia ya ipapatalos. Singa imbaga na sakey ya trainer ed panagpatalos na Biblia diad South Africa, “Parad saray translator, ambelat ya responsabilidad iya ta walay eebatan da ed si Jehova tan ed saray manbabasa na Salita to.”

 No asumpal lan ipatalos, kaukolan lan iyimprinta tan i-bind iray Biblia. Pian nagawaan itan, mangusar so printery na manga samploran materyales: papel, tinta, apis, panagpeket, liner na apis, silver leaf, ribbon, headband, pampatalker na spine, tan capping material ya makatulong ed pan-bind na Biblia. Nen 2019, masulok ya 20 milyon ya dolyar (U.S.) so agastos ed sarayan materyales ya inusar ed impanggawa na Biblia. Diad satan ya taon, masulok ya 300,000 ya oras so impankimey na saray agagi tayo ed Printery pian napawala tan nipawit iray Biblia.

 Akin et ontan la kabaleg so panaon tan kuarta ya uusaren parad sayan proyekto? “Say Biblia so sankaimportantian ya publikasyon ya gagawaen mi,” so kuan nen Joel Blue na International Printing Department. “Kanian labay min say itsura na satan et mangigloria ed Dios ya dadayewen tayo tan ed mensahe ya ipupulong tayo.”

 Likud ed regular ya edisyon na Balon Mundo a Patalos, mamapawala tayo met na saray edisyon parad saramay walaan na nikaduman pankaukolan. Singa bilang, say braille ya Balon Mundo a Patalos et available la ed samploran lenguahe. Say sakey ya kompleton braille ya Biblia et aboten toy waloy oras ya pan-emboss, tan lapud dakdakel so volume na satan et kaukolan so manga 2.3 metro (7.5 ft) ya pankargaan ed satan. Manggagawa tayo met na espisyal ya edisyon na Biblia parad saray walad prisoan ta say naabuloyan labat ditan et saray libro ya papel so apis da.

 Talagan baleg so epekto na Balon Mundo a Patalos ed bilay na saray manbabasa. Imanoen pa so sakey ya kongregasyon ya mansasalitay Kiluba diad lugar ya Tombe, diad Democratic Republic of the Congo. Say Tombe et masulok ya 1,700 kilometro so kaarawi to manlapud capital na bansa. Saksakey labat ya Biblia so uusaren na saray Tasi diman, ya saray salitan inusar ed satan et karaanan lan Kiluba. Atan so babayes-bayesen na agagi pian niparaan da ray parte da ed aral. Balet manlapu la nen Agosto 2018, saray kopya na kompleton Balon Mundo a Patalos ya modernoy inkisalita to et available la parad amin ed kongregasyon.

 Oniay imbaga na sakey a sister ya mansasalitay German nipaakar ed in-revise ya Balon Mundo a Patalos diad mismon lenguahe to: “Agko la natan ibabaga ya kaukolan kon basaen so Biblia. Noagta tetepetan koy sarilik, ‘Kapigan ak lamet kasi makapanbasa?’” Oniay insulat na sakey ya priso: “Naikdan ak na kopya na Balon Mundo a Patalos, tan uumanen na satan so bilay ko. Natan ko labat natatalosan so nababasak ed Salitay Dios manlapu la nen naawat ko yan patalos. Labay ko nin mas nakabat iray Tasi nen Jehova tan no panon so magmaliw ya Tasi.”

 Misalsalamat so amin ya manbabasa na Balon Mundo a Patalos ed saray donasyon ya onsusuporta ed pamawala na satan. Sarayan donasyon parad sankamundoan ya kimey et inter diad nanduruman paraan ya naromog ed donate.pr418.com. Salamat ed inkamaiter yo.