Legan na taon 2020, dakdakel so agawan kalamidad tan ginmapo met so COVID-19 pandemic ya angapekta ed interon mundo. Panon ya tinulongan na saray Tasi nen Jehova iray biktima?

 Diad apalabas ya 2020 a serbisyon taon, a inaprobaan na Coordinators’ Committee na Mananguley ya Ulop so pangusar na 28 milyon ya dolyar b parad disaster relief. Akatulong itan ed saray biktima na masulok ya 200 ya kalamidad—kaiba lad satan so COVID-19 pandemic, nantutumbokan iran maksil ya bagyo, delap ed Africa, eras ed Venezuela, tan kelang ed Zimbabwe. Akatulong na baleg iray donasyon pian nitarya iray naakan, danum, ayaman, kawes, tambal, pati saray uusaren ed panaglinis, panag-apiger, tan pangipaalagey lamet. Nia ray arum ed saray ginawan relief work.

 COVID-19. Diad interon mundo, saray agagi tayo et apektado ed pisikal, emosyonal, tan ed pinansyal. Pian natulongan ira, masulok ya 800 ya Disaster Relief Committee (DRC) so binuo diad interon mundo. In-monitor na sarayan committee no anto ray pankaukolan na saray agagi tayo tan tampol iran angiter na report ya makatulong ed Coordinator’s Committee ed pandesisyon da no panon so sankaabigan ya paraan na pangiter na relief ed saray agagi.

 Diad interon taon, dakel so atulongan na saray DRC ya nawalaan na naakan, danum, uusaren ed panaglinis, tan saray tambal. Diad arum iran pasen, akitulongan iray DRC ed saray lokal ya elder pian naasistian iray agagi no panon iran makaawat na tulong manlapud gobierno.

 Naimano na saray aliwan Tasi so pangiiter tayo na relief. Alimbawa, oniay imbaga nen Field Simwinga, district commissioner na Nakonde, Zambia, ed saray agagi tayo: “Utang mi ed sikayo so impangiter yoy relief ed saray pamilya ya mankaukolan.”

 Eras ed Angola. Lapud COVID-19 pandemic, dinmaiset so suplay na naakan diad Angola kanian binmilin maong iray sasaliwen. Dakel ed saray agagi tayo so talagan nairapan ya makasaliw na naakan.

 Kinerew ed branch ed Brazil ya mangipawit ira na saray naakan parad saray agagi tayo ed Angola. Pian nausar ed sankaabigan ya paraan so pundo parad relief, inaral ya maong so paraan na pangaliw tan pangipawit ed saray naakan, tan bultoan so impangaliw ed saratan. Say agastos ed kada sakey ya suplay na naakan et $22 labat, kaiba lad satan so gastos ed impangideliver. Say karga na sakey ya suplay et ngalngali 20 kilo na naakan ya singa say belas, beans, tan taba. Diad kaplesan et 33,544 lan suplay na naakan so nipawit—ami-amin et 654 tonelada so kabelat to. No ipila iray inter na saray agagi ya taga mismo ed Angola, akatulong irayan amin ya probisyon ed masulok ya 50,000 ya totoo!

 Antoy nibaga na saray agagi tayo ed naawat dan relief? Say kuan nen Alexandre ya manaayam ed arawin pasen na Angola: “Aya so ebidensya ya inaro ak nen Jehova tan agko bukbukor. Talagan inar-aro ak na organisasyon!” Onia met so imbaga nen Mariza, sakey a single mother: “Dinengel nen Jehova so pikakasik. Misalamat ak ed sikato tan say organisasyon to!”

 Kelang Diad Zimbabwe. Legan na 2020 a serbisyon taon, minilyon a totoo ed Zimbabwe so naapektoan na graben kelang, kanian minilyon ya totoo so anggapoy naakan da. Nilibo ya Tasi nen Jehova diad Zimbabwe so anggapoy magenap ya naakan da.

 Binuo so limaran DRC pian ontulong ed pangitarya na naakan ed saray agagi tayo. Nilasus ya manangipalapag so tinmulong ya nambalkot na saray naakan, angikarga ed saray suplay, odino angipabayes na saray luluganan da. c Legan na 2020 a serbisyon taon, $691,561 so agastos pian napakan so masulok ya 22,700 ya totoo!

 Wala ray agagi ya naupot da lay sarili dan suplay na naakan nen sinmabi so relief. Indayew na agagi si Jehova nen sinmabi naakan. Wala ni ra ingey angansion na saray Kingdom song.

 Diad sakey ya lugar, walay duaran Tasi ya abalo la ya inmatendi ed sakey ya miting ya inorganisa na komunidad da pian pantongtongan so relief ya iyoopresi na sakey ya nongovernmental organization (NGO). Balet, nagmaliw ya mapolitika so tongtongan kanian nandesisyon so duaran sister ya agda nayarin gawaen iray kondisyon pian makaawat na relief. Nen onalis la ra ed saman ya miting, binalaw da ra tan binagaan da ra, “Agkayo onkekerew na naakan ed sikami a!” Balet kayari labat na duay simba, akasabi la ray agagi tayo ed lugar da tan naikdan na relief irayan sister—mas akauna ni nen say relief ya iter na NGO!

 Akapangiter met na maabig ya pantasi so impangiter na relief diad Zimbabwe. Singa bilang, imanoen pay agawa ed si Prisca, ya manaayam ed sakey a melag a baryo. Mair-irap so situasyon lapud kelang, pero kada Mierkoles tan Biernes et manpupulong si Prisca, anggan diad panaon na panagbaka na dalin. Binalawbalaw na saray totoo ed baryo da si Prisca, ya imbaga dad sikato: “Ay naerasan so pamilyam lapud satay pampupulong mo.” Insan say iyebat nen Prisca: “Agnin balot pinaulyanan nen Jehova iray lingkor to.” Ag-abayag kayari na satan, akaawat si Prisca na relief manlapud organisasyon tayo. Pandinayewan itan na saray kakaabay da, tan imbaga dad si Prisca: “Agkan balot pinaulyanan na Dios, kanian labay mi met ya nakabat itan ya Dios.” Pitoran kakaabay da so ondedengel la natan ed saray aral na kongregasyon ya aka-broadcast ed radyo.

 Legan itayon manasingger ed anggaan, seguradon makaeksperiensya tayo ni ray natural ya kalamidad. (Mateo 24:3, 7) Misalsalamat kamin maong ed saray donasyon ya mabulos yon iiter ed nanduruman paraan ya naromog ed donate.pr418.com. Lapud saratan, nitatarya iray relief ed dugan panaon tan diad sankaabigan ya paraan.